寫在2019夏

有朋友認為相關回應有意思，希望能集思廣益，讓大家遇到相同思維人士能有力回應之，故在此分享一下，拋磚引玉。

部分人士認為：

將自己選擇結束自己阿爸阿媽給予嘅生命歸咎什麼暴政政權嘅錯聽落高尚偉大正義，實質只用幾個字就形容到，不負責任。香港呢個幾百萬人嘅社會，無地方訓無飯食無涼沖大有人在，當人地都頂硬上繼續求生嘅時間，有人就用呢啲所謂嘅藉口結束生命，你覺得佢偉大？你有有說過佢父母用左幾多心機時間金錢係佢身上，一班連稅都未納過人，咩叫生活艱難連苦都未捱過嘅人，出黎話係政府欠佢地，簡直笑話。我都想睇下如果有一個香港人，一生平平凡凡，為自己生活打拼，有美滿家庭，不涉足政治，不與人結怨，政權會點樣迫害佢地? 仲有，唔好成日口口聲聲用佢哋代表香港人,咩辛苦佢地，我都係香港人，我都有納稅，我尊重所有出黎和平示威集會嘅人，但係呢一班出黎所謂溫和破壞嘅我無法尊重，如果我尊重佢地,咁第時啲人出黎放火強姦謀殺擺低幾百蚊就得啦。

回應：

下文係個人立場嘅闡述，以自身同身邊人嘅人權安全出發，包含好多主觀憂慮。喺暴政面前爭取人權，就我立場而言都可以係好自私、為自保嘅嘢，唔使諗到咁偉大，只係制度改變到就同時會好多人受惠咁解。

安分守己便能獨善其身？

安分守己真係可以獨善其身嗎？呢個係示威者一大憂慮。大家嘅目標無分別，都想安居樂業，只係示威者無你地咁樂觀，唯有喺難逃嘅一劫來臨前作最後掙扎，寄望長遠嘅安穩。（當然咩方法可行，大家仲摸索緊，目前只被迫用上排除法，知道聯署聲明、寫信、遊行、要求對話、登報同衝擊立法會都係無人理。）要獨善其身嘅前題係要確保子女、家人唔會遇到食安問題同豆腐渣工程先，或者係遇到呢啲問題你都預咗硬食唔問真相。喺內地，唔同依家或以前嘅香港，只係想追尋真相、尋求公道都超出安分守己嘅範圍，有機會畀人告尋釁滋事罪。呢樣嘢好多香港人都唔會接受到，你真係有信心唔會擴展至香港？出得嚟示威甚至賭上自己前途冒險衝擊嘅，就係無呢個信心，覺得就算今日明哲保身，他日同身邊嘅人都難逃一劫。你樂觀，但又敢以咩向任何人保證佢地人權不受剝奪？到咗大家人權真係受侵害嗰日，你今日同大家保證咩都無用，到時有咩可以做？好似李文足咁東奔西走，最後又換得到咩？喺香港，專業律師咩客都要幫，但喺內地，就要避開弱勢客人，避免好似李文足老公咁做咗維權律師，學你話齋，安分守己。咁樣嘅香港，仲會有咩優勢畀人做生意發達？到時仲有咩安穩生活？示威者係作咗最壞打算，諗過萬一人權打壓真係出現時，個代價自己承唔承受得到。

要獨善其身仲包括要祈求港珠澳大橋、高鐵或沙中綫無存在咩人為工程缺陷或執行失當。萬一真係出事，遑論象徵式嘅賠償，有無人會負責都成疑問。項目高層最大代價可能只係請辭，再搵過份工，但市民嘅代價將會幾大呢？係過慮嘅當然好，我最怕自己憂心嘅成為事實，呢啲嘢，我都但願自己估錯哂。

內地同未來好遠？講吓菜園村，啲種田嘅村民被迫遷拆前又有幾涉足政治、幾唔平凡安份？你話齋，相信佢地同你一樣一直只想安靜過日子。但高鐵選址假諮詢，佢地想唔想都好，都即時被個村址捲入政治，脫離平凡生活，最後家園被港鐵喺PTU護航下推倒，被迫遷去第二度。好多嘢用賠償係填補唔返。

其實喺呢一刻選擇將安穩凌駕於人權唔係問題，但到他日身受其害，經歷人權被剝削，會否突然轉哂口風，話政府不顧民生人權？到時後悔都太遲，無人幫到我地。殺到埋身先走去控訴政府？其實政府無變過，只係一直以嚟未殃及你我。

社會問題與政治

你講得啱啊，香港好多人無飯食無住處，或者要訓棺材「房」，咁有無諗過邊個有責任？點解政府花錢做漠視民意嘅大白象工程、派糖、請人手處理派糖實體表格，都無設法幫露宿者同劏房戶？想話唔好怨政府，係啲人唔爭氣？偏偏有有心人無指責受害人，自己組隊，畀地方啲露宿者梳洗過夜，甚至教佢地英文、助佢他搵工、上樓。政府唔係無資源無能力，而係資源錯配哂無心做，連民生同醫療都搞唔好，仲要天寒地凍嘅夜晚仍走去洗隧道，趕絕露宿者，係邊個不負責任？政府又就貧富懸殊做過啲咩？無一個國家嘅政府係無問題，但問題在於港府總喺解決問題上無甚進展，亦見唔到進步改善嘅藍圖，只見繼續官商勾結，借發展為名劫貧濟富，而民生同醫療問題就越拖越嚴重。

你可以話放棄生命好可惜，但唔該你唔係真係了解內情就唔好亂咁詆毀人地嘅動機成無謂藉口。如果人地真係為爭取人權而死，就算方法成效唔理想，其動機起碼係有保護家人同身邊人嘅意義、甚至社會意義，絕非無謂亦非藉口。至少泊埋去拒絕對話嘅駝鳥政府、對爭取人權人士指手劃腳但其實唔會願意捨棄自己人權嘅人度，佢地唔會係最無謂嗰個。呢頭利用弱勢嚟做修辭對比踐踏絕望者，指責佢地歸咎政權、以死控訴政權係不負責任，轉頭又表示有美滿家庭、唔涉足政治係自保明智，一腳就蹬開咗剛才仲喺嘴邊嘅露宿者。為弱勢發聲都係涉足政治，我地活在制度之下，衣食住行無可能完全撇除得到政治，單單係貨品價格背後嘅店租百分比已涉及無限嘅政治問題。想要安穩生活嘅人眼中可唔可以包攬吓其他未得到安穩嘅人？貧富懸殊下嘅露宿者唔係畀人喺罵人唔惜福就搬出嚟，無事就擺埋一邊自生自滅，用作示範「頂硬上求生」嘅道具。

其實你有無去了解過人地衝擊爭取緊乜嘢？人地嘅目標唔係你口中嘅姦淫擄掠或放火殺人，係基本人權，唔想第日大家無做錯事、搵真相都畀人拉。點解你可以將傷害他人者同破壞公物嘅爭取人權者等同？爭取人權自由嘅人，放眼嘅係長遠嘅安穩。你可以選擇更重視目前嘅安穩，但請你尊重其他寄望長遠安穩嘅人，你可以批評佢地違法闖入、破壞公物，但唔好因為你唔認同佢地嘅方法就亂咁抵毀佢地嘅動機話咩無謂，亦唔好再亂將目前嘅示威者等同姦淫擄掠放火殺人犯，因為咁樣同將爭取人權等同學生爭取戴耳針留長髮一樣，除咗係詆毀，亦話畀人聽你根本無去理解就否定一切。