My little detour - 《原來我真係好鍾意行路...對拖鞋唔刮腳時》

仲喺到掙扎緊要唔要租車時， 點都係覺得都係行好的， 唔止因為慳錢， 我其實更驚人車爭路！不過行咁遠， 最大挑戰唔係體力， 係我對拖鞋。 之前起水泡個位好似已經好返， 但會唔會又再刮損我真係唔知, 唯有帶兩塊3m人皮膠布過去。 話口未完， 出去無耐左腳已經要貼， 因為膠布有咁上下厚度， 所以貼完係好唔錯的。

其實我只要出返去巴士站落車個位再沿路一直去到尾就會去得返琴日的交匯處。

又由於朝早未食早餐， 所以行過時買左個三角甜批食 （3 cup)。 咦！唔係guayaba味喎， 似椰子味喎， 都ok 嘅！

之後又行過另一間鋪仔買左個ham bun, 好有誠意喎， 會夾一夾熱個包， 唔似其他城巿咁凍冰冰比你食。

好喇， 長征之旅開始。其實如果由我住的地方開始計， 去到La Boca應該係6公里， 6公里嚟講， 其實都唔算真係堅遠嘅， 少過我上環返土瓜灣咁囉。 我沿路行， 最辛苦其實係太陽極猛同埋廢氣太多， 但又礙於我覺得行路另有一番風光，我可以隨意停留影相， 又可以看得真一點，所以堅持下行囉。  

我行行下見到以為雞的物體， 但佢突然飛喎， 原來...係秃鷹， 佢塊面紅色， 唔算好大隻， 但個樣就唔多討好。

沿路一邊行， 的車一直喺我身邊擦過， 有的電單車好好會停低問我係咪去La Boca， 然後拍拍後座叫我上車 （其實好感動， 咁當然都有人踩住架單車拍下個後座話taxi嘅）， 就算係成車人經過你身邊， 亦都會笑住同你講hola, 其實都好得意， 由交匯處起計唔使一個鐘我已到左La Boca。 呢到其實真係好細， 咁見到個沙灘， 梗係唔理三七廿一衝左過去先啦！ 咦， 的沙好粗下喎， 的水清見底嘅， 但又唔算極靚。 係岸邊有的浪， 水裹面都算平靜嘅， 但無人看野， 我踩一踩下的水就上返岸了。

咁無咩做， 咪行入村望下囉， 有兩間幾落泊的酒店（有泳池架）， 之後仲有的沙灘位咁就行完喇！ 大佬， 12點幾咋喎， 嚟左半個鐘都無咪好似好蝕咁， 同埋咁早返去我無野做喎！

於是乎我就順勢行埋去Playa Ancon, 為的是要消磨時間。 由La Boca過去Playa Ancon大概係8km, 咁又真係遠架， 但咪行得幾遠得幾遠囉！ 其實呢段路除左間中有大車經過， 都算得上平靜， 同埋呢段路好心人給我免費一程的offer不下7-8個， 全部都係local古巴人， 太有愛了。 不過由於我目的係消磨時間， 所以我一一婉拒了， 其實我唔係硬頸， 只係無呢個特別需要。 其實沿住加勒比海散步， 仲要聽住mp3, 其實都好浪漫（雖然仍好似阿sim般擔住遮）。 直至...我隻腳的水泡再現， 我估由La Boca行左大概3公里， 我隻左腳已經痛， 右腳人字拖位亦開始磨損。 此刻右手邊出現一個snokelling的接待處， 右手邊是小食亭， 仲有個男人出嚟打招呼。 我望左兩眼後繼續向前行， 過多200米我突然問自己做咩咁堅持要去嗰個沙灘， 你又唔係落水， 只為消磨下時間。 最怕時間未消磨到， 我雙腳已被磨到不能。於是我行返轉頭， 去個snack bar到用1 cuc買左罐古巴可樂， 之後好hea咁坐係到望住對面個snokelling門口。 

咁啱原來頭先同我打招呼的男人係嗰到職員， 我問佢可唔可以去睇下， 佢話可以， 仲叫我唔好落水， 因為我有講過唔係好識游水， 佢話一落水就深架喇。 媽， 我終於踩到加勒比海又湛藍並帶綠的靚爆的海水了。 嘩， 嗰刻有的感動！ 之後返snack bar， 個男人話可以帶我snokelling, 仲可以著埋救生衣， 話出面好多魚陪我游， 好吸引呀可！ 我當然先小人後君子， 問左幾錢先啦， 8cuc。 其實唔算貴， 但係呢... 呢刻我又唔太想， 佢出到一跟一， 個手勢仲好似攬住我游咁， 我係驚水， 但又唔至於要咁（不過可能係我諗多左）， 我之後跟手道別後就向返La Boca方向走了。 

去到La Boca撞返頭先攞住兩條魚的人， 佢叫住我， 我完全唔知佢講咩。 但見佢做個自攬的手勢我好驚， 即刻走人， wkakakak。

我又沿返頭先條路返巿中心, 又有兩個人offer我返去wor, 有個仲幾靚仔添🤣🤣 不過我都係無上。 行行下， 我見到有人在沒有主人的芒果樹下執緊芒果， 仲叫我過去執兩個添， 全部黃色細隻過琴日嗰的， 應該幾好食，但芒果quota已滿， 仲未想食住。 返到交匯處， 我順手向右手邊行睇下火車站係邊。

好喇， 今日行程完結， 個人lup到不行， 加上成身痴晒塵， 我決定返homestay洗個面先。 又經過小食檔仔， 要左杯juice 3 cup)， 問佢除左mango仲有咩， 我聽唔明不過要左， 原來係酸梅咁嘅汁， 好味呀！跟手見枝水又飲完， 去返琴日幫襯過2次嗰間買水， 收錢嗰時我比1cuc佢等找錢， 點知佢話枝水1.5cuc, 嘩！咁都得？ 我用英文同佢講我琴日買過都係0.7cuc, 佢隔離嗰個同佢講左兩句， 最後佢收返我0.7cuc, 太過份了， 當我傻的嗎？ 

返到homestay我坐左係房外張枱寫postcard, 寫完五點幾lu, 又可以去返琴日嗰間晚餐了！ 今次我醒呀， 揀左入少少的一張枱。 我點左 fish fillet with shrimp on top 餐（5.5cuc) 同埋檸檬汽水 （1 cuc）。多士依舊好味；的蝦好彈牙， 有幾隻仲好大隻； 條魚就普普通通啦， 但都好大件。 我今次終於唔使一敵廿隻烏蠅了， 小蠅三、四隻我可以應付。 今次策略係我放棄左碟沙律， 同烏蠅交換一刻寧靜。 唔算十分成功， 但起碼我今次唔使同時間競賽， 可以試真的味。 

但食完出嚟見對面鋪有人打交， 仲打到流晒血。 當然我唔知咩事， 但流血嗰個無人理好慘囉！ 我走的時候有個阿叔仲話我知有人打交添， 可能見我個口樣好似嚇親咁。跟住我又亂行之霸周圍走， 比我見到軟雪糕喎， 個樣幾吸引， 於是我又用0.15cuc買左杯試， 味道無havana咁好， 但個樣就勝出嘅。 行左陣我都返homestay了。 同homestay媽媽講想住多日， 佢就無問題， 仲叫我比埋錢， 不過我驚佢同阿女溝通唔好， 所以我話我都係明天交比阿女啦！

今日共用： 9.35 cuc + 12 cup

3 cup 甜批

6 cup 火腿包

1 cuc coke

0.7 cuc water

3cup 酸梅汁

蝦on top of fish fillet餐 （5.5cuc) +汽水 (1 cuc)（連加一貼士 7.5cuc)

0.15cuc ice cream