山水之约｜被丛林吞噬慨牧场(广东话)

礼拜六响充足慨阳光底下，行过香港岛最早期慨村落薄扶林，搵吓唔见咗慨牧场遗迹。食完野再去传闻话同香港开埠有拿掕慨瀑布湾睇吓。

薄扶林村舞火龙

由薄扶林村村口落车，就已经俾韫住响竹棚入面慨龙头吸引。港人可能以为只有大坑先至有舞火龙活动，其实薄扶林村慨舞火龙都好有特色，因为衪最后会被送去瀑布湾落海，龙归苍海。薄扶林村舞火龙喺2017年列入咗《香港非物质文化遗产代表作名录》。

保育薄凫林村落

薄扶林，原本慨写法系「薄凫林」，凫系同野鸭好相以慨雀，系指有好多野鸭住响呢一带慨丛林。港岛区居然仲有一大片寮屋，背靠太平山，面向东博寮海峡，景致宜人。对面就系南区老牌屋苑置富花园，沿住薄扶林道到西环都唔驶五分钟车程，地理方便。就系咁，地产商梗系牛咁眼睺实渠。几年前好彩有一班热心慨村民同香港大学建筑系慨学生，整咗手绘地图，又响村入面留低可爱慨路标，开始保育这条古老村落。

我早排就孖住同事响村入面乱行，响错综复杂慨细巷仔度，搵各个有趣慨标志。中途遇到几位亲切慨村民，都会主动停低指路，甚至亲自带埋我哋行。虽然果时已经知道牧场遗址散落四周，可惜未够料，所以最尾败走西高山。

牛奶公司宿舍

响香港无人唔识牛奶公司，薄扶林牧场系香港第一个牧场，由苏格兰借医生文逊爵士响一百三十多年前创办。由于牧场霸晒成个山谷，需要劲多人做野，令到薄扶林村落更加墟冚，可惜到咗七十年代，随住置地买起牛奶公司，攞晒尐地嚟起楼咁滞，加埋后来畜牧业规管愈嚟愈严，牧场终于响八十年代折埋。

今日先去旧慨牛奶公司基层员工宿舍外围睇一睇，渠慨外墙同几年前一样都仲系搭上一层绿色慨纱网。这两幢建筑物，外型好似当年慨七层徙置屋。由马路望上山边，渠哋就似两只怪兽睥住山谷入面慨牲畜同牧草咁，劲岩巉。

草芦

离开宿舍，我哋就去搵草芦。就算当年成个山谷都种满象草，不过冬季生长比较慢，所以就起咗好多个草芦嚟收埋， 后来甚至要由外地进口禾草嚟做饲料。成个牧场范围原本有好多个草芦，而呢个听讲系现存唯一完整的遗址。呢个草芦三层楼高，似个圆型慨堡垒，塔顶系圆锥型，好骨致。

生态热点

影一阵相，我哋就沿住山路行到一个配水库天台慨公园，响高处望呢一带慨景色：香港第一个水塘--薄扶林水塘。然后跟住近排于对虫鸟等生态拍摄得心应手慨老死言，追踪一个又一个慨生态热点，睇到生平第一只龙眼鸡。以前挂住响龙眼树同荔枝树度搵佢哋，原来只系无缘。可惜尐龙眼鸡，被一班嘈嘈闭慨人类吓到鸟兽散。

港府慨保育态度

疫情关系，无缘入伯大尼修院参观，唯有匆匆路过。至于由牛奶公司旧高级职员宿舍保育成为慨薄凫林牧场，仲未开幕，又无得睇。进入牧场遗址近海湾慨区域，一条古迹石柱就竖立响简陋慨垃圾站侧边，可见当局对于古物保育慨态度，正正就系当睇佢唔到。

牧场遗址

行无耐又见到一个大型水缸，大约八米高，天花冧咗，响厚度只有两尺慨墙壁上行，大家都小心翼翼。

然后就见到几座牛屎池遗址。大家都对完整无缺果座无乜兴趣，反而聚焦响冧净横梁果一座。因为阳光啱啱好射果落果边，加上果条睇落危危乎慨石梯，同埋地面几大块芋头叶，令到画面更加丰富。我都乘机同小友人练咗一次胆。

几十年过去咗，当然唔会再留低一尐痕迹或者一朕除，而呢度最终亦都回归大自然，滋养呢片土地。就算有GPS慨引领，同埋前人留低下慨丝带记号，响丛林中间，都要摷一轮先可以去到最标志性慨牛棚。有人觉得牛棚慨栏杆似尿兜，我就觉得渠似泊单车尐栏杆，反正咩人睇咩野。可惜山野慨宁静唔系必然，一堆五十人慨行山大队慢慢蒲头，正正系人未到，声先到。虽然渠哋有同伴提醒，影都未见就咪咁大声，但系个别人士依然话之你。加上渠哋见住你影相都强行入镜，我哋只好行埋一边，宁愿喂蚊。老死亦顺便点醒个仔，做人有要品，千祈咪做埋尐咁慨野。

鸡笼湾瀑布

搞掂，响风凉水冷慨华富村食碗面，然后就顺路落海边行吓。相传呢一个瀑布，正正系几百年前外国商船慨食水补给源头，加上维多利亚深水港同埋九龙群山慨庇佑，先至令到大不列颠流晒口水，改变我城慨历史。

机枪堡垒

瀑布外面有一个机枪堡垒，对正南丫岛，保护住进入维多利亚港慨水道。香港保卫战发生慨时候，日军无响呢度登陆，所以应该无战斗痕迹，不过就有传日军曾经响附近残杀军民。机枪堡上层慨楼梯已经无咗，不过渠同天然岩壁形成九十度角，加上有树根盘缠，又成就咗一个比年青人试练慨好地方。

轻轻松松慨全日行程，包含咗村落，水务，牧场，战争遗址同埋生态欣赏，仲有瀑布同海岸风光。你叫我点样不爱香港慨一草一木，一砖一瓦呢？