人類為咗懶可以去到幾盡
是咁的。
因為我太懶,又好冇時間,所以去搵吓有咩方法可以好懶咁打字。試咗好多方法,終於畀我搵到呢一個比較好用嘅外掛:Voice in。
裝咗之後,真係可以我講咩就有咩字。而家呢一篇文,都係用呢個外掛寫出嚟嘅。咁當然佢嘅準確度大約係九成多啲左右,要自己再執執佢,不過絕對係可以廣東話輸入。
可能大家都知道,喺盤古初開嘅年代,就已經有好多語音輸入方法㗎啦,咁我後知後覺吖嘛,同埋以前唔覺得需要語音輸入,覺得識打字快到識飛就好巴閉(但係我未識飛)。不過最近,真係覺得人係懶惰嘅生物,為咗增加效率,咁咪去學人搵吓語音輸入囉。原來真係有咁多㗎,例如最近Facebook就不斷有個廣告,宣傳可以解讀得到譚仔話嘅mouse,又或者Microsoft Word本身都有個類似嘅語音輸入。不過Microsoft Word好似只係支援國語,叫我講國語打字?唔好啦…安西教練,我想講廣東話!
![](https://assets.matters.news/embed/bf243e49-6ea5-4b98-8f95-135094617786.jpeg)
我嘅配置只係一個可以傾電話嘅headphone,係咁多。用法都好簡單,喺個外掛嗰啲說明頁面都寫晒出嚟。係咁我就講少少我嘅使用心得:
<1>
記得要喺選項度揀廣東話,咁就可以輕鬆咁用廣東話輸入。既然係用廣東話咁打出嚟嘅字,當然係廣東話對應嘅粵音字啦,口字邊嘅字大部份都出到,呢一層又唔使擔心。
<2>
你嘅發音最好係準嘅。例如啲「港」「講」「廣」呢啲發音好似嘅字,就唔好黐埋一齊講,如果唔係真係分唔清楚㗎。
<3>
你唔好咁天才講急口令出嚟,會玩死個AI。
<4>
我本人家族雖然係姓譚,但係仲未練成譚仔話,所以不能測試究竟譚仔話得唔得。如果你去開譚仔咁啱又用緊呢個外掛,可以去測試吓譚仔話有幾準。
![](https://assets.matters.news/embed/417e11c6-709c-421d-abad-405509f29c6c.png)
<5>
喺選項度,揀咗廣東話嘅話,就真係淨係辨認到廣東話語音。
間唔中講一兩個英文,個AI會自動根據前文後理分析你係咪講緊一個英文字。
如果講大量英文都好容易變咗奇怪嘅字,咁用返個keyboard打英文都ok嘅。呢句有少少英文嘅一句句子,就係全語音講出嚟嘅。
我又手痕試過揀咗廣東話,然後講日文,只係出到羅馬字拼音。如果打日文,我諗我都係用返google輸入法。
<6>
佢個AI幾奇怪㗎,就咁講一粒字,未必會出到你想要嘅字,如果想準啲,成句講就會好啲,因為個AI會自己調教有可能出現嘅組合。你睇住自己講嘅嘢,啲字會係咁變嚟變去,玩玩下又幾好玩㗎。唔知我講咩嘅話,可以自己試吓㗎。
<7>
呢個AI有個功能,對我哋呢啲平時有啲爛口嘅人嚟講,都幾仆*㗎。
嗱,你見到個仆字後面有個「*」號,就係個AI自己過濾嘅,即係話個AI係會過濾咗粗口,我試過講晒好多粗口都變晒星星。
例如:(以下係語音輸入直接顯示)
*你老母
頂***
冚**
含撚呀!咦,含撚出到喎。
你個柒頭(變咗你個插頭)
得閒玩吓又幾過癮。
咁當然,「林鄭你快啲去死」呢句係出到嘅。
![](https://assets.matters.news/embed/8e9af707-fd92-44b1-87a8-90fd29f3462e.jpeg)
<8>
講嘢唔好咁快。
呢個係同自己講嘅。因為我嘅語速係快過普通人,即係可以去老麥唸急口令,然後贏個漢堡包嗰種。
講嘢太快嘅話,個AI聽唔到你講乜嘢,漏咗幾隻字唯有要講過囉。呢個外掛訓練可以練到我講嘢慢啲。不過,唔知幾時會玩厭。
<9>
呢個AI只係支援網上使用,offline就用唔到。
咁所以可以喺一啲網上打文嘅工具度用,例如Medium、Google word,或者我鍾意用呢一個:台灣嘅Plurk Paste。
正到喊。打完文輕鬆執一執就可以用到篇文。
![](https://assets.matters.news/embed/550f04d7-a81b-42d2-a1cf-4c6a26de94b0.png)
<10>
呢個外掛有個好蠢嘅地方,就係對應唔到標點符號。
如果你講逗號,真係出「逗號」兩個字畀你;講句號兩字,就真係出個「句號」。
咁用英文講標點符號呢?要逐個字逐個字講,例如講「Comma」係出到個半型嘅逗號「,」,仲有問號感歎號「????!!!!」等等都係半形字嚟嘅。
好似我呢種全形字強迫症病患者,都係手動打標點符號啦。一邊用口講嘢一邊用手執稿,可能會成為我將來嘅工作模式都唔定,不過前題都係我未玩厭呢個外掛。同埋,我係習慣一路打稿,一路聽歌嘅。
<11>
啱啱試緊食住嘢嚟講嘢,佢都好似聽到我講咩,明明食住嘢都幾口齒不清。
<12>
如果你喺office呢,用呢個外掛嘅時候要make sure你身邊嘅人唔介意你係咁講嘢囉,同埋你要預咗會畀人知道你究竟係唔係真係做緊嘢,定係同人whatsapp或者TG緊。總之係office做嘢嘅你,自己執生啦。
Work from home嘅朋友,只要唔好嘈住阿媽睇粵語長片或者睇大戲,咁就唔係問題。反而擔心阿媽播粵語長片或者大戲,會嘈到影響語音輸入仲好啦。
都係嗰句,如果內容關私人事,就唔好咁懶喇,打字啦。
<小總結>
香港人有句成日講嘅說話,好代表到香港人嘅性格,就係「手停口停」。即係對手停低咗就冇飯食,而家唔同喇,而家隻手停低都可以用口做嘢,仲有飯食㖭,好嘢。
今次試咗講嘢打文,下次試吓講嘢同步打字幕先。
而家呢篇文,係我食兩粒粉果期間講完出嚟㗎(咁當然我食嘢係好慢嘅),就代表咗講嘢打字究竟係幾快,其實我打字唔算慢㗎,把口就梗係快過對手啦。
講咗咁耐,究竟呢個懶人打字嘅外掛,會唔會令我寫多啲文章呢?
講呢啲。
![](https://assets.matters.news/embed/2c14e045-3730-4170-8922-f18abcb40429.jpeg)
*文章由個人Medium平台轉過嚟,歡迎過嚟~
喜欢我的作品吗?别忘了给予支持与赞赏,让我知道在创作的路上有你陪伴,一起延续这份热忱!