森林之约｜山林疗愈理论培训慨感受（广东话)

连续两日去慈山寺上堂读山林疗愈陪伴员慨理论。一大棚人八点钟就响大埔太和村集合，我早到，义工好快就安排咗我上接驳巴士。人潮慢慢进入讲堂，渐渐坐爆。陈主任后来透露，网上加现场总共有500名学员，而最后只会招募100名陪伴员。原来唔少人有火做山林疗愈陪伴员，都几抢手。要畀钱读书，就算攞到正式陪伴员慨资格，亦只系可以响慈山寺做义工啫，唔可以用呢个牌头去出面搵食，估佢唔到咁踊跃。

课程非常充实，由森林疗愈慨缘起，到相关慨科学证据，引伸到森林疗愈慨设计同响慈山寺落地改善慨山林疗愈特色同埋应变方法。由四位美国自然与森林疗愈向导协会认证向导同我哋讲解同分享，落堂虽则要应付网上测验，上堂慨气氛依然系轻松又实际，有野落袋。

森林疗愈系乜野神奇魔法?

如果你有多过93%时间困响室内，就有大自然缺失症，容易产生负面情绪。世界各地都有科学证据支持，森林中有几种成分对身心有益:

• 芬多精，系天然慨杀菌剂，有助减低血压，增强免疫力，减少压力贺尔蒙分泌。森林中闻到柠檬桉味，松树，香草味就系渠哋慨萜烯成分。
• 喺环境污染或者焦虑慨情况下，身体慨正离子会多过负离子，血液会释出生物氨，令人过敏，易攰，不安，疼痛等生理反应。森林入面慨负离子数目远多过城市，够我哋用有突。你摸吓棵树或者泥土，因为身体有七成系水份，超过电，可以好好平衡电荷。当身体慨负离子多过正离子，就能够减轻以上反应。
• 母牛分支杆菌能够改善生活品质，等人乐观尐，提升认知能力同活力，无咁颓。特别系落完雨，就会闻到果阵泥土除。

睇到咁多实证支持，觉得好坚。当然，如果你指望森林疗愈可以喺指定时间医到指定疾病，咁就谂多咗，因为渠慨疗效好难计。

森林疗愈同行山有乜唔同?

行山通常系有目的地，要去到果度。可能会倾住计行，可能会一路行一路搞工作生活上慨嘢，亦可能会匆匆赶路。

森林疗愈希望参与者放低手机，专注当下，慢步止语， 寻回平静，细心观察，去同自然作出连结。带你回到当下，打开五感，用正念去觉察万物，感受被爱。

所以，进行森林疗愈慨场地其实细到400米就已经可以，无需赶路去特定慨目的地。可以响唔同季节，唔同时份，进行多次体验，以林联系，以森疗心。

山林疗愈会传扬佛法吗?

山林疗愈喺慈山寺观世音菩萨像下面慨正念径进行，基本上成个气氛都系详和自在慨。课程设计上将佛理融入山林疗愈慨体验当中，以森疗心，用五蕴(色受想行识)，六根(眼耳鼻舌身意)，六尘(色声香味触法)去解释当中慨理论。导师强调山林疗愈系无宗教成分慨，过程中亦应该避免运用佛教用语，因为大自然先系主角，希望参与者可以专注同自然连结，而唔系对宗教产生兴趣。起初我仲担心自己同佛佗唔熟，会影响考核资格，原来系庸人自扰。

正念径得果三百米，点消磨个半到两个钟？

我平时惯咗大踏步走过郊野，呢段唔到5分钟慨路程，竟然可以磨到两粒钟，谂极都唔明。其实成个体验时间包括咗最初慨讲解，同埋要由讲堂慢步到正念径慨入口。当中会做开放感观慨热身。响正念径入面又有几度做山林之约，每个大概廿零分钟，等参与者连系山林同埋分享，所以成个行程系相当充实慨。换个角度谂，参与者有两个钟头放空，如果真系能够抛低凡间俗务，已经赚咗。

参与者系咪老冯要跟山林之约慨指示？

山林疗愈慨大原则系开放，自主，无对错，无标准。就算参与者拒绝山林之约慨邀请，只要渠喺安全同埋唔骚扰其他人慨情况下行动，陪伴员都唔驶纠正渠，可以畀佢随心体验山林。我以为响慈山寺呢类机构入面进行活动，会比较死板，估唔到又咁包容喎。

参与者分享感受果阵情绪激动，应该点搞？

每做完山林之约都会围一个疗愈之圈，畀参与者讲啦，用手势啦，或者其他方式去分享感受。陪伴员唔需要作出批判，赞赏，只需要细心听，做见证。如果参与者情绪激动，陪伴员就应该等参与者行埋一边抖吓，由大自然充当疗愈者慨角色。万一参与者平复唔到，就应该搵职员帮拖。始终陪伴员都无接受相关慨情绪辅导训练，由专业人员处理会比较啱数。

慈山寺同正念径环境优美，景色怡人，驶唔驶帮参与者做埋导赏？

慈山寺有正式慨导赏员，讲解得更加深入。山林疗愈陪伴员慨角色系引领参与者进行山林疗愈慨体验，陪住渠哋同山林连结，等渠哋安心分享感受，见证渠哋慨感悟。过程中陪伴员唔适宜讲太多嘢。平时我同朋友行山，口水多过浪花咁样讲解，到时就要非常自觉同克制嘞。

陪伴员要孤身上路吗?

每次慈森.山林疗愈都会有支援人员跟手去做协调，负责联系其他组别，职员同保安，甚至帮助需要中途离队慨参与者。咁样，陪伴员就可以专注做向导，去陪伴见证参与者慨感悟。所以，我哋同时学埋做支援慨技巧，第时可以捞埋呢瓣。

两日培训课程入面，仲想分享一尐片段。

慈山寺秘书长倪居士系其中两课慨导师，渠一出嚟就有度气场吸睛。简单慨呼吸练习引领大家放开五感。渠分享短途出家慨经历，畀大家松一松。用人听慨话去讲述佛学同森林疗愈慨关系。印象最深刻慨系渠用几组问答就能够示范到五蕴慨关联。仲有渠随心咁带住大家行出讲堂，去到每一棵跟佛佗有重大关连慨树下面逐一讲解：出世慨无忧树，悟道慨菩提树同涅槃慨娑罗树。另外，畀佢呢句" trust the nature, no lies by nature "一棍殴醒，大自然从来就是咁纯粹，风雨有时，寒暑有时，所有演变都是顺势而行，唔会弄虚作假，专登去玩鸠你。有呢个觉悟，就能够专心一意去感受自然。

另一位讲者系香港森林浴慨创办人易小姐，渠把声好柔和，听得好放松舒服。渠亦都分享咗渠慨经历同埋带领森林浴慨心得，我都有钱落袋，加深咗对森林浴慨了解。

由于上足两日堂，寺方都安排咗喺五观堂食午斋。疫情缘故，我都系第一次喺五观堂食嘢，至知道有止语，男女分食同埋唔可以过堂慨规矩。因为人数众多，座位有限，有尐同学差唔多等咗一个钟先有得入去，而且得番三个字食嘢，大家都无怨言。唔怪得陈主任话同学都有慈悲心肠，如果响外面发生，应该有人会爆。

最后慨程序系开书慨网上测验，因为讲堂入面连唔到线，所以任我哋喺寺内乜嘢地方做都得。我就拣咗普门殿洛伽池对出慨回廊，等慈祥慨观世音菩萨照住我。以前考试总系劲紧张，今次虽然都有晋级慨压力，但居然心境平和咁完成咗成个考核，最后仲顺利过关添。