中環遊戲(55)
塞翁得馬
![](https://assets.matters.news/embed/9a83754a-a646-4241-b878-03029647b6ed.jpeg)
香港嘅殖民地文化再加上辦公室文化,令到每年嘅十二月同一月,都係 turnaround 好慢嘅月份。無他,聖誕加上農曆年,就算唔係攞定晒假,大家都冇乜心機做嘢。
如果係潤月的話,呢種慢吞吞唔係撈嘢嘅氣氛,仲會一直延續到二月中,甚至二月下旬。更何況,除非你轉行或是爆咗血管,否則一直食到三月,啲春茗都仲未食完。原本已經慢,再加埋春茗嘅幾擔豬油,啲嘢真係全無速度可言。
打工嘅固然會跟大圍冇心機做嘢,做老細嘅有時都會少不免懶散起嚟 — 無嘅,終年日日做到冇停手,難得有一頭半個月靜下,都未嘗唔係好事,如果啲皮費唔係咁甘的話……
問題係,本公司皮費亦都真係甘甘哋,所以活在當下享受悠閒之際,其實都有啲心寒……
雖然未至於要蝕入肉,但我都需要一啲 new business、一啲新嘅收入,去「沖喜」一下。
二月中,農曆新年。
緩慢嘅日子終於去到停頓嘅狀態,因為放農曆年假。
自從我同 Winnie 喺 office、因為 Jessica 同 Charlotte 炒咗一鑊後,公司嘅日常運作,反而歸於平靜 — 我諗呢啲就係 deafening silence。可能係因為我哋嗰日鬧交所顯示嘅臨界質量,令到坐 hall 嗰兩個死女包領略到咩叫「相互保證毀滅」。喺「冚包散」嘅死亡威脅之下,佢兩個反而可以暫時放下佢哋嘅權力遊戲、就算唔合作都唔敢阻住對方做嘢。於是,NTS 嘅 proposal 順利完成,我哋亦都順利入 bid。
剩返落嚟嘅,就係等過完年後睇結果,得就得、唔得就食忽得,倒嚟得乾脆。
喺 office 裏面,我同 Winnie 都盡量避免接觸對方 — 無他,多講多錯、少講少錯、唔講唔錯;其實我哋都唔係好願意因為公事再鬧交。問題係,之前嘅短暫交火,經已令我同佢心裏面有條刺。呢條刺喺放工之後,大家都尚且可以暫時將佢收埋,努力咁粉飾太平、相安無事咁食飯休息造愛瞓覺。但係喺 office hour 嗰陣,大家就唯有避免接觸對方,以免擦鎗走火。
有時候,我哋甚至會經 Christine 去溝通。可憐嘅姐姐,我請佢嗰陣,份 JD 冇講過要做埋磨心嘅。慶幸嘅係,姐姐除咗口頭上會詐吓我形之外,從來都冇拒絕呢份磨心嘅工作。有咗 Christine 呢個「聯合國維持和平部隊」嘅角色做緩衝,公司開業以嚟最嚴峻嘅人事問題,暫時得以解決。
放低工作上嘅問題,呢個農曆年,對於我同 Winnie 嚟講,都有特別嘅意義,因為呢個係我哋婚後第一個農曆年。等咗咁多年,終於有得派利是 — Winnie 固然未派過,就算我呢個「有案底」嘅老公,其實都未派過。第一段婚姻,因為種種原因,我唔方便派利是;第二段婚姻,壽命短到等唔到過農曆年。2010 年,係我哋第一年、亦都係唯一一年派利是(我 foresee 唔到我會農曆年專登返香港派利是)。
派利是嘅嘢,唔想派嘅人就會乘機外遊「避年」,想派嘅人就偏偏冇乜機會派,呢啲叫人生定律。整個農曆年假期,直到我哋初五啟市,我同 Winnie 都冇乜機會派利是。撇除屋苑看更同公司同事嘅開工利是之外(呢啲有冇結婚其實都要派,起碼我會),我哋竟然連一封利是都派唔出 — 姓馮嘅除咗老一輩之外,已經冇乜人喺香港。
Winnie 今年除咗同父母婆婆拜年外,亦冇撞見啲表弟妹。至於我哋啲朋友 — 哈,講你都唔信,我哋踩住「卅中線」嘅年紀、身邊嘅朋友,竟然都嫁娶得八八九九!剩返嘅「盛男盛女」亦都出埠避年。結果,我哋嘅派利是夢想亦只有繼續擺多陣先。
滿以為農曆年咁多日長假,可以放鬆吓休息吓,點知年初一下晝,我哋返完 Winnie 外家拜年後,經已悶到發慌!原來農曆年嘅所謂「照常啟市」,只限於酒樓食肆戲院同某啲 fast fashion 連鎖店,我同 Winnie 行開嘅 Joyce、Harvey Nichols、I.T、D-mop、安蘭街等等,都照休無誤。冇得 shopping 又冇乜戲想睇、唱 K 又唔係我哋杯茶,結果我哋兩個仍然悶到發慌。
如果唔係一班相熟嘅 blogger 受埋我哋玩、一齊去大美督燒嘢食的話,我諗我哋嗰幾日假期會悶死(不過仍然冇人問我哋攞利是)。
年初九,星期一。(祈求唔好有文友好叻豬咁 highlight 呢個日期,然後留言:年初九係星期日喎!)
終於,乜年都過晒,連最 lunar new year hyper 嘅人,嚟到年初九都會回復正常工作狀態。
今日除咗係一般嘅正常工作日之外,仲係一個特別嘅日子:等「放榜」嘅日子。今日,NTS 將會宣佈奪得佢哋週年紀念 event 主辦權嘅中標公關公司。為隆重其事,我同 Christine 由開工嗰一刻開始,已經長駐 Winnie 房等派彩。
「咦……我件奶油多落咗好多煉奶,太甜……」我同 Christine 講。「可唔可以同你交換半件你嘅咖央多?」(仲有冇文友知道咩叫「咖央」?)
「都好,橫掂我今日口淡淡、想食啲重味啲嘅嘢。」佢遞咗件咖央多俾我。「Winnie 你齋飲啡就夠?唔使食嘢呀你?」
「你兩個冇房嘅咩?」Winnie 啤住我哋,不過唔係惡嗰隻。「做乜唔返自己房食,係都要喺我房度食?你兩個阻住我做嘢喎!」
「咁今日放榜吖嘛,」Christine 答佢。「放榜咁大件事,梗係要一齊等先好玩㗎啦!你話係咪喇?!阿『底褲』!」
「係『弟婦』;」Winnie 更正佢。「其實你哋喺自己房等都可以好興奮㗎喎!」
「咁我哋房乾淨吖嘛,又唔想整污糟檯面;」我笑笑口答佢。「你檯面係唔係都咁污糟,唔爭在啦!所以咪嚟你房食囉!」
「你係咪咁講嘢呀?!小氣鬼!」Winnie 藐我。
「你兩個耍吓花槍好喇!」Christine繼續維和角色。「唔好借啲倚開拖呀吓!」
「我先唔得閒 — 」Winnie 講講吓電話響。「咪住,Yvonne 呀!(接電話)Hello Yvonne!早晨呀!」
我同 Christine 都即時收聲、等 Winnie 同 Yvonne 講嘢。
「係……係……係……」Winnie 一直係咁「係」,我同 Christine 無從估計對話內容。「係……多謝晒你哋嘅信任!」
Winnie 講完呢句「多謝晒你哋嘅信任」之後,我同 Christine 都無聲做咗一吓「Yes!」嘅動作,Winnie 亦伸出手同我哋「Give me five!」
本公司終於奪得首次舉辦大型宴會嘅主辦權!新一年新開始,終於有啲好事發生!
「Yeah!恭喜晒!」我哋三個歡呼慶祝。然後,我問 Winnie:「跟住落嚟,我哋要做啲乜?」
「聽日上 Yvonne office,開第一次工作會議;」Winnie 好開心咁答我。「到時,佢哋會俾啲細節我哋。」
翌日,NTS 銅鑼灣 head office。
我哋福祿壽三個上咗去同客人開第一次工作會議。
一年前(2019年),有位高人寫咗篇網絡奇文,清楚解釋過,呢啲咁嘅第一次工作會議,其實係 moment of truth。因為之前大家仲未有合約關係,好多嘢都係猶抱琵琶半遮面,大家都仲有斗零矜持。但既然大家進入咗合約/合作關係,好多「有建設性」嘅批評,就會隨之而來。
「歡迎大家嚟到 NTS、參加我哋嘅第一次工作會議,希望大家合作愉快。」我眼前嘅 Yvonne,又係另一個高頭大馬嘅女人,size 直迫 Patricia。「你哋嘅 proposal 我哋睇過晒、亦都傾過晒,當中仲有好多問題、有啲嘢你哋 cover 唔到,我諗我哋而家開始傾吓啲問題啦。」
我一直都唔知道,原來「你好嗎」同「屌你老母」嘅距離,可以如此接近……
「首先,我哋覺得,個 event 嘅 message 唔得立體……」Yvonne 開始讀出佢嘅清單。「書法同陰陽調和有乜嘢關係呢?寫毛筆字咪就咁揸支筆寫囉,我睇唔到同陰陽調和有乜嘢關係喎。」
人無知、便無敵。唔識唔緊要,但係面對自己唔識嘅嘢就斷言否定,先至係最無知嘅行為。可惜,喺呢個年代,呢啲咁無知嘅人,似乎係社會嘅主流,好多仲撈得唔錯。
「其實呢,書法家好講究『修身』嘅,」Christine 接戰。「陰陽調和係平衡嘅一種,係修身嘅必要條件。更何況,一個字寫出嚟靚唔靚,其實都好講究黑同白喺紙上面嘅協調;所以,書法係非常好嘅陰陽調和表現。」
「收身?減肥嗰啲呀?」Yvonne 繼續低 B 無底線。「其實呢啲咁虛無嘅嘢,任你哋噏嘅啫。不過,你哋最好喺個 plan 度寫清楚啲、等我老細睇得明囉!其實叫蔡瀾嚟表演書法都好嘅,反正老細又鍾意、啲客又鍾意。係呢,到時可唔可以叫佢幫我哋公司寫多幾隻字、或者寫多幾首詩?用嚟掛喺 shop 吸引吓客人都好喎!」
「哦,呢層一定冇問題啦!」我笑笑口半串佢;當然,以佢嘅智慧,應該未必識聽。「蔡瀾寫字公價一萬銀一個字。你想的話,可以叫佢即場幫你寫詩㗎!一首七言律詩,都係五十六萬之嘛!小意思啦!我同佢講聲就得!」
「五十六萬?!我哋冇咁多 budget 喎!」佢幾乎連條脷都嚇到吐埋出嚟。「如果係咁,唔好寫咁多字喇,寫一兩隻就夠……」
要喺商業社會識別一個 cheap 喱唔難,你大佢就得。Cheap 喱唔襟大,一 chok 就散。
「另外呢,我仲想講吓個 guest list;」Yvonne 繼續佢嘅彈鐘清單。「我睇過你個 list,覺得啲 guest 仲未符合我哋公司嘅 image……」
「你意思係……」我當然知佢意思,不過心存萬一,希望佢親口講出嚟嘅嘢,冇我想像中咁 shit……
「我哋 revise 咗個 list,上面有啲嘉賓,我哋唔係太希望 invite……」Yvonne 遞咗個 list 俾我,我哋三個 share 嚟睇。
果然冇我想像中咁 shit,係更 shit。點講好呢?Revise……我覺得呢個字眼太客氣、反映唔到現實。其實佢將個 guest list 翻天覆地咁「revise」咗一次,我哋之前 suggest 嘅嘉賓,大約唔見咗三分二……
「Yvonne,我唔係好明……」Winnie 一邊睇一邊問。「俾你刪除咗嘅人,究竟因為咩問題唔可以喺邀請名單上呢?我驟眼睇,你除咗名嗰啲,好多都係城中數一數二嘅名人名媛喎……」
「嗰啲?佢哋個形象唔好呀……」Yvonne 亦都一邊睇住個 list、一邊解釋。「你知啦,我哋公司係講究調和同健康,其實落得嚟幫襯我哋spa嘅客人,都係對健康有要求嘅人。你哋嗰 guest list 上面有啲名人離過婚,有啲又試過婚外情,有啲仲搞同性戀𠻹!呢啲形象咁唔健康嘅人,我唔希望佢哋同我哋公司扯上關係囉!」(按:唔係我覺得同性戀唔健康,我只係轉述。)
嗰一刻,我好慶幸 Yvonne 唔知我離過婚,否則我呢個形象咁唔健康嘅公關,連生意都冇得做……
喺香港,有啲名氣又有喜歡去 ball 嘅名人,其實就係大家平時睇 C 版所見嗰堆,nothing more。而家有三分二俾佢哋彈咗鐘,咁究竟呢個 event 我仲可以請啲咩人呢?春田花花幼稚園全體師生夠健康未?!
喜欢我的作品吗?别忘了给予支持与赞赏,让我知道在创作的路上有你陪伴,一起延续这份热忱!
![](https://imagedelivery.net/kDRCweMmqLnTPNlbum-pYA/prod/avatar/c121f3b8-c6c6-42f6-9d0c-5761763d01b7.jpeg/public)
- 来自作者
- 相关推荐