病中孩子考驗母愛韌性

老婆有三個大忌：唔守承諾、污糟、俾人屈。而每次個囝病既時候，阿囝都總係可以一次過將老婆三條底線都破壞曬。應承左睇五分鐘電視之後食藥，五分鐘之後當然反口啦⋯⋯有痰唔咳出黎吞返入肚，有鼻水都吸返入去，抹完鼻涕既紙巾唔丢垃圾筒，周圍放，甚至懾係自己床邊枕頭邊⋯⋯覺得咩都係人哋錯，借病發難。自己起身玩到極肚餓時先同人講，講完都冇半分鐘已經瘋狂係咪催，又話人特登唔俾野佢食⋯⋯

上星期二扭親腳有一日病假，

當晚個囝開始燒上40度。其實係好無奈，因為已經預視到之後世界大戰既發生，卻亦只能眼白白咁睇住自己既預視成真。佢哋兩個之間，我實在覺得自己連針都插唔入。不過宜家已經叫做好左，因為我都唔叫完全冇野做到。多左個好中意湊熱鬧既妹妹之後，當大戰開始醖釀時，我既任務就係帶個囡走入房，免得會出現阿哥遷怒阿妹，出手打人，再進一步引爆我或者老婆情緒既事。或者至少幫仲未肯帶口罩既妹妹，避開哥哥既病毒攻擊。

星期三，

外婆咁啱放假黎幫手睇住阿妹，老婆帶阿哥去睇醫生。期間因趕車係樓梯度跣左幾級，左腳拗柴，好彩佢冇腫而且行得到。阿哥都因為被老婆拖住而撞到同擦到隻小腿，老婆覆述當時阿哥既說話：

「我咪講左唔使咁急，慢慢行，如果你無漏低八達通返轉頭拎，我哋搭到個架lift就應該都會趕到架車。」

幾厲害呀，輕描淡寫咁就插你一刀。睇完醫生歸家食藥又出事，老婆send message過黎：「我好無助啊，我無一日有野做得好無野做得岩咁，我唔想再生存啦，我好辛苦啊……我好難過啊」

星期四朝，

老婆都開始發燒唔舒服。我心諗今次實瀨野，果然十一點幾收到老婆電話。一掃過去接聽，馬上係嚎哭既聲音，間中重覆住「可唔可以救下我……我好辛苦……點解應承左人既野又唔做……咁睇醫生做咩……」我完全回應唔到，只能夠係電話隔離聽住。突然，電話收左線，我打開屋企個CAM想望下咩情況，點知廳果部冇開機，只能夠由房果部聽到聲老婆繼續喊緊。

隔左一陣，我再收到老婆電話：「不如你報警告我虐兒……或者你帶走佢……」我知道佢既承受能力已經極限。其實我知道老婆係想我請假返去幫佢，但老實講我今年既年假得返5日，已經買曬機票聖誕去旅行（果度要留3日假），再減去結婚周年紀念，就得返1日。呢珍貴的1日假，真係唔到最後都唔想輕易用的皇牌。

結果我聯絡左教會，講左個情況，佢地話可以幫我睇住個囝幾個鐘。我就趁lunch time飛的返屋企接囝，送去教會，再返公司，等老婆係屋企對少一個先，放工後再去教會接返個囝。期間，教會既傳道人仲幫我成功氹到個囝食左兩次藥。不過佢地都有提醒，如果阿囝每次藥力過左之後都返燒上39、40度，再加佢唔肯食藥既話，想穩陣啲就去醫院度驗吓。

不過我諗，係個囝本身驚醫院既情況下，要帶到佢入去其實都唔容易。屋企同醫院之間又唔係近，強行夾佢我都冇力夾到咁長既距離。加埋阿囝實牙實齒咁應承教會傳道人，返到屋企之後會食藥。所以都係維持一個觀望態度。

接個囝之前，由老婆口中了解吓今朝發生過既對話。老婆話今日佢叫過阿囝走。之後阿囝就回應佢我都唔要再同媽媽住埋一間屋，話媽媽好曳，成日鬧佢，又整痛佢，所以佢唔鍾意媽媽，唔想返呢個屋企，以後唔見都得……

接到個囝之後，我問阿囝返唔返屋企。果然，佢搖頭。再問原因，佢話係媽媽叫佢唔好返呢個屋企，佢驚就算返到去，媽媽都唔俾佢入門口。我問佢，咁如果我開門俾你呢？跟住阿囝就話返屋企，仲話就算媽媽幾惡，佢都鍾意媽媽，會返屋企……

所以佢地兩個都係衝突既當下，衝口而出……

終於捱到星期六，

係我阿爸阿媽幫手湊兩個孫既日子。心諗終於可以休息，點知佢地接走兩個細唔夠一個鐘，阿媽就打黎話整親隻手，湊唔到兩個，叫我接返其中一個先。當我心入面仲抱怨緊既，老婆好敏銳咁覺得件事唔簡單，自己打電話過去再了解，先知係跌到時手腕落地，仲痛到喊，而且跌倒既原因似乎係同個囝有關。馬上吩咐我去接囝或陪阿媽去睇醫生。

結果我去到阿媽度，咁啱個囝開始返燒。就問阿囝，不如一齊同嫲嫲入醫院。入院一check，嫲嫲手腕骨裂，要拉手、駁骨、打石膏。個囝要留院、抽血。兩個都痛到喊。

後尾老婆都黎左醫院，跟住個囝，我就跟住嫲嫲。老婆覆述抽血過程：

「佢要比人五花大綁咁抽血……真係有野綁住，佢喊晒……一開始就要綁，以防佢一郁就大件事……大人都尚且要好大意志，小朋友好明顯未有呢個意志……所以姑娘個啲叫我行去門口到，唔比我睇，我用玻璃睇佢個樣勁驚，我都喊。」

除左「唉…」，我都唔識點樣反應……