美劇 - Loki

劇集嚟到第四集，哩個畫面簡直令人驚訝，先聲明筆者未睇過相關美漫，但這齣美劇係計WandaVision之後又一力作(果齣《楊過與鵰兄》當冇睇過。)，單看美術就已經開心到死。

時空由第一齣Avengers 2012紐約大戰尾聲Loki被捉走時乘亂逃走開始，佢被Time Variance Authority (TVA)捉咗兼控告佢犯咗擾亂Sacred Timeline要被reset，同時又有另一單連環殺人案惹起TVA關注，兩件事都同Loki有關，究竟Loki走唔走得甩呢？

除咗Tom Hiddleston外，仲有Owen Wilson哩個老拍檔演出，佢哋妙語連珠演繹得非常過癮，Miss Minutes又非常有趣，充滿七十年代美學，目不暇給到要不斷留意每個鏡頭嘅細節，淨係睇美術都有排睇，更何況個故仔神秘又過癮，一路解迷解到而家剩返兩集都唔知解唔解得晒，超期待個尾佢點樣收。

超正，極度推薦。