伊朗五種人

太耐無去旅行，偶爾會想起伊朗，有點懷念
好不容易預備好材料整整伊朗甜品：米布甸Shir berenj（日本珍珠米version）

曾經有人問我點解咁鍾意伊朗，我當年竟然講過：
“因為覺得伊朗同香港好似, 都係曾經自由既地方”
回想起來，彷似是一個毫無意識的預言。
去年我開始回想我係伊朗遇過既人

第一種人，係已經移民咗去外地的人。有長居美國，仲改埋個洋名既大叔John。在轉機時認識他，是有學識的中產，到德黑蘭機場時仲有司機接。John大叔佢不斷提我伊朗好危險，一個女仔唔好單獨去伊朗，我有時諗或者佢認識既伊朗停留咗係佢離開既時候罷了。好記得John因為飛機餐上疑似有豬肉火腿而大發雷霆，連連向我說：成機都係伊朗人，點可以有豬肉?!當時在坐佢隔離的我，只覺得佢overact，或者其實佢真係好關心呢個地方。

講到移民，亦都有舉家移民到鄰近地方土耳其，在網上教波斯文的英語教師，她除了關心我的波斯文怎樣，也會問我香港的情況。

第二種人，係住在伊朗既知識份子。有在長途巴士站中認識的帥氣教授，他是難得在荒蕪小鎮講得一口溫柔流利的英文，還向我展示他工幹外遊的相片，他愛探索世界，但也很愛留在伊朗。他說愛美國人，但不愛美國。他提醒我，要將「人民」和「手握大權的人」分開看待，他似在亂世中和政治不遠不近的生活著。

第三種人，是很難遇到卻真實地存在著的「反對派」，最深刻是在山城認識既侍應大哥，那年雨傘之後，那時唯一一個會主動找我討論香港社運的伊朗人。還有在某些日子在telegram報平安， ig成日被hack又開返的人。

第四種人，是一直爭取機會去外國讀書的年輕人或為子女爭取出國的父母，普遍會去印度等東南亞地區，但亦都有些家境比較好的會去加拿大、英國等地（亦有去日本讀書）。他們當中很多都希望藉著到海外讀書，再在當地找工作。雖說大都家境較好，但記得有次回到伊朗，而剛好朋友不在，寄住在她家時，看到年邁的父母很節儉，為要省錢供女兒讀書，才深深體會伊朗父母希望子女出國既堅持和付出。

以上四種人，佢哋都有一個共通點，都好渴望同人傾吓「伊朗」到底在發生甚麼，有啲仲似係急住想將伊朗既歷史一一話你知。

第五種人，就是十令歲年輕人。他們不認識亦不想認識facebook/youtube，還跟我說覺得政府好，伊朗好好，出夜街好安全，仲問我係香港12點後出街係咪好危險（當時我真係唔識答）。對住呢種人，相處了一段日子，得到他們信任後，我還是會嘗試說說我知的一些些，好想他們思考多一些些。

***
好耐無返伊朗，反而更喜歡伊朗，好珍惜每一個我認識既伊朗人。

談不上預言
其實可能好多地方都係咁

無論你係邊一種人，記得要好好做香港人😊