人類為咗懶可以去到幾盡
是咁的。
因為我太懶，又好冇時間，所以去搵吓有咩方法可以好懶咁打字。試咗好多方法，終於畀我搵到呢一個比較好用嘅外掛：Voice in。
裝咗之後，真係可以我講咩就有咩字。而家呢一篇文，都係用呢個外掛寫出嚟嘅。咁當然佢嘅準確度大約係九成多啲左右，要自己再執執佢，不過絕對係可以廣東話輸入。
可能大家都知道，喺盤古初開嘅年代，就已經有好多語音輸入方法㗎啦，咁我後知後覺吖嘛，同埋以前唔覺得需要語音輸入，覺得識打字快到識飛就好巴閉（但係我未識飛）。不過最近，真係覺得人係懶惰嘅生物，為咗增加效率，咁咪去學人搵吓語音輸入囉。原來真係有咁多㗎，例如最近Facebook就不斷有個廣告，宣傳可以解讀得到譚仔話嘅mouse，又或者Microsoft Word本身都有個類似嘅語音輸入。不過Microsoft Word好似只係支援國語，叫我講國語打字？唔好啦…安西教練，我想講廣東話！
我嘅配置只係一個可以傾電話嘅headphone，係咁多。用法都好簡單，喺個外掛嗰啲說明頁面都寫晒出嚟。係咁我就講少少我嘅使用心得：
＜１＞
記得要喺選項度揀廣東話，咁就可以輕鬆咁用廣東話輸入。既然係用廣東話咁打出嚟嘅字，當然係廣東話對應嘅粵音字啦，口字邊嘅字大部份都出到，呢一層又唔使擔心。
＜２＞
你嘅發音最好係準嘅。例如啲「港」「講」「廣」呢啲發音好似嘅字，就唔好黐埋一齊講，如果唔係真係分唔清楚㗎。
＜３＞
你唔好咁天才講急口令出嚟，會玩死個ＡＩ。
＜４＞
我本人家族雖然係姓譚，但係仲未練成譚仔話，所以不能測試究竟譚仔話得唔得。如果你去開譚仔咁啱又用緊呢個外掛，可以去測試吓譚仔話有幾準。
＜５＞
喺選項度，揀咗廣東話嘅話，就真係淨係辨認到廣東話語音。
間唔中講一兩個英文，個ＡＩ會自動根據前文後理分析你係咪講緊一個英文字。
如果講大量英文都好容易變咗奇怪嘅字，咁用返個keyboard打英文都ok嘅。呢句有少少英文嘅一句句子，就係全語音講出嚟嘅。
我又手痕試過揀咗廣東話，然後講日文，只係出到羅馬字拼音。如果打日文，我諗我都係用返google輸入法。
＜６＞
佢個ＡＩ幾奇怪㗎，就咁講一粒字，未必會出到你想要嘅字，如果想準啲，成句講就會好啲，因為個ＡＩ會自己調教有可能出現嘅組合。你睇住自己講嘅嘢，啲字會係咁變嚟變去，玩玩下又幾好玩㗎。唔知我講咩嘅話，可以自己試吓㗎。
＜７＞
呢個ＡＩ有個功能，對我哋呢啲平時有啲爛口嘅人嚟講，都幾仆*㗎。
嗱，你見到個仆字後面有個「＊」號，就係個ＡＩ自己過濾嘅，即係話個ＡＩ係會過濾咗粗口，我試過講晒好多粗口都變晒星星。
例如：（以下係語音輸入直接顯示）
*你老母
頂***
冚**
含撚呀！咦，含撚出到喎。
你個柒頭（變咗你個插頭）
得閒玩吓又幾過癮。
咁當然，「林鄭你快啲去死」呢句係出到嘅。
＜８＞
講嘢唔好咁快。
呢個係同自己講嘅。因為我嘅語速係快過普通人，即係可以去老麥唸急口令，然後贏個漢堡包嗰種。
講嘢太快嘅話，個ＡＩ聽唔到你講乜嘢，漏咗幾隻字唯有要講過囉。呢個外掛訓練可以練到我講嘢慢啲。不過，唔知幾時會玩厭。
＜９＞
呢個ＡＩ只係支援網上使用，offline就用唔到。
咁所以可以喺一啲網上打文嘅工具度用，例如Medium、Google word，或者我鍾意用呢一個：台灣嘅Plurk Paste。
正到喊。打完文輕鬆執一執就可以用到篇文。
<１０>
呢個外掛有個好蠢嘅地方，就係對應唔到標點符號。
如果你講逗號，真係出「逗號」兩個字畀你；講句號兩字，就真係出個「句號」。
咁用英文講標點符號呢？要逐個字逐個字講，例如講「Comma」係出到個半型嘅逗號「,」，仲有問號感歎號「????!!!!」等等都係半形字嚟嘅。
好似我呢種全形字強迫症病患者，都係手動打標點符號啦。一邊用口講嘢一邊用手執稿，可能會成為我將來嘅工作模式都唔定，不過前題都係我未玩厭呢個外掛。同埋，我係習慣一路打稿，一路聽歌嘅。
<１１>
啱啱試緊食住嘢嚟講嘢，佢都好似聽到我講咩，明明食住嘢都幾口齒不清。
＜１２＞
如果你喺office呢，用呢個外掛嘅時候要make sure你身邊嘅人唔介意你係咁講嘢囉，同埋你要預咗會畀人知道你究竟係唔係真係做緊嘢，定係同人whatsapp或者TG緊。總之係office做嘢嘅你，自己執生啦。
Ｗork from home嘅朋友，只要唔好嘈住阿媽睇粵語長片或者睇大戲，咁就唔係問題。反而擔心阿媽播粵語長片或者大戲，會嘈到影響語音輸入仲好啦。
都係嗰句，如果內容關私人事，就唔好咁懶喇，打字啦。
＜小總結＞
香港人有句成日講嘅說話，好代表到香港人嘅性格，就係「手停口停」。即係對手停低咗就冇飯食，而家唔同喇，而家隻手停低都可以用口做嘢，仲有飯食㖭，好嘢。
今次試咗講嘢打文，下次試吓講嘢同步打字幕先。
而家呢篇文，係我食兩粒粉果期間講完出嚟㗎（咁當然我食嘢係好慢嘅），就代表咗講嘢打字究竟係幾快，其實我打字唔算慢㗎，把口就梗係快過對手啦。
講咗咁耐，究竟呢個懶人打字嘅外掛，會唔會令我寫多啲文章呢？
講呢啲。
＊文章由個人Medium平台轉過嚟，歡迎過嚟～