来写信给高墙内的朋友吧｜给一个1/2同乡的信

黎生，

你最近好吗？以前你屋企报纸会登家人探望你或透露你在狱中状况的新闻，现在已经很少能在媒体上看到你了，不知你现在状况如何，我亦唔知祝你咩好，唯有祝你身体健康吧！

过往因为工作关系，我接触过好多千奇百怪的中港台客户，其中顺德客户算系最好服侍。顺德人做生意都透出一种聪明同冰雪般的通透，说话不用讲太多，已经明白大家想点。我妈妈乡下系顺德，因为我大约都有一半顺德基因，都唔算蠢，所以同聪明人一齐，讲野都悭口水。系呀，你同我算系半个同乡，所以我对你有特别的同乡之情。

你屋企报纸以前每星期都有你专栏，我其实唔钟意睇，你文笔实在唔系我个杯茶。我宁愿睇陶杰爆英式幽默，睇毕明讲饮食讲电影，睇冯睎干玩文字游戏，我都唔想读你慨专栏，但当冇机会再读之时，我又有一丝丝后悔，身为一个日日计到尽慨师奶，课咗金居然冇连汁都捞埋，实在系蚀底。

今日我想同你分享一单今年年头发生慨趣事。话说我老公发现台湾课金计落平过香港，就转成响台湾课金，反正可以睇慨野一样。今年年头老公一口气课金一年，你台湾公司话有礼物送，结果物流公司分两日送嚟两盒一模一样慨易洁镬。个阵时关于你公司走向慨流言满天飞，我同老公讲「黎生就嚟执笠啦，只镬俾返人，咪鬼贪心」。老公致电后，工作人员发现真系错手寄多咗，第二日就派人上门收走盒野。几个月之后你真系执咗笠，好快台湾公司将课金都退还俾我地，但礼物就冇收返，于是我地赚咗你一只镬。

系咪好好笑呢，讲真，只镬又几好用，我成日拿嚟煮餸，我帮只镬起名叫黎生的镬。然而，你背上的镬沉重过我屋企只镬几百万倍都唔止……啊，唔讲啦，再讲又会变得好沉重好抑郁，anyway，天气转冻，保重身体啊！

你的1／2同乡上

（台湾的朋友，这封信用粤语比较能表达我的心情，有需要翻译的地方请告诉我）