我以前無得揀,我而家想做好人!
IPFS
小時候,長輩同我哋說,長大了要做一個有用嘅人,唔好累人累物。聽得多,久而久之,我掌握咗當中奧義。十六歲便開始做暑期工,之後一直番學,一直兼職,我自己照顧自己日常洗費,唔使問阿爸阿媽攞錢,我係個有用嘅人。
後來啲人又同我講要做好人,至於同有用嘅人有乜分別,我又唔係好分得清。不過總之就唔好無所事事啦,勤力啲番工啦,養得起頭家啦,其他嘢都唔係太緊要嘅啦~
到呢幾年,有咗小朋友,世界又發生咗好多事,我越勤力番工,越係覺得個人有種講唔出嘅唔協調。喺公司,喺人前,大家就只係笑吓笑吓,由啲唔知存唔存在嘅紅線圍住自己。總之,保得住要做個有用嘅人就夠啦~就算,病到五顏六色,甚至中咗肺炎,我哋依然堅持要做個有用嘅人。
做咗差不多廿年,越嚟越迷失,尤其喺小朋友面前,我發現我剩係識做個有用嘅人,我唔知道,點樣先做到好人。如果有用同好唔可以並存,又應該點算好呢?如果我做咗個好人,但同時又無乜用,咁樣又O唔OK呢?
2021年,我明明見到社會上有好多好多細個嗰陣長輩形容嘅「有用嘅人」,但係個社會又唔見得太好。至於自命「好人」嘅,下場又好似唔係幾好,要坐監架~
一個神童,後來做到名醫,作育英才,應該係個「超」有用嘅人。但係佢只係講咗幾句,輕輕地表態咗,就唔可以再做一個有用嘅人。不過,我依然想向佢學習,因為,七張嘢仲會沉迷Pokemon Go,仲要夠薑叫自己做「BIG KOWLOON」,呢個人,好玩呀~正呀~爽呀~
如果有一日,有用嘅人同好人唔可以並存,我會話,
「我以前無得揀,我而家想做好人!」
好人難做,不過,我依然想做好人。最少,自以為是好人。
喜欢我的作品吗?别忘了给予支持与赞赏,让我知道在创作的路上有你陪伴,一起延续这份热忱!
![](https://imagedelivery.net/kDRCweMmqLnTPNlbum-pYA/prod/avatar/a92bf81e-e940-4d5e-868c-da6b85ce07af.jpeg/public)
- 来自作者
- 相关推荐