GRAND THEFT AUTO . FM：拉好安全帶入碟發動引擎頭搖又尾擺飄移境界

2022 年 4 月 9 日

文：哈特費爾德而玩Grand Theft Auto更需要groove，除左搶劫殺人叫雞之外，上乘嘅體驗其實係揸住車聽音樂。無首好嘅Reggae襯底，揸Pegassi Tezeract撞警察、FMJ約女兜圈都無vibe啦！所以幾時都話，你嘅人生需要背景音樂。今次等我地一齊遁入架空世界，由GTA第一代嘅廣播音樂開始探索，去到宜家最多人玩嘅GTAV，感受下音樂點同GTA世界交融、擦出火花。

“I put the cheat code in, I got the money and the infinite lives, this Vice City, bitch.”

Wiz Khalifa & Curren$y -From The Start

前言：行是音樂之成

Adam Levine首本名曲一炮而紅嘅音樂劇情電影 <Begin Again>入面，一開場時Hulk係車播唔同pop songs，但無一首啱聽。佢隨手揼走CD，係當代音樂製作者對「當代」音樂嘅不滿。今時今日，大家係車入面聽預設嘅radio，聽到自己唔仲意嘅歌一刻，無隻CD一嘢揼出車，真係好唔爽。就好似係臺上揸住支結他，唱到興起好想學Jimi Hendrix一嘢揼佢落地時，耳邊響起一聲：「Stop!無錢買過支同交租㗎啦！」然後吞左啖激情佢。Roarrrr！真係好唔爽。

（Begin Again, 2013)

不過，音樂本來就係知行合一，聽到JONNY B GOODE時想學Back To The Future入面Mc Fly咁癲身癲勢反手彈結他；聽到Just a broken machine -Mo-on-ca-ke時想抬頭望無際嘅星空氹氹轉；聽到鬥牛梗-我很掛念你時，好想係馬路大喊bb唔好走啊bb。好嘅音樂彷如魔法，令人想dance with the groove.

https://indiecast.fm/track/zNLFg0GZmKkE

（鬥牛梗-我很掛念你）

https://indiecast.fm/track/EEm5TCV1nV5E

（Just a broken machine -Mo-on-ca-ke）

而玩Grand Theft Auto更需要groove，除左搶劫殺人叫雞之外，上乘嘅體驗其實係揸住車聽音樂。無首好嘅Reggae襯底，揸Pegassi Tezeract撞警察、FMJ約女兜圈都無vibe啦！所以幾時都話，你嘅人生需要背景音樂。今次等我地一齊遁入架空世界，由GTA第一代嘅廣播音樂開始探索，去到宜家最多人玩嘅GTAV，感受下音樂點同GTA世界交融、擦出火花。

3D世界的廣播音樂進化史x保持2D世界的indie

1997同1999年，Rockstar先後發佈GTA 、GTA2，畫面設計都係2D。廣播音樂由呢刻開始係GTA世界扮演不可或缺嘅角色。

1906年平安夜，加拿大發明家Reginald Fessenden（九龍塘范信達道就係以佢命名）首次係美國普羅大眾面前以廣播形式播speech以外嘅野——音樂。以往廣播只作航海用途，係海軍傳達命令、消息同航運物流之間嘅溝通媒介。廣播融合音樂，成為廣播音樂，同時普及化，慢慢成為人類日常生活一部分。

三次元廣播音樂嘅流行帶動埋二次元電玩入面嘅音樂發展，但GTA唔係單純插入音樂就算，而係考慮到虛構vs真實係形以上嘅分別。

(Submarine Signal Company engineer Robert Williams with a Fessenden oscillator during testing on the tugboat Susie D in Boston Harbor, 1914. Photo:NOAA Central Library)

前任Rockstar音樂製作組成員Colin Anderson話，GTA最早期嘅構思係遊戲入面所有廣播音樂都係原創、虛構歌手。因為一但放左現實歌手嘅歌入去，就唔再係平行時空。呢個構思得以實現，GTA七個廣播電台嘅歌都係由Rockstar工作人員創作，仲出左隻音樂CD。唔係為增加銷量咁簡單，CD係接通現實與虛構世界嘅橋樑，PC版玩家嘅遊戲光碟係播放器入面加載成功後，可以將佢拎出，再替換音樂CD。當遊戲中嘅角色上車時，歌曲就會隨機播放。亦可以好似平時咁，單純將CD放入播放器，遊戲以外聽歌。虛實交替，上車，入碟，進入美麗新世界。

N-CT FM: 定義了GTA 廣播樂以後的樣子

“Hip-hop power. Music with more muscle.”-N-CT FM

作為犯罪動作冒險遊戲，玩家穿梭於自由城、聖安地列斯同罪惡都市之中，經常上車跳車落車入銀行打劫。當聽到警車車鳴聲，就知道係時候學baby driver咁戴上耳機（轉電台），潛入N-CT FM嘅搖滾樂，係電音之中風馳電掣，槍林彈雨下舞出一道道車胎痕。

N-CT FM係GTA首代嘅廣播電台，佢主要播放East-coast hip hop, gangsta rap。唔單止係首個GTA系列中嘅收音機，關鍵在於帶動整個系列嘅歷史發展方向同埋奠定音樂類型、遊戲形象等等。正如GTA開發人員同工作人員所講，佢地嘅總體想法係將市面遊戲從未有過嘅新鮮、創新功能加入GTA，每個成員都可以提出可以想像嘅任何東西放入GTA。最初提出嘅元素之一就係令遊戲擁有唔同音樂類型嘅收音機。當時唱片公司並唔支持佢地，對電子遊戲作為一種媒介持懷疑態度。所以，無現實世界音樂support兼想自成一個幻想音樂新世界嘅動機底下，佢地走上製作原創音樂嘅道路，跟模擬廣播電台、虛構藝術家合作。

Colin Anderson（處理搖滾、放克、鄉村曲目）同Craig Conner（處理電子、流行、嘻哈曲目）對早期製作N-CT FM音樂至關重要：Ghetto Fingers “On the move” , Da Shootaz “Grand Theft Auto”係佢地作品例子。音樂組人員共同有一個明確目標：整一首hip-hop track，展示咩係GTA。而Da Shootaz “Grand Theft Auto”, literally成為左GTA。整完後，Rockstar絕對相信音樂屬於遊戲嘅重要元素並開發唔同嘅音樂電台；而呢首歌，就成為GTA其他歌曲嘅指南針。

哲思：背景音樂的角色？

翻黎現實世界，隨住科技發達，有好多媒介為人類帶黎視聽享受。由1925年黑白電視嘅發明去到今時今日VR體驗，潛移默化底下人開始仲意分心，同時接收視覺、聽覺嘅信息。Forrest Gump跑緊個陣有bgm、姜濤淺笑個陣塊面彈出紅暈effect加尷尬笑bgm、係麥當勞食包有bgm、搭車碌ig耳機有bgm、揸頭文字D時有bgm、落club跳舞有bgm、聽般若波羅蜜心經有蓮花盛開流水潺潺bgm、衝上去同人表白前戴上耳機開bgm..以至好少人會再坐係黑膠唱碟機、收音機隔離靜心聆聽當中內容。我地聆聽同時，品茶都好，無可避免出現multitasking。

背景音樂似乎就真係背景音樂而已。但GTA有種難以言喻嘅魔力，玩家可以做咩都得，射殺途人、停低等綠燈、買新衫、轉台聽jazz、食煙飲酒吸大麻紋身、訓覺、睇電視入戲院…全由自由意志決定。呢個遊戲絕妙之處令我放心盡情享受每個細節。例如玩GTA:自由城故事時搭的士聽到Head Radio播完Flytronix “Past Archives”之後嘅國際新聞，預言左2014年克里米亞危機：“And now the international news. Riots in the streets today in Crimea, Russian community hit the streets today” 。真係痴線，我係現實中聽住商業電台都唔會留心聽，顧住一路工作。

音樂究竟係主角定配角？Vanilla Unicorn入面， Juliet同Nikki係我身上un下un下個陣感覺意亂情迷，係Britney Spears “Gimme more” 令我遁入情色語境，抑或係本能衝動？拎足五星星，幾架警車set roadblock，一架未裝防彈升級嘅GTR衝埋去，突圍而出，係咪Tyler the creator “ Garbage” 嘅槍炮bgm振奮人心，腎上腺素飆升先mission possible到？

(Britney Spears-Gimme More)

(Tyler the creator - Garbage)

Ah shit, here we go again

都無相關，哲思留番我講就得，太沈氣。最緊要學識點玩GTA，唔好一尾用坦克車撞人，試下做企起坦克車前個嗰人，用「反常」、trailblazing方式體證、挑戰虛實世界。入Vanilla Unicorn劈夠五杯whiskey，再打比Trevor，揸架高爾夫球車，聽住West Coast Classics一齊去利他邪教營地探險；現實中就凌晨捉另一半去飛機維修區聽住法文歌學Moonrise Kingdom咁跳舞，或者以fight club為藍圖化身波特萊爾宣揚平等，聽住怒人-04神屌人去打倒乞衣。

Ar shit, here we go again.