四個不隨意肌反應

https://www.thestandnews.com/politics/爭選委新制度下選民少競爭低-曾國衞不是小圈子選舉不應一味追求人多?fbclid=IwAR13wwi-PZpAzLemeQj1B7VI0w0j3x6_GjqyP_vPHmCyEBZYxk-18C4uyHM

睇完報道，除咗十個趣之外，我個腦叫我幫佢表達佢四個不隨意肌反應：

∘ 𐄙即時反應

∘ 𐄚反芻之後

∘ 𐄛「小圈子」定義為何？

∘ 𐄜最後

𐄙即時反應

為選民唔夠 8000 人嘅一個公共活動而部署 6000 警力？！Self explanatory，不卻多說。介紹返一個成語：杯弓，就梗係有蛇影啦。我希望自己冇錯誤理解乜嘢係警力。

𐄚反芻之後

反芻第一個反應後，有啲想嘔，都話反芻咯。寄語曾生要好好記低自己講過乜，隔唔知幾耐可能會有人挖返你出嚟鞭。鞭屍重現人間經已一段時日。

「唔係一味追求人數多或者競爭激烈」，只要能實現愛國者治港，可以對香港未來有幫助，「先係適合香港嘅優質民主制度」。

364 個議席、8000 名選民。全港就只係得咁多人「實現」愛國愛港？「體驗」嘅 no stake？咁選到乜人之後搞乜政策乜國法都唔關幾百萬實現唔到愛國愛港嘅港人啦係咪？又即係話我呢啲被唔知咩條件因素篩走咗而冇得投票嘅港人唔愛港？片面又膚淺，淺過王獻之畀人話佢管中窺豹，時見一班。我話我自己呀。大書法家都 EQ 唔夠高，唔夠靜心，惱羞成怒就拂袖而去。畀著係我就多一事不如小一便算了。

𐄛「小圈子」定義為何？

搞咁耐兜咁耐圈先至返到主題，認真諗下點樣至算係「小圈子」。吖都幾出口術㗎噃佢，人數多寡又真係唔太重要嘅，人數比例先係重要得多嘛，除非唔係。

想請教一下曾生，選舉當中選民人數嘅多寡係唔重要到咩程度先至唔算係「一味追求」呢？是咪似疫苗副作用測試一樣咁，sample size 有幾細嘅比例都唔影響結果嘅準確性？

真誠送上達明八十年代嘅《繼續追尋》，記得留意歌詞。呢條 link 唔係原唱，而係今年畀政府臨時取消咗 booking 嘅《龔靜儀讀者會》喺四年前舉辦嘅《經典名曲會知音》裡面嘅表演。

定係其實佢好深層次暗指有時啲嘢一追再追追得到追唔到未必好可能生壞肚跟住橫掂有得食就索性擘大個口唔使繼續追求？

呢種價值觀普唔普世我唔敢講，話晒我都係個離譜嘅人。不過原來一件事做到又有共識又夠準確，又合情合理合埋合尺，其實唔難。

我最鍾意做埋晒啲無謂嘅推論，嗱嚟啦喎。即係有外遇嘅男人無錯啦，咁。老公同小三企埋同一邊，二比一，糟糠輸晒。要是老公重有啲良心，同大婆企埋一邊批鬥小三，小三個竇拆得。個男人計落總唔會話有大婆二奶同一陣線指住自己呱。不過劇情總係起承到你唔知幾時會轉合。

𐄜最後

唔知係受隨意肌抑或不隨意肌嘅主導，我個口好自然咁講咗一個廣東音。粗口嚟。