先來結論一個

先講結論，就係雖然架快閃小巴嚟得又去得快最後仲炒埋車 (兼賠埋款，哈！)，華田不得不承認呢架小巴真係非常高明，如果玩得成的話，會係一個非常成功的 use case，好值得各大小銀行參考哦！

Prerequisite：呢個 Campaign 個成本其實好底的

先講一個前設，就係大家有無留意呢個 campaign 個 direct cost 真係超低…

每日 50 個名額、上限 $10,000、存 2 個月、9.8% 息，如果當佢 basic 定期都要畀 1%，咁即係個 extra interest 只係 8.8%，咁每日成本就係 50 x $10,000 x 2 / 12 x 8.8% = $7,333，campaign 本身 plan 玩 22 日，總成本即係 $146,666 了。

只係每日 $7,333 就足夠令大家大量湧入推冧個 server 喇，記唔記得啱啱正苦每人派幾多錢呀？波叔咁孤寒都人派 $10,000 啦！一個月番 22 日工，如果日薪係 $7,333，月薪就啱啱又係 $146,666，請兩個高級少少既 Senior Manager 計番強逼金保險都要呢個數啦！

你話係咪好平先！？但係呢架小巴卻可以用庶渣價錢，渣出燒鵝既味道，講 3 個 point 畀大家參考吓。

燒鵝位一：有咩好過少少錢可以吸引到你開戶口呢？

我諗最近 ZA 同 WeLab 都面對緊同一個問題，就係高息存款過後，仲有咩 good excuse 去吸引大家嚟開戶口呢？

係華田 fans 既都會知道，我一直都話愈高息既存款只會養出愈不忠誠既客戶 (patreon.com/posts/36951447)， 用高息吸番嚟既客只要個高息一到期就會帶錢走喇，天星暫時無呢個問題，因為一直都仲派緊 3.6 厘；Livi 亦都無呢個問題，因為 day 1 開始就無派過高息，但係 ZA 同 WeLab 就係唔係咁講了。

而銀行為咗慳成本，好多時都會第一水就玩「人人派」，第二水就會玩「揀嚟派」，所以你見呢期 ZA 玩做 $1 e-DDA 就可以抽獎，咁香港人既基因就當然係執輸行頭、慘過敗家，可惜抽獎太難中，$1 做隻 e-DDA 無咩成本咁大家都可以一試，如果要開戶先有得抽獎，香港人就肯定唔會睬你。

咁點樣可以高明地「揀嚟派」呢？獎抽獎呢啲運氣呢，變成搶小巴香港人就受晒了。其實大家諗真啲，呢個其實咪又係抽獎！畀你真係咁啱撞得正嗰個時間登入，咁你咪上到車咯！你以為真係睇 FB 咩？首先小編一定會遲過架小巴埋站少少先出 post，仲有 FB 又係咪即刻 show 到畀你，你又係咪第一個見到個 FB Post 呢？

所以結論都係抽獎，不過呢個係「貌似」有努力成份既抽獎，鬥快之嘛，我實得既，咁香港人就即刻受晒啦！咁你仲唔快啲開戶一齊嚟搶小巴？

燒鵝位二：有咩好過少少錢可以買到咁多 FB Like，仲預期可以吸足 25 日 attention 呢？

根據呢刻華田 search 番幾間已經營業既 VB 既 FB，Like 數順位如下：

第一位：ZA 4,128 Like
第二位：WeLab 3,386 Like
第三位：Mox 2,753 Like
第四位：AirStar 1,709 Like
第五位：Livi 980 Like

(哇，華田銀行都有 1,100+ Like 的，原來都卡到喺 AirStar 同 Livi 中間呢…)

雖然我啱啱先話睇 FB 唔會搶到小巴，但係好多人 (包括我) 都係靠 FB 先知有呢架小巴同埋架小巴已經埋咗站！而呢刻佢既 like 數排緊第二，仲多過人氣寵兒 Mox Bank 呀！

咁架小巴由 9 月 6 號一路講講講，講到 9 月 9 號先有第一架，中間已經夠晒 noise，相信吸咗唔少 like (至少有 attention)，可惜第一日已經反咗車，否則相信開足 22 架，呢 25 日既小巴 campaign 可以為佢日日不停咁谷人氣、擦流量、呃爆 like 啦！

重點係個 campaign 只係 $146,666，除番 25 日每日都只係 $5,900 有找呀…

燒鵝位三：有咩好過少少錢可以搶到咁多 low cost deposit？

好嘢當然留到最後講，呢個真係 point of the point，就係佢呃咗好多 low cost deposit 呀！

先問大家一條 IQ 題，請問如果大家真係好想搶到架存款小巴，除咗要先開戶，之後不停咁望實個 FB / 不停咁 login 之外，仲要事先做好一件準備工夫，請問嗰件準備工夫係乜嘢呢？

諗到未諗到未？啱喇啱喇，就係你要放定 $10,000 喺 WeLab 個活期戶口度呀！咁 WeLab 開業一個星期就話自己已經有 10,000 個客，咁如果有一半客睬佢，咁就已經有 $10,000 x 5,000 = $5千萬！

上番去燒餓位一，呢架小巴既本質其實同抽獎分別不大，但係佢就好成功咁吸引咗大家為佢「做足準備」，咁就吸多 $5千萬存款喇！

大家又留意番，同一樣既 $5千萬，WeLab 係特別平的，點解呢？ 又畀第二個 IQ 題大家諗吓，請問 ZA / AirStar / Livi / Mox 頭 $10,000 既活期基本利率係幾多呢？答案係 1% / 3.6% / 0.5% / 1%，咁 WeLab 呢？

係 0.1% 呀！

WeLab 係出咗台既 5 間 VB 入面唯一一間無提供額外活期存款利率既！

咁如果大家好仔細計番每日 $7,000+ marketing cost 相對 $5千萬存款，個 costing 都唔係真係咁好，但係呢 $5千萬由於唔係定期存款，所以唔會有什麼「到期日」，個滯後效果會比定期存款好好多，仲係叫做用相對 organic 既方法吸番嚟的呢。

No matter what，對華田嚟講，呢架快閃小巴本質上就係抽獎，屬於銀行第二波既「揀嚟派」系列，但可以玩得咁平、咁精緻真係好少見，係一個好好既 use case，係可惜一出閘就反咗車，所以話 idea 幾好都好，都係細節決定成敗。

華田期待 WeLab 有更多精采案例哦！