拾荒書介: 獨裁者的進化

兩個月冇乜心機去介紹書，但憤慨普京入侵烏克蘭，匆匆睇完【獨裁者的進化】又寫幾句並free畀同路人。

本書英文初版2012年，並唔係講俄烏關係，而係講獨裁者包括俄國普京、委內瑞拉查維兹、埃及穆巴拉克等點樣喬裝民主而行獨裁之實，手段原來香港人都好熟悉！

1. 製訂有利於執政者嘅法律，假借法治之名。

2. 操控媒體，強行關閉不合作傳媒。

3. 以各種理由DQ反對派。

4. 操控選舉以利當權者勝出。

5. 壓縮公民社會，打壓不合作NGO。

6. 扶植假嘅反對派同收錢嘅NGO。

7. 籠絡正規同唔正規嘅暴力團隊。

大家自行對號入座。

書其實有講牆國，不過變化太大。書裏面牆國官僚吹捧牆國執政黨永遠年輕，因為任期有限而退休年齡有訂 ; 大家知早兩年乜事啦。

書強調非暴力抗爭，並且要爭取更多人民支持，好多人對獨裁者嘅忠誠其實有時限，又要幽默去突出獨裁嘅荒謬。