人生第一次兌換Likecoin

仲有唔夠24小時，讚賞公民Web3將會正常上線。本來我就完全無打算成為讚賞公民，其實最主要都係錢問題。以前讚賞公民制度，相信大家都記得係每個月只需要支付＄5美元便可以成為讚賞公民。雖然＄5美元對我來講唔係一個大數目，但係始終我圖片變返自由工作者（即係失業），加上身體抱恙，所以決定暫緩成為讚賞公民，最少等自己身體狀況好返，有能力創作先再成為讚賞公民都未遲。時間快轉去到今年2月，見到讚賞公民Web3正式公布，回到最初可以用Likecoin取代現金嘅年代，我就開始研究點樣可以達到門檻。

老實講當初第一次聽到嘅時候，其實我自己心入邊已經打定輸數。因為如果按照目前或者以往紀錄，預計最少要20,000 Likecoin，咁佢好多前輩來講就絕對無問題，但係對於我呢啲雖然2018已經係Matters創建ac，但係中間荒廢咗咁多年嘅人來講，霎時間要搵到20,000 Likecoin絕對係天方夜譚，老實講果下個心係有啲灰。雖然可以用Likecoin比，但係自己仲要面對唔知仲有幾耐先至達到呢個門檻要求，其實都真係幾失望。其實你可能會問我做乜唔用錢買Likecoin，又快又簡單解決問題。容許我咁樣講，雖然我對加密貨幣有一定嘅認識，亦唔介意俾錢，但係如果有其他方法，我唔想即刻用錢解決問題，因為我係果種唔到最後一刻，唔用錢解決唔到問題先會用錢嗰啲人，咁所以本身已經諗住放棄，反正我相信總有一日可以達到目標。

凡事總有轉機，最近幾日當我係度睇Matters嘅時候，官方公布成為讚賞公民嘅門檻大幅下降只需要5000Likecoin，霎時間我又重新覺得世界充滿希望。但係遺憾嘅係，截至琴日為止，我手上只有大約4600 Likecoin，距離門檻相差400 Likecoin，咁所以我就正式開始踏上我嘅尋找Likecoin 之旅。

係繼續支持，好多謝你留低繼續睇落去，多謝。希望你都可以首先慷慨解囊，係下面拍5下手，作為繼續支持我創作嘅原動力，廢話唔講，繼續～

咁我第一時間諗到嘅當然係MyEthShop，咁就梗係諗都唔諗直接將Likecoin由 Uphold轉移去MyEthShop。作為第一次兌換嘅新手，咁我就梗係諗都唔諗放咗入去個人錢包，結果一開始就出師不利。我係Uphold成功轉移後，我不停F5都未見到MyEthShop個人錢包顯示有新增餘額，所以我好擔心。兩邊頁面不停F5，結果5分鐘後先見到Uphold頁面顯示正在處理，果一下個心先定一定。大約過多5分鐘後，亦都係MyEthShop見到有正在處理中嘅紀錄，總算可以放下心頭大石，因為可以肯定我輸入嘅收款帳戶沒有錯。大約等多20分鐘之後就顯示到成功轉入，正當我懷住滿心歡喜諗住兌換嘅時候，突然諗起以前聽人講過，MyEthShop有最低匯出要求，之後我專登走去查，結果發現最少要10,000 Likecoin先至可以匯出，咁我就開始即刻搵有邊一個交易所係唔使要10,000 Likecoin先至可以匯出。之後好彩好快就搵到Liquid，最低會出要求係500 Likecoin，而且手續費是200 Likecoin，雖然有啲高，但係以我手上持有嘅BTC，最低兌換要求絕對足夠。所以之後就決定係Liquid完成交易。

正如頭先上面咁講，我將我身上所有嘅BTC傳入咗去MyEthShop 嘅個人錢包，結果又要花少少手續費轉返去交易錢包，而且仲要等多20分鐘。Ok，Fine。當我自己無做足功課，當交學費。等咗20分鐘之後，終於成功轉到去交易錢包，之後就將手上碩果僅存嘅0.0021 BTC轉過去Liquid。又等多20分鐘之後，終於成功係Liquid見到我啱啱傳過去嘅BTC。順帶一提，去到呢個時候我手上淨係得返0.00195 BTC，不過要買 Likecoin 絕對綽綽有餘。

係兌換成Likecoin之前，我諗應該係純粹兌換到可以成為讚賞公民嘅門檻，還是將全部也兌換成Likecoin。原本我真係有諗住剩低果啲兌換做現金，但之後瞻前顧後，如果我將剩低嘅BTC兌換成現金，我除咗要比兌換同出金手續費外，銀行仲要收多我一次手續費，咁所以我決定將全部都兌換成Likecoin，然後再進行委托。反正委托得到嘅利息，比我放喺銀行嘅錢利息仲要高Www

兌換過程，之後點樣由 Liquid 轉賬去到Likecoin，我相信呢啲 Google大神都大班教學，甚至乎你係左邊“尋找”或者右上“搜尋作品、標籤、作者”會有好多唔同嘅教學，咁我就唔多講啦。

咁成功轉入Liker Land之後，我就跟住 Daisy 大大 呢一篇文章 偷步成為『最早期委托者』。（雖然無獎，不過正所謂：執輸行頭，慘過敗家Www）之後我就將啱啱新鮮滾熱辣兌換嘅3600 Likecoin進行委托，然後再將之前係其他委托轉移到 Civic Liker，等待21號正式成為讚賞公民。

最後，如果你手上Likecoin只有很少，如果想馬上成為讚賞公民，我相信你唯一一個方法當然係要真金白銀去買，因為除咗呢一個方法之外真係無可能一步登天。當然你都可以選擇繼續創作黎都賺取Likecoin，雖然時間會比較漫長，但係當成功達到5000 Likecoin門檻之後，我相信你當刻成就感一定會比用錢買嘅快樂，期待有更多人可以成為讚賞公民。成為讚賞公民之後，大家記得記得記得聽日去參加呢個活動。

其實真係好突然，完全無諗過三日之內會創作到兩篇文章出黎，加埋仲要睇新車發佈會，而且仲要幫朋友組裝電腦，真係好眼瞓。雖然係辛苦，但係我幾享受成個過程，不過我個肝已經係度投訴，我再唔休息我應該好快會又病。好啦咁就多謝大家，希望走之前都可以慷慨解囊係下面拍5下手支持我，星期六再見。どうも。