每晚封區「六合彩式」搵病患，你果區今日中咗未？
（本文以香港粵文創作）
由今年1月23日（剛剛好喺香港出現首宗武漢肺炎個案一周年）香港政府忽然執行封區政策至今，封區政策愈搞愈亂，甚至近日開始一晚封幾處，每晚都有數以千計嘅民居加大量地鋪、樓上鋪受影響，擾民式檢測所導致嘅「洗頭客被困」、「補習學生被困」等情況日日見報，但搞咁多、咁大陣象，每每得出嘅結果都係「null result」，或者好彩地搵到一宗半宗「懷疑受感染」、「初步確診」嘅 case。
想當然地，政府都會同你講「檢測不應計較搵到幾多宗個案」。Okay！無問題，我唔去質疑你搞大龍鳳搵 case 嘅成效問題，不過你定義點樣去 set 要搞大龍鳳嘅區域，我就要打一個大大嘅問號。
按照而家執行緊嘅準則：
全港所有地區：如有住宅（包括商住兩用）大廈新增一宗或以上源頭不明的確診個案，或其污水樣本檢測呈陽性，顯示可能存在感染風險，均會被納入強制檢測公告。
指定區域：區內住宅（包括商住兩用）大廈如新增一宗或以上的確診個案，或其污水樣本檢測呈陽性，顯示可能存在感染風險，均會被納入強制檢測公告。
（四個指定區域，分別為：「佐敦指定區域」（即東至彌敦道、南至柯士甸道、西至渡船街、文昌街、文匯街及廣東道，北至甘肅街）、「油麻地／旺角指定區域」（即東至彌敦道、南至眾坊街、西至渡船街、北至登打士街）、「紅磡指定區域」（即東北至差館里、東南至船澳街及寶來街、西南至溫思勞街及紅磡南道、西北至漆咸道北），以及「深水埗指定區域」（即西北至欽州街、東北至大埔道、東南至楓樹街、西南至荔枝角道）。）
工作場所：如某一個工作場所出現兩宗或以上的確診個案，便會被納入強制檢測公告。
一個大廈會否成為「六合彩式」封區嘅得獎者，除咗基於有無源頭不明嘅確診 case（或者以指定區域而言：有無確診 case）呢個準則以外，仲有一個情況係「污水樣本」會否搵到武漢肺炎病毒基因。政府嘅角度認為污水中搵到病毒基因就等如搵到隱藏於區內嘅感染者。
Are you sure？你肯定搵到嘅係隱性個案，而非武肺康復者？早幾日當政府公佈因為污水樣本中招，而強制黃埔花園三期嘅兩座樓住戶要做檢測果時，當區區議員兼醫生鄺葆賢就已經質疑過 [1]，相關座數本身就曾經有人受感染而且已經出埋院，污水樣本搵到嘅病毒可能就係來自康復者嘅。不論係本地嘅研究 [2] 定外地研究 [3] 都講明，即使康復過後再做一般檢測，呼吸道已經再驗唔出病毒（不論樣本來自深喉唾液、鼻腔拭子樣本定咽喉拭子樣本），糞便樣本仍然有機會驗到有可具傳染性嘅病毒。所以除非有確實證據說明大廈污水系統有傳播風險，否則就唔應該學似政府咁，簡單將「污水樣本中招」等同如「有隱藏患者」。政府喺明知呢一個前提下，仍然好似當人弱智般玩二元區分，最終一宗 case 都搵唔到，打擾完住戶一句 sorry 都唔洗，如何服眾？
講起檢測方式，根據翻受過「六合彩式」封區嘅得獎者（a.k.a. 住戶、商戶）所言，政府唔會事前知會輪候安排，無人會知幾時到你落樓檢驗，好彩就一開始，唔好彩就等到凌晨一、兩點。先不講呢個「無安排」嘅安排有幾咁擾民，數小時嘅等待過程撞正食飯、沖涼時間，等待檢測嘅住戶隨時會食食下飯或者沖沖下涼就被通知要落樓檢測，樣本收集會否因為進食或者沖涼而受影響呢？
香港嘅做法就只有喺深喉唾液檢測中要求受檢測者早上擦牙進食前留樣本，至於鼻腔拭子樣本定咽喉拭子樣本都無類似要求，但觀乎外地 [4] 就算做鼻腔拭子樣本或者咽喉拭子樣本，通常包括要求受檢測者檢測前30分鐘到2小時內不要飲食、擦牙，甚至會講明事前唔好吸煙、洗鼻等。我唔知香港無定立限制嘅原因係基於醫學原因定其他因素，但肯定嘅點係，若果香港跟外地做法嘅話，就唔可能做到每晚封區，難道要等待檢測嘅人唔食飯、唔飲水，白等你唔知幾時先通知要做嘅檢測咩。
Oh…… sorry，我或者太過想當然，同一區封完幾日再封過 [5]，撰文當刻仲公佈無須中國科興疫苗將數據刊登於學術期刊 [6]，既然政府當香港人係「人體白老鼠」，又點會理擾民與否？
（全文同步刊於：https://petermasklo.uk/hongkong-random-compulsory-testing-failure/）
[1] https://www.facebook.com/apokwong/posts/10159128152668307
[3] https://www.sciencedirect.com/science/article/pii/S1201971220302794
[4] https://www.ncbi.nlm.nih.gov/pmc/articles/PMC7129371/
[5] https://hk.appledaily.com/breaking/20210204/ONVSKFZX3NH65DET2OVCGWTHC4/
[6] https://hk.appledaily.com/local/20210205/VOPRXXSMX5BEHBHDGAGKHHQVJA/