【廣東話】俹簁、蛇𠺌、娿哿

我愛廣東話

粵語，又叫廣東話，又叫白話，係我嘅母語，係「真．香港人」嘅母語，但未必係「新．香港人」嘅母語。

廣東話對我嚟講，唔只係一種語言，廣東話嘅港產片、電視劇、廣東歌都係陪住我成長嘅回憶，廣東話係我嘅根，亦係香港人嘅一份身分認同。

事實上，就算書面語嘅中文寫得再流暢、文筆再好，始終都代替唔到廣東話嗰種「到肉」。廣東話同繁體字一樣，如果再唔用，可能有一朝無得再用。

所以，買少見少嘅嘢，係時候要珍惜。

廣東話無得寫？

由 ICQ 年代（或 MSN / WhatsApp）打字傾偈開始，就發覺好多廣東話都無得寫出嚟（其實係唔識寫）。我哋由細講到大嘅母語，喺學校係無老師好好教過我哋點寫，做功課、讀課文全部都係「書面語」嘅中文，但每日講嘅廣東話呢？無人教過，就係咁，當去到 Texting 年代就發現大家都係「半文盲」咁，好多字都係借同音字或借啲英文串法去拼返個音出嚟，同一個詞語，可以人人寫法唔同，所以我成日同外國朋友講：學廣東話難過學普通話好多！但係廣東話係有趣好多！

呢篇文，純粹就係想寫下啲我本來唔識寫嘅廣東話。

三個女，你點揀？

從前，有戶人家有三個女，三個都靚，但係大女做嘢好俹簁，樣樣都求求其其、是是但但；二女就勁蛇𠺌，船頭驚鬼、船尾驚賊，做唔到大事嘅；三女呢就好鬼娿哿，每次出街食飯都硬係有選擇困難症咁，左諗右諗都揸唔定主意。

如果一定要你揀同其中一個女一齊，你會點揀？

A. 俹簁

B. 蛇𠺌

C. 娿哿

俹簁

意思：形容啲人做嘢求其、是但、唔認真、無責任感。

通常寫咗做「乸西」/「嗱西」/「La 西」。

【俹】laa2

【簁】sai1

（呢兩個字我喺《朗文中文高級新辭典》同《現代中國語文字典》都查唔到。）

蛇𠺌

意思：形容啲人好細膽、成日驚驚青青，無鬼用。

通常寫咗做「蛇 Gwei」，有人話「蛇𠺌」係源自英文「Scared」，又有啲似咁！

【蛇】se4

【𠺌】gwe1

（「𠺌」字我喺《朗文中文高級新辭典》同《現代中國語文字典》都查唔到。）

娿哿

意思：形容啲人好姿整、三心兩意。

通常寫咗做「痾 Gor」/ 「痾個」。

【娿】o1 / ngo1

【哿】go6

（「娿」字我喺《朗文中文高級新辭典》同《現代中國語文字典》都查唔到。）

（「哿」字《朗文中文高級新辭典》有收錄，標粵音 go2 「古可切」，表示稱許之詞。好：哿矣能言。）

三個女，我點揀？

我揀 B. 蛇𠺌。

俹簁起上嚟可以好難頂，唔係個人問題咁簡單，會影響埋其他人，頂唔順啲人做嘢好俹簁（除咗自己 XD）。

娿哿又都好難搞，我係急急子，夾住啲人成日姿姿整整，搞一世都未出到門口，或者係乜都揸唔到主意嘅，我會好急好忟。

相比之下，蛇𠺌無咁討厭，如果個女仔靚，可能仲幾可愛。