讀劉保禧〈超譯《尚氣》〉後感

（於二〇二二年五月二十八日修訂）

呢篇《尚氣》影評正啊～

超譯《尚氣》 |好青年荼毒室-哲學部
《尚氣》不是辱華，而是 against the Chinese diaspora。直接點說，這是一套敘述 Overseas Chinese 如何抵抗 Mainland China 的電影。…corrupttheyouth.net

唐係一個亞洲帝國，喺東亞崛起，最強大時，勢力遠達今日阿富汗。為咗擺平國內唔同人種嘅衝突，將「中華」重新定義為一種「文化」，只要歸化「中華」，就大家都係「華人」或「唐人」[1]。

「漢」本指銀河，亦同巴蜀有關；劉邦先取關中咸陽，欲稱王[2]，楚霸王項羽為壓制劉邦，封佢為「漢王」，有巴、蜀、漢中之地，都南鄭，因「巴、蜀道險，秦之遷人皆居蜀」、「巴、蜀亦關中地也」；到劉邦擊敗項羽，建立皇朝，「漢」一直沿用，變成前後漢兩皇朝嘅指稱，呢個時期「漢人」中嘅「漢」亦係同一意思。到南北朝「漢人」先開始作為貶義詞噉用[3]。

唐人偶有自稱「漢人」，盡搜《全唐詩》得下面三例（按：「唐人」十例）：

唐（安史之亂後）姚合〈送少府田中丞入西蕃〉

風沙去國遠，雨雪換衣頻
若問涼州事，涼州多漢人

晚唐雍陶〈哀蜀人為南蠻[4]俘虜五章。過大渡河蠻使許之泣望鄉國〉

大渡河邊蠻亦愁，漢人將渡盡回頭
此中剩寄思鄉淚，南去應無水北流

及唐末司空圖〈河湟有感〉

一自蕭關起戰塵，河湟隔斷異鄉春
漢兒盡作胡兒語，卻向城頭罵漢人

「中華文化」其實無太多好確定嘅原素，一直隨時間改變，到今日火星時代，唯一一直無變嘅就只有漢字。今日有一班人鼓吹著「漢服」[5]，但「漢服」可唔可以著住上火星？夏天著住會唔會中暑？女性又會唔會扎腳？到底「漢服」嘅「漢」係指幾時？邊類人？包括咩文化？咩場合幾時著？係唔係要等到炒車先一一定義清楚？

「中華文化」由第一日開始已經係一個統戰工具，呢個初衷一直維持到今日。無論「中華文化」幾咁無內容，幾咁任人天馬行空去詮譯定義，佢始終係亞洲人嘅一個緊箍咒，正如《尚氣》導演搵身分認同搵到去大羅一樣。

2012年前，香港作為中西橋樑，香港人身處其中，一直同呢個緊箍咒周旋，香港既被錢穆譏為「文化沙漠」，亦同時被世界各地人士稱為「東方荷里活」；英治時，香港人有自由喺中西文化作出選擇，又或作出唔同程度嘅中西合璧，但今日面對北風吹襲，香港人嘅出路，除咗遠投他鄉，留低嘅可能係要努力從新定義「中華文化」，創造出相信自由民主人權勇武包容嘅新文化。

1. 唐太宗「華夷一家」論，見宋司馬光《資治通鑑》卷198〈唐紀十四・太宗貞觀二十一年〉：

自古帝王雖平定中夏，不能服戎、狄，朕才不逮古人而過之，自不諭其故⋯⋯自古皆貴中華，賤夷、狄，朕獨愛之如一，故其種落皆依朕如父母。

2. 《史記・高祖本紀》：「趙數請救，懷王乃以宋義為上將軍，項羽為次將，范增為末將，北救趙。令沛公西略地入關。與諸將約，先入定關中者王之。」但〈項羽本紀〉並無記載呢個約定。

3. 〈中華的問題〉，《大唐帝國的遺產》，朴漢濟（박한제）

4. 「南蠻」應指「南詔」，有學者認為「蠻」係自稱。 南詔，彝文典籍稱為瑪史茲（彝文：ꂷꏂꌅ），吐蕃人稱之為姜域（藏文：འཇང་ཡུལ，威利：』jang yul），是8世紀時興起、位於今中国西南部的古國，其國民主要由烏蠻和白蠻組成。另外，雍陶詩中「漢人」疑係「蜀人」代稱，尚需釐清。

5. 「服」：是「𠬝」的後起形聲字，「𠬝」字是制服、降服、屈服等義之初文，甲骨文亦見一人被戈押住跪坐。