四天颱風假齋坐+災情速報的九月下半

圖書館瀰漫一股陳年地拖放進溫泉水慢燉的氣味，那是雨水打濕全身的衫褲鞋襪經過幾小時體溫和冷氣烘烤的現象。幸好圖書館的冷氣不怎麼冷，不然濕透了，肯定感冒。

過去半個月的周末周日持續下雨，以華南的標準，雨其實沒有很大，風卻是三號波等級。幼樹吹倒、樹枝也會吹斷的程度。圖書館的人們多數穿着拖鞋加襪子，我莫明奇妙地對這着配搭產生恐懼。

最近去圖書館去到跟返工一樣，有冷氣又網絡，一半時間在處理工事，一半在娛樂。這邊的圖書館不怕沒有位置，以前去自修室還要排隊。有些人會在便利超商hea足一日，有wifi，有充電，帶一台小筆電，還有洗手間和洗衣機，店員也不會趕人。

10月1 號有假放！颱風山陀兒的震撼

響呢篇排咗出文期間，無啦啦打風，都唔係既，咁天有不測之風雲就梗㗎啦，不過揀咗係一個我最唔想既時間點打風啫。

台灣打風同香港有少少唔同，通常假期前一日公佈，放全日假。致命嘅係，颱風假依勞基法，僱主可不發薪水，即係按比例少緊幾日糧，有啲會連津貼都扣。我計過兩日假就少750HKD，好多，一星期飯錢，11月仲要搬屋，要唸辦法賺返夠先得。而慘在，台灣賺錢機會係少過香港而最賺錢可能係詐騙⋯⋯

台灣邏輯同西方社會唔一樣，算係好傳統漢人文化現代化版本，即係清朝君主立憲成功好可能就會變成咁。例如權力平等呢樣嘢，西方社會認為「揸車係比行人擁有更大殺傷力」，所以駕駛者撞到行人罰則好重，因為你攞住一件武器，撞向武力不平等既行人。

漢文化唔係咁認為，武俠小說都有講啦，飛花摘葉都可以傷人。因此係漢文化潛在會認為，你攞住把雨傘同埋警察攞住支槍，武力係對等的：「喂佢攞把遮隊住我喎！我梗係開槍射鳩佢啦！」（以上為設計對白）

災情速報

颱風假麻煩在依家住既地方，不能煮食、無wifi、無飲水機（台灣不會有人開自來水煮沸飲用及煮食），無娛樂+無食水連煮個麵都唔得。暫租地又漏水，三不五時要拖地，唔敢去太遠。亦都去唔得遠，公車輕軌都停，出東門不顧歸呢。

正當我坐足3日，無乜嘢做，到第4日終於的起心肝想砌下模型之際⋯⋯

間房水浸

事源搬入嚟第三日已經發現間房滲水，係地板浸出嚟。同房東反映，佢叫我忍到9月完咗就無風無雨啦。

點知一個山陀兒打嚟，頭三日還好，到第四日朝早，登陸前兩個鐘開始，噴泉咁噴，拖都拖唔砌。我攞曬全屋可以用既紙皮、毛巾、地拖，都搞唔掂。我不斷拖，又不斷睇個風幾時走。

成朝每隔5分鐘就響一次國家級警佈，手機無震但不斷有message，提醒大家入室內避難——好采我無交通工具根本出唔到去。

到晏晝兩點真係搞唔掂，call房東嚟，房東帶咗佢個印傭一齊出現。佢見到我攞住支地拖就問：「嗯？你拿了我的拖把喔？」

我指一指工人：「這把是我買的，你那支在工人那邊吧？」

「喔那你買了跟我一樣的拖把。」呃⋯⋯我呢支綠色你個支粉紅色喎。

我指比佢睇，水浸之外，窗口式冷氣側邊隻窗爆咗。房東講咗句：「這次喔，風雨太大，纖維板撐不住啦。」

吓？無玻璃㗎？得塊纖維板？

「豪宅窗戶都破掉喔，玻璃沒用啦。」我狂問佢如果隻窗今晚爆開點算？佢扮聽唔到，閃咗。留低我同工人兩個清理。

好彩個工人醒，真係醒。佢見到塊纖維板頂唔住，風又太大，修理不能。即時攞咗個唔要既膠樽，壓扁，一頭頂住塊板，一頭頂住橫樑，用個樽既彈性頂住塊板。

前前後後我地搞咗成個鐘，工人話：「明明拖乾了怎麼又有水。早上隔壁也有滲漏，拖完就沒有了啦。」兩個人兩支地拖+一支掃把，工人再攞咗三條酒店大毛巾墊住窗台邊。總算OK頂得住，我先至落去7-11食個熱狗，順便打卡。

風後一日

打風後第一日，繼續放假。有啲同事返咗公司，本來我都想問，洗唔洗我返去。唸吓唸吓，經已中午。落街行咗個圈影幾張相，食咗幾日7-11 + 全家，終於擺脫。以圖代文，俾大家感受吓。

每周一則城巿故事。突破點對點生活模式。
邁開腳步，劃出舒適的平面。喜歡原地遊的內容，請接續以下方關注更多動向：【 Facebook｜Instagram｜Patreon｜Gunroad｜Pinkoi｜500PX】