長江後襠推前襠┇囫圇肺話

　▌當年今日　
📆　2019/0610

某府發言人深夜作出回應。本身我中文已經唔係好，睇完更加自卑過乜咁，真陰公。

家陣突然變成係「因應」一件事而提出修訂，並唔係「為咗」呢件事而做喎。即係，點？一班記者同樣𢱑頭。發言人再度發言解畫，愈解愈多問號。

某府咁多高收入嘅智將，竟然冇任何一位發現省城原來一直窩藏咗好多罪犯？就係呢一件事，先至令某府仝人彷如醍醐灌頂恍然大悟，跟住突然全部人又同時認為唔馬上修例的話，省城就會變成一個罪犯充斥之地？再嚟多嘢，撻蟻民嘅朵，話修例乃係民意所向？嗱，蛋衣蛋先，我要諗下自己有冇舉腳贊成過先⋯⋯

如果通過咗，該煨囉，睬瘟佢咩？省城嘅山頭咪只能藏衰拾壹嘅後浪——阿拾義哥拾生哥拾死哥濕柒哥？諗 deep 一啲，其實多一樣嘢柒出國際，都唔錯吖。知名度，邊有人會嫌高㗎，咪話我話啦！

◤　
　長江後襠推前襠，
　輪住扑脆萬千哥。　◢

閱讀我唔係路，理解又唔得，邏輯嘅嘢我就更加識條鐵。趁未使溶入家中，等我學返多少先得。我重以為只會有同字異音，原來重有同詞異見（sorry 手殘，係「異解」至啱），果然活到老學到老。=

語，唔止可以帶雙關，不過幾多關都好，只要係講嗰個能夠真心過到自己嗰關，先至係正解。

似足調佢個琴咁，調琴調新調調調調來調調妙。咁我瞓先，有農務需要喺夢中調理一下。　　⭓