我的創作之路

首先係開始之前，請容許我用少少篇幅特別感謝一個人。雖然我係Matters 上面遇見好多人，亦都希望有機會多謝大家一直都支持我，例如：@志工爺爺 、@閱讀筆耕 、@Sunline 等等（人數太多，不能盡錄，不過當然係係多謝各位支持）。但係相比起以上各位，我更加想特別多謝一個人，就係推我入坑嘅 @阿唯。 阿唯，如果唔係你當初係Facebook定唔知係邊度講話創作可以換成加密貨幣，令到創作有價值，我絕對唔會加入創作呢一個行列。我雖然到依家都仲係一個無乜人識嘅人，但係如果唔係你當初介紹 Matters、Medium同Likecoin，我絕對唔會認識呢一類創作平台同加密貨幣嘅關係，甚至更加唔會有機會係呢度認識到大家。所以真係好多謝你，請容許我依家先用文字上講一聲多謝。5月28、29號，如果RG成功舉辦，請容許我到時親口同你講聲多謝，因為你帶俾我嘅獲益絕對唔係可以用文字上表達，真係好多謝你。請原諒我係一個唔識得點樣表達多謝嘅人，但係我係發自內心衷心感謝你。請容許我誇張啲咁講，如果唔係你嘅介紹，絕對唔會有今日嘅成就，多謝。 

其實對於我自己來講，究竟咩係創作？其實創作同作文我覺得最大嘅分別係：創作我係可以對於我自己有興趣嘅題材發揮；而作文比我嘅感覺就係為了交功課同考試而作文。回想DSE，雖然我中文卷五寫作同卷五綜合能力都有最高級嘅5**（呀係，我仲係考五份卷嘅年代，大約可以估到我幾多歲），但係現實就係，如果你要我坐定定揸支筆寫幾千字嘅文章，我絕對無興趣，雖然我平均一個鐘可以寫到千二至千五字左右，但係始終如果要為考試而作文，咁樣都只係迫於無奈嘅選擇。但係依家來講，創作對我完全係截然不同嘅事。既沒有古板乏味嘅評分制度，亦都唔需要同人鬥快，我可以對自己有興趣嘅題目進行唔同嘅創作同見解，絕對係一件開心好多嘅事，所以創作對我來講係一件我可以對自己鍾意嘅事情暢所欲談嘅事。

其實係最初嘅時候，我係 Matters同Medium兩個平台都有用，不過依家就全力集中係Matters上面，Medium基本上就已經係一個放棄狀態，甚至乎有衝動想剷除帳戶。其實我會主力使用Matters嘅原因其實好簡單，就係相比起Medium，Matters最少比我感覺到係有人同你互動，而唔係好似Medium咁樣又無人Like，又無人回覆，同寫比空氣睇無分別。雖然曾經聽人講過，Medium只有好少中文創作者使用，但因為相對上競爭比較少，所以較容易吸引的人閱讀。但係對於我呢種完全無人認識嘅人來講，唔好話吸引讀者，連有無人睇過都唔知，所以之後我就正式全面轉投 Matters 嘅懷抱。雖然好笑嘅係我依家係 Matters 都仲係一個唔起眼嘅作者，但係相比起Medium，起碼係呢度我認識到唔同嘅創作者，甚至乎可以有好多唔同類型嘅互動，更有不同機會參與唔同嘅活動，除了令到我獲益良多，而且也可以認識到世界各地唔同嘅朋友，起碼比我自己知道我付出嘅努力係有人睇到，而唔係寫比空氣睇。

唔知大家有無發現，雖然我一直都將動畫放係自我介紹嘅第一位，但係有無發現已經逐漸變成每月一篇，唔係大家細個時候熟悉嘅每日一篇，係真係每月一篇。其實雖然我自己喜歡動漫，要我寫唔同作品嘅評論我絕對係樂於其中，但係畢竟我始終都要向現實低頭。正如我一直都係度講，ACG呢一種文化其實已經開始逐漸融入大眾嘅生活，甚至乎開始越來越多人接受，但係大眾嘅認識可能只有大熱嘅作品，例如《鬼滅之刃》、《進擊之巨人》等等，相比起每一季4、50套嘅作品來講，絕對只係冰山一角；但係大眾往往對於其他作品一聞不曉，甚至乎可能覺得一年剩係得一、兩套作品。但係對於我自己來講，對於上面呢一種極度大熱嘅作品，我絕對係唔鍾意。唔係話我唔鍾意呢種作品，只係題材完全唔啱我，我更加鍾意可愛嘅萌妹子，例如「芳文社」、「主婦與生活社」出品等等。但現實嘅遺憾就係，如果唔係呢一類大熱嘅作品，觀看嘅人數絕對係小眾，甚至乎可能只有真愛嘅人會留意唔同嘅作品，更何況我呢種寫評論嘅人？觀看嘅人數只會少之有少。但係即使係咁，我相信創作係自由嘅，就算只係好少人會睇呢一類嘅文章，那怕只係一個都好，只要有一個人透過唔同人嘅評論，從而睇多一套唔同嘅作品，其實已經係對整個產業最大嘅支持。始終現實就係周邊商品嘅銷量往往決定一切，多一個人買周邊產品，對整個行業絕對係一件好事。近年來雖然呢個市場擴大了，但係始終一季有成4、50套作品，基本上我都唔會選擇全部睇晒，所以我諗我淨係會揀自己有興趣嘅睇，當然啦如果真係有興趣嘅，那怕無人睇都好，我都係會繼續創作唔同嘅動畫評論。

另外一樣我每半年左右會講一次嘅就係F1，我相信大部份人都應該有個疑問，點解咁多體育賽事唔講，偏偏要講咁小眾嘅F1？我諗呢個都係屬於一個我自己嘅問題，因為如果你要我坐定定睇一場最少90分鐘嘅足球比賽或者籃球比賽，我係絕對頂唔順，我可能睇完開波頭1、2分鐘左右就會轉台或者熄電視。又或者咁講，我對球類運動嘅認識少之又少，例如對我來講，我覺得英格蘭超級聯賽係福岡軟件銀行鷹對皇家馬德里？種種原因亦都導致我對呢種世界上最多人欣賞嘅體育賽事無興趣。但係唔知點解，由細細個開始，我對於充滿噪音嘅F1同埋MotoGP產生濃厚嘅興趣（需要知道以前嘅F1同MotoGP製造嘅噪音相比現在係大聲唔知幾多倍），加上可能因為細個鍾意睇撞車片段？我知道咁樣講好衰，但係以前細個真係唔識野，所以自細就對汽車運動產生濃厚興趣。大個之後，而且網絡急速發展，令到我接觸唔同汽車運動嘅資訊大幅增加，但係始終令到我念念不忘嘅都仲係F1同MotoGP，所以亦都開始主動瀏覽唔同嘅資訊。我絕對唔會稱自己係達人，只係覺得既然無人在 Matters 上面介紹汽車運動，咁不如就等我做。因為始終我自己覺得，汽車運動都係運動嘅一種，但係點解唔可以好似足球或者籃球運動咁樣咁多人接納。不過遺憾嘅係，華文地區專門對於汽車運動嘅報道或者評述人員少之又少，可能比稀有生物更加稀有，所以我希望可以透過我唔同嘅介紹，令到更多人可以留意呢一項支出同廣告費可以媲美甚至乎超越足球同籃球嘅比賽項目。

大家見到我每篇文章都咁多字，可能好多人都以為我係一個好勤力嘅人。但係大家千祈唔好誤會，我真係唔係一個好勤力嘅人。正如我係上面咁講，雖然我絕對唔係討厭創作，但係絕對唔會得上極度鍾意創作。我對文字絕對稱唔唔極度喜歡，但可能因為我性格問題，我唔係咁叻用語言表達自己任何感受，但係相反地我係鍾意用文字表達自己，所以可能亦都係導致到點解我會開始創作嘅原因。係已經結束舉辦嘅CP同人祭，當中每年嘅口號其實真係一句好好嘅句子：由業餘到專業之路，守護創作種子，由同人愛出發。我自己亦都曾經有創作過同人本子，雖然總支出唔係好多錢，甚至乎大部分本子都仲係在我屋企封塵中，但係其實我真係好享受成個創作過程。雖然已經係隔咗好多年嘅事，但係我仍然好記得第一位購買我創作嘅本子嘅人，甚至乎當晚係Facebook某一個post 竟然可以見到有人介紹我自己創作嘅本了，果一刻我見到自己嘅努力得到別人認同，我記得睇到嘅時候我同朋友食緊飯，果一刻我真係即刻喊咗出黎。可能亦都係因為果一刻嘅感動，令到我自己內心對於創作嘅呢粒種子慢慢發芽，或者唔係當初嘅感動，就唔會有今日嘅我。不過回歸現實，目前以我嘅人氣或者各方面，每一篇文章唔好話買個午餐食，甚至乎去無良印品買支筆都唔夠，但係又如何？那怕只係一個Like都好，起碼都比我知道我嘅努力係有人欣賞，而唔係寫比空氣睇。正如阿唯咁講，唔理一個Like定一千個Like都好，每一個創作都有屬於自己嘅價值。

呢個禮拜唔經唔覺出咗三篇文章，真係覺得自己應該係痴咗條筋，我個肝都開始罷工，希望下星期六見啦，如果我個肝好返嘅話。臨走之前，衷心希望你可以係下面拍5下手，作為繼續支持我嘅原動力，多謝。