保費融資ABC

保費融資以前多數係啲投資銀行或者私人銀行嘅產品。

簡單來講，如果一張正常嘅儲蓄或者係萬用保單，有3-4%，銀行接受保單做抵押，提供1-2%貸款利率，咁就真係有啲似買樓。

買張4,000,000保單可能就需要放低1,000,000首期就可以，其餘3,000,000貸款利息，可以用紅利賺返嚟，令到年回報可以上升到8至10%。

其中一個比較大嘅問題係現金流，因為銀行借款利息每年償還，但係保單紅利唔係馬上可以套現。所以需要每年另外準備現金償還利息，現在市面有一些銀行可以每年幫你再「加按」，用加按償還保單融資當年嘅利息。

第二個問題，保單就算標榜年回報有3-4厘，但係通常都要三四年，現金值才可以等回當初購買嘅總值，所以如果最初幾年，急於套現嘅時候，就需要賠錢離場。

第三，銀行貸款利息通常，應該話一定係浮息，如果加息周期，尤其是保費融資通常都需要五年以上才可以見到比較可觀嘅回報，就需要冒一個風險。

萬一利息向上，收益可能馬上大打折扣。