新機遇 不妨睇長少少

最緊好多人問呢排有乜肺炎相關股票好炒。筆者唔算話好踴躍參與，其一買股票係睇長遠價值創造既能力，短期外在因素唔應該當做發達良機。其二賭博意味太重，筆者就只係小注跟進GILD同1044，叫有份贏少少，但實際上對整個組合既意義不大。

反而見到有唔少股票借今次事件回調，中國餐飲股就必然係首當其衝，歐美品牌股都受到波及，其實每次中國消費力有隱憂時，相關股票都會有所反映，但每次都係輕舟已過萬重山，繼續交出好既表現，雖然呢個年代不少自家品牌靠網絡世界做到過十億美元市值。中國消費者亦比以前更愛國內品牌，中國品牌股亦係2019年既大贏家，但歐美傳統奢侈品品牌既獨有地位難以一下子消失，係筆者現時覺得值搏既股票。

最近亦著手研究再生能源公司，看好ESG主題既長遠發展。ESG並唔係新名詞，只係以前只有少部份人認真看待，相信大家見證過beyond meat, tesla既威力之後，都不敢說不。時代年度風雲人物瑞典女孩Greta Thunberg 一直引起不少回響，更在達沃斯經濟論壇與各國政商界領袖企埋一齊，此論壇今年的主題亦係環保和氣候變化，更邀請了多位理念相同的年輕人同場演出。

雖然還有得多人對環保議題展現出不屑態度，認為並不急切，但對未來還要係地球活上近一個世紀的年輕人，也難怪他們會七情上面。

相信未來會有更多人願意係ESG主題搵新機遇，如果你話筆者痴人說夢，筆者也只會跟這些年輕領袖一樣回答你: How dare you?