2020 嘆《嘆息橋》- 有時人生好似一個陀羅咁，不斷原地自轉

人生苦短，已經發生嘅事情，明知過幾日會發生嘅事情，唔使睇實新聞，其實你同我都會知道劇情嘅發展會係點。既然我哋場戲暫時完左，要等美國放完假先有新一集，不如喺屋企煲吓劇，做吓港豬，做啲自己控制得到嘅仲好啦！

ViuTV 而家播緊嘅《嘆息橋》，我會用過「嘆」字嚟形容。呢套劇，無精神唔好睇，覆緊 WhatsApp 都唔方便睇，因為睇呢套愛情小品，係要記劇情同埋留意聲音外嘅細節嘅。

老實講，呢套《嘆息橋》，我睇咗兩個禮拜，基本上劇情都無乜推進過，佢好似一個陀羅咁，不斷原地自轉。不過咁樣又唔可以叫做悶，佢只係想用另一個手法去講故仔啫！

愛情小品，故事當然可以拍得美麗動人，不過喺真實世界，咪又係來來去去都差唔多？換畫、重新嚟過，甚至跌入三角戀，好多時並唔喺因為呢個同嗰個有幾唔同，更多係自己點樣去睇呢件事。《嘆息橋》好睇嘅地方，在於佢每一集都會從一個角色出發，從佢嘅視點去睇成件事。基於人都係鍾意隱惡揚善，每一個人睇同一件事，細節都會有少少唔同，好嘢就因為我，衰嘢就一定我至係受害者！

因為我知道我自己想點，所以我以為你知我想點。因為我覺得咁樣對你係好，所以我就係咁樣處理你。因為我唔知點搞好，所以我會行開等件事自己變好。呢個唔係一個高潮起伏，蕩氣迴腸嘅愛情故事，呢個只係一個對於我哋平時日常生活嘅素描，真實得令我哋覺得自己係其中一個。

當你可以好細緻去睇成件事，從每個人角度去了解佢哋想點，你會發現，原來成件事都係「多乜餘」，無嘢搵嘢嚟搞。不過人生就係咁㗎啦，大家都只係顧自己，又無好似《綠豆》甘有個旁白話你知其他人其實做緊乜又想點。結果，搞完一大輪先發現，可能 The Best has Come Long Ago。

成套戲睇咗 11 集，Kevin 仔係當中最細個，但又竟然係最清楚自己做乜嘅角色。人就係咁㗎啦，人越大，經驗越多，越係諗得多，又會怕輸怕無面。只有覺得自己「嗰頭近」，時日無多嘅人，先敢勇於面對真實嘅自己，用平常心去睇呢個世界。人生苦短，有時唔一定係鬥老先叫成熟，無包袱反而會令人心水仲清一啲！

其實，月月新鮮鑊鑊金，睇番自己，我哋套戲都播咗 11 個月喇，劇情又無乜點樣推進過。突然間有個主角「爆肚」，又加入咗一堆新角色，個陀羅終於都轉完，劇情迎嚟突破性嘅發展！

好唔好？唔知架！不過至少我哋都叫做求仁得仁，「攬炒」成功，雖然而家先發現咁樣真係好 X 痛！不過，更加傷可能只係因為，明明係我想同佢分手，而家掉轉頭佢同全世界講佢唔要我，仲一腳踢我出門口。好瘀囉！

不過算啦，老咗睇番，可能咁樣灑脫啲分手，分得清清楚楚，對大家都好呢！仲有無下次，唔知㗎！不過，我信 The Best is Yet to Come！

有興趣睇落去，一定要買定花生，坐定定專心睇我哋呢套《嘆息橋》。踏入結局篇，應該會更好睇，有更多出人意表嘅結果！