IG式攝影美學

呢篇文刊登嘅時候， Clubhouse已經可能式微。我對網絡潮流一向唔係跟得好貼，都係因為機緣巧合之下先係一月尾二月頭下載Clubhouse。起初嘅房間都幾有趣，可以聽到世界各地嘅人就住某啲議題好認真咁交流。有日我無意中參加咗一個「攝影房」。同平時一樣，好多傾攝影嘅人都係講緊相機同技術，間中會講吓攝影作為職業嘅一啲情況，例如婚禮攝影、商業攝影等等。後來先知道原來好多人對攝影創作都好有興趣，只係唔知點樣入手。

有人話佢會睇跟吓啲IG (Instagram)攝影師，睇吓學吓人哋影啲乜。自從IG興起，某程度上都改變緊攝影嘅美學同埋生態。Instagram喺2010年10月上架，直至2021年1月，全球用戶數量已高達1,000,000,000。對攝影嚟講， 2010年係一個有趣嘅年份，因為除咗Instagram之外， 2010年6月正正係iPhone 4嘅誕生，呢兩樣嘢結合完全扭轉咗攝影嘅生態。雖然之前已經有flickr (2004年發怖)，可以比用家分享高像數嘅相片，Facebook亦早已於2004年出現 (整個網絡運動其實要講埋web 2.0先完滿）。但當時喺網絡流通嘅相，仍然以數碼相機生產嘅影像為主。

依家有唔少攝影師都係由IG起家，只要你嘅相片夠吸睛，有時真係可以一炮而紅。但就係因為要夠吸睛，你會發現好多IG嘅相未必好襟睇，好多相會將着焦點放係「一秒衝擊」既視覺經驗，要夠Eyes Candy，要有Visual Impact。另一個問題係你會發現好多相其實好相似。

以下幾款都係喺IG經常出現：

1. 近年有唔少女攝影師鍾意影身體嘅Close Up。相片會帶有少少頹廢感，逆光、朦朧。內容有少少似日本攝影師川內侖子(Rinko Kawauchi），都係關於生命、生死；影像又會有啲蘇菲亞哥普拉(Sofia Coppola）電影《 鎖不住的青春 》（The Virgin Sucides, 1999)嘅感覺，青春、消逝。
2. 另一種係追求絕對工整、對稱，表面上有德國冷面攝影（Deadpan Photography)嘅美學。呢啲相好多時都會影建築物：彩虹邨，海山樓、勵德邨⋯⋯屋邨、學校⋯⋯ 唔少人都會衝去嗰幾個地方影埋的一模一樣既相。
3. 較早期又有嗰種喺郊外拍攝嘅風景相，相片都走「日系」：High Key、低飽和度（low saturation)、冷色調、偏藍。相中嘅人物會影到好細粒，要營造一種乾淨嘅感覺。
4. 有啲相會用Photoshop，重PS，去製造一啲「surreal」嘅情景，帶一啲玩味。
5. Old School一啲，有仿森山大道(Daidō Moriyama)風格：黑白、搖晃、粗微粒、朦朧、對比度高（High Contrast)，內容主要以街拍、Snap Shot為主。
6. 外國就會多一啲似Stock Photo（資料庫)或者Wallpaper(電腦桌面背景）嘅相：高技術，構圖工整，但內容空洞，十年如一日，有一種罐頭式嘅美學。題材通常包括風景、日落、動物、特別係正在獵食嘅動物、萬馬奔騰、賽車、花卉、美女、少數民族..... 重「龍」味，有時會有過份嘅「味精」，重手PS調色。
7. 何藩式嘅黑白相：著重光影，展現幾何線條，唯美。而何藩嗰張Approaching Shadow已經係1954年嘅事。

唔同嘅人根據唔同嘅年齡同性別，會有唔同嘅喜好，不過大家都好似追求緊同一樣嘅美學，網絡上有太多一模一樣嘅相。有時又會聽到啲人講，只要啲相有女有貓就會多Like。雖然啲相多人Like都會開心嘅，但如果影相只係為咗呃Like，其實又冇乜意思呢？

IG當然都有好好嘅攝影師，我覺得喺學習攝影嘅階段，嘗試影吓以上嘅相，知道當中嘅技巧同埋特性，亦無妨。但講到真真正正嘅攝影創作，大家可能要諗吓點樣擺脫人哋嘅影子，或者唔再重複其他人所做過嘅事。你要去搵屬於自己嘅方向，包括自己嘅美學風格，最關心嘅內容、創作嘅方式、對藝術嘅追求，點解要用攝影？究竟真正屬於你自己嘅係乜嘢？

千祈唔好滿足於只係製造一啲視覺衝擊或者製造一啲所謂「靚」嘅相，更加唔好只係顧住追相機追鏡頭追器材，而唔係真係做緊攝影。

買相機係開心嘅，就好似得到新玩具咁。但講到底，相機只不過係攝影嘅工具，我哋用部相機影緊乜嘢？做緊乜喇？點樣影？點解要用呢啲器材？先係最緊要。千祈唔好成為相機嘅奴隸。當然相機同攝影嘅關係好密切，唔同嘅器材會有唔同嘅特性，亦都可以做到唔同嘅嘢。所以我哋更加應該因應我哋想做嘅事而選擇適當嘅工具，而唔係一味追求最新最貴嘅器材。錢輕易買到嘅嘢基本上都冇乜特別意義，亦唔值得炫耀或者自豪。影嘅門檻隨住科技嘅發展已經變得越嚟越低，基本上已經進入一個全民攝影嘅年代，而攝影器材亦都越嚟越平。係呢個情況下，我哋關心嘅更應該係影像嘅生產，同埋影像本身嘅價值。

多的去思考攝影嘅本質及可能性。想進一步認識攝影，其實真係要多睇書、多思考、甚至多的接觸唔同嘅藝術。除咗影相之外，更加要多啲審視自己嘅作品。

有機會下次再講多一的。有任何關於攝影或者藝術嘅嘢亦歡迎發問。

文：葉曉燕 Rachel IP

原文刊登於 《迴響》第九期 (2021.3)
https://resonate.hk/
https://www.facebook.com/ResonateCantonese/
《迴響》係一本屬於香港人嘅粵語文學期刊