做抽水post 而不失禮貌的 4個注意事項

01 抽水題材

抽水嘅題材可以有好多，最快一定係最多人睇嘅

討論區，例如連登，另外就係Facebook群組，你可以加入一啲同你行業相關嘅群組去收到最新資訊，亦可以將你以前睇過嘅電影，例如周星馳電影，唔難引發共鳴嘅圖配字當做題材，相關聯繫你品牌或者產品上。

最重要，最重要係可以引發共鳴！

02 抽水timing及時限

有啲抽水係有時限嘅，例如社會事件，娛樂新聞呢啲梗係越快越好。出完post可以落廣告，不過時長頂多三日。因為呢啲叫即食文化，食多兩日就已經無味了。OUT咗就唔好再講啦～

但有啲抽水可能係關於經典，例如係電影或者一啲經典meme圖，你只需要創作出同品牌商關聯嘅內容，則無時間限制。

03 二次創作或原創

TiK Tok短片都係好題材之一，不過由於香港用唔到，只能用大陸嘅Dou Yin，又唔想做衰本地品牌，所以我都會盡量用返Instagram繁體中文同埋英文。

另外雖然二次創作暫時並未有嚴厲監管，但最好於原著作品上再加入創意，並credit返原作者。

當然所有內容以原創最佳，避免因知識產權而影響品牌形象，或背上法律責任。

04 抽水禁忌

除咗OUT咗唔好講之外，雖然呢啲Post或memes可以喺短時間內獲得關注度，高效益低成本，但所有天災人禍都盡量避免，因為除咗影響品牌形象，仲會落地獄㗎！

唔好成日send啲新聞嚟叫marketer度橋，因為如果諗到佢就應該做咗。唔係所有Brand都可以抽水，仲要下下靚抽，你估咁易呀！

如果你自問冇乜幽默感，何必又要夾硬做吖！