My little detour - 《我很喜歡做街坊》

2022 年 2 月 16 日

16 Jun 2019, sun (Day 18 晴（熱) Camaguey, Cuba)

因為香港發生呢的事，搞到個人都心情麻麻，睇咩都好無趣，所以亦都認定左Camaguey好無趣。其實咁又唔多公平嘅，但無辨法。由於覺得Camaguey雖大，但可以探索的事唔多，所以今日十點先出發。由於個個巿中心都係差不多，所以決定跟maps me去嗰湖嗰邊睇下。睇個map唔遠，行路都ok。不過行之前都要補充下體力先，我去左巴士站對出嗰列小食亭搵食，買左件三角批仔（都係甜嘅，同埋中間有jelly嘅 - 3cup），之後又去另一間買左半melon juice （3cup) 就出發。

行左大概半個鐘到就到左，果然好似琴日屋主個女Rosanna咁講...soso。不過見到人打下棒球行下公園，心情都好返d。其實個公園都好快行完，我都忍住叫自己唔好loop新聞影響心情，但當然控制唔到。我竟然坐係涼亭底下睇左成個鐘新聞，我希望天佑香港，義士得以安息，個7婆同埋的渣渣建制盡快比天收 🤛。

hea到12點諗住走之際，我見到有當小食亭賣西班牙油炸鬼喎，我想試好耐，但成日只在沙塵滾滾的路邊見過，今次仲唔係機會？我買左一包試下 ( 5cup)，見佢啱啱炸起落白色汁時我仲出手阻止，點知其實係人地嘅🤣。好喇，真係輪到我時阿店主好醒咁問埋我要唔要糖，好丫，少少唔該！喂，真好食架喎！

遊完湖我又行返去巿中心，今次無跟住睇maps me行睇下有無新發現，其實都係無咩。

但由於真係熱得濟，我去左間shop諗住買枝水（0.7cuc), 但見咁熱又忍唔住飲埋可樂（0.5cuc) ，坐左陣仲食左件cake仔 (0.25cuc）添！當中見到個叔叔不斷企係收銀前面徘徊同口up up, 佢無騷擾人，亦無主動要的咩！隔離枱的男仔好好，佢送左件cake比個叔叔食，而我嘛，臨走前買左罐可樂比佢，雖然未必係佢最需要的，但起碼希望佢有點安慰。

行到出去見返間國營雪糕點，明明唔餓，但見佢有菠蘿味同朱古力味又忍唔住入去食試，我今次只買新地（價值2.4cup, 但我比左0.1 cuc佢話唔夠...攞多左0.05cuc....係咪真係計啱架）。但最後係比錯左菠蘿同唔知咩味我的。

跟住又繼續越行越遠，諗住行返轉頭時經過間賣mango juice嘅屋, 我最愛的juice又點會錯過，仲要2 cup一杯添。當我問佢係咪有mango juice時，佢話有仲請我入屋坐低...我想比錢時，佢示意斟左出嚟先，不過最後收左我5cup無找錢比我。但好搞笑，唔知係咪比人呃慣，我又無咩咁同佢地雞同鴨講。其實古巴人真係好cute好nice, 又唔介意同你share野，但當然你唔好先起摃。其實都係講無聊野，問下我幾歲（人人都問架喎），屋企有咩人，佢地屋企又點。講講下隔離屋送左的芝士腸仔嚟，原來其中一位女士（佢個名係sky咁解）今日生日，我仲同佢講琴日我都生日添，好搞笑。佢地係咁叫我食，女主人仲斟多杯芒果汁比我，即刻咩都抵晒，但我唔知到點解咁樣雞同鴨講都可以消耗成個鐘🤣。臨告別時，個男人仲強調我地係friends添，真sweet! 之後慢慢行返去centro, 見到有人唱歌跳舞，我仲企係到睇左陣，佢地仲邀請我過去一齊食一齊跳，真係好歡樂！但我驚真係要跳，所以我笑一笑後即刻走人。