慢活森谷
慢活森谷

|酷愛與自然連結|亦是貓奴|正在適應新的環境文化|讚賞公民

森林之約|乜野係山林療癒陪伴員?(廣東話)

引導體驗者打開五感。喺寺院山林入面,放慢腳步,去接觸自然。俾佢哋安心嘅氣氛同大自然連結,見證佢哋安心嘅感悟

山林

大自然任何安全地方都可以進行森林療癒,尤其係响森林入面。呢度嘅山林係指香港慈山寺,因為佢背靠屏風山同埋八仙嶺,寺方响靠後嘅觀世音菩薩像下面,特別設計咗一條大約三百米長嘅山路--正念徑正念徑種咗好多款土生土長嘅植物,舖上石級,上落唔勁,比安全放心嘅環境尐體驗者去接觸自然。

正念徑

慈山寺嘅感覺係祥和同埋寧靜,行入正念徑會醒一醒神。因為眨吓眼就被山林圍住,回歸自然。你抬高頭望下,又會感受到觀世音菩薩嘅恩沐。

祥和寧靜嘅慈山寺

療癒

大自然係我哋嘅阿媽,佢俾咗能量,食物,水源我哋。同時,其實佢亦都係我哋嘅療癒師,實實在在咁撐我哋,永遠細心聆聽,唔扮野,又唔會吹牛。佢隨傳隨到,等你打開個心嚟同佢傾訴。

森林中嘅氛多精

山林除咗係一位耐心嘅聆聽者,亦都有撐住我哋。行入樹林裡面,有時你會感受到一股清新氣味,好似香草啦,檸檬啦,松樹啦。呢尐都係森林入面嘅氛多精。研究指出氛多精可以放鬆緊張嘅神經系統,等你無咁攰,容易尐瞓著。

樹林入面嘅負離子多過鬧巿好多,無限放題。如果人體內部正離子高過負離子,就會有生物氨,搞到個人好易痛,敏感,蛇𠺌。吸入負離子就可以整理身體狀態,調和我哋嘅自律神經系統,促進新陳代謝同埋細胞呼吸。

你有幾耐無瞓過响草地上面呢?

除了透過抖氣,用手攬住棵樹,赤腳踩住泥土,甚至瞓响草坪上面,都可以令我哋接收地氣。水份佔咗身體嘅七成,簡單嘅活動都幫到我哋平衡身體嘅電荷。

泥土中有母牛分支桿菌,有時落完雨聞到嘅泥土氣味咪就係佢哋囉。這種無毒嘅微生物可以增強身體嘅免疫系統,等你精靈尐又生猛尐,開心樂觀尐。

赤腳踩响泥土,石頭上,爽!

療癒唔係治療,因為無經過一個診斷,然後俾出一個指定嘅解決方案,無藥或者手術或者動作,亦都無用特定方法去計個效果。療癒係發自內在,係一個過程,可以係身體上嘅回復,亦可能係心靈上嘅覺察,頓悟。

陪伴員

正如上面咁寫,大自然先係療癒師,陪伴員其實只係响旁邊提水嘅助手,引導體驗者打開五感。喺寺院山林入面,放慢腳步,去接觸自然。俾佢哋安心嘅氣氛同大自然連結,見證佢哋安心嘅感悟。 陪伴員亦唔係導賞員,唔應該俾咁多資料,影嚮參加者嘅體驗。陪伴員又唔係輔導員,唔應該去處理同行者嘅情緒,就等大自然去接納,包容同行者嘅感覺。

不知幾時開始,間中會除鞋通山走
帶番個頭盔,慈森.山林療癒只係响慈山寺入面舉行,比起森林療癒更加強調正念,專注洞察當下,用平靜嘅心去觀看實相。陪伴員係由慈山寺提供陪訓,服務同埋認証。

我自稱熱愛大自然,依家發現自己嘅無知。以前遇到鍾意嘅風景,會搵資料,計畫唔同嘅路線,再推薦同埋導遊身邊嘅朋友同事去感受。(最癲果一年帶咗六七組家人朋友去元朗南生圍郊遊同踩單車,再加上自己試路,果年去咗十幾次。)

曾經為之瘋狂嘅元朗南生圍

探索自然除咗令我哋有開心嘅經歷之外,依家先知佢有療癒嘅效果。所以我決定報名做山林療癒陪伴員,希望幫多尐人接觸同埋體驗到自然嘅療效。不過,要成為認證嘅山林療癒陪伴員都唔容易。要報讀理論課程,完成考試。再通過面試,先可以入到技巧課程。然後經過10次嘅實習機會,過埋考核,至能夠成為真真正正嘅山林療癒陪伴員。咁,我仲有排捱。


CC BY-NC-ND 2.0

Like my work?
Don't forget to support or like, so I know you are with me..

was the first to support this article
Loading...
Loading...

Comment