【當年今日】沒塗牆的發奮圖強不徒長

2020/9/27 在繼續跟紫色紅蝸牛打那未完的牌局＠香港

一入宮門等被宰。一年又過，一個東都未打得完，可以有幾大上落呢？

①荒島建法式辦館呢個艾D牙，萬幸，吹消咗。

②皇上同二皇爺保持感情不變，繼續僵持不相往來。我仍然係中間果舊薑，磨用。

③如花似的宮女雖然等到變阿嬋，最後都童話式咁畀皇上點佢燈，藍燈籠追封燈。

④仍然被已出宮人士設定為早已得道不屑人間煙火，聚會依舊冇我份。到今時今日宮中竟然重有真天真人士羨慕我，「everybody likes you」。呢款黃蓮長於兩頭唔到岸，屬大佬級惡頂，習慣習慣成自然都習慣唔嚟。個個以為我係李世民，實則痛過李世安剝牙前果碌針，唔上唔落卡到陰。

⑤真假兩位太子無再揾過我，除咗假太子有一日因為荒島糧盡，Cast Away，想開我個喼摷嘢食而兜大圈問我個密碼，咁大把。大家 keep 得住唔出聲當無事。

⑥鄙人應該唔輸得過柴九兄。邁向第二個十年。係，法國紫色紅蝸牛，係打得慢過一般蝸牛。不過北圈都未到，點攰都冇奶油自己推牌。喺有人坐得到呢個最（仆）佳位置之前，唯有繼續放長雙眼等自摸。既然我從來冇偷偷塗牆，就死唔信發奮只落得徒長。

2019/9/27 寄居＠馬爾地夫

皇帝嫌悶要出巡攤吊床，我就負責來回拎水拎防蚊噴埋龍體同埋伴談。偶爾悶爆，我就自己退下，行去岸邊散下心。

琴晚我話我有錢銀上嘅壓力，左耳都唔知有冇入過，就叫我食雪糕減下壓。好快轉個話題，話二皇爺控制唔到酒吧嘅開支，呢兩個月蝕好多，但重要畀自己七千歐人工咁高，又出加班費畀個仔。皇上龍顏大怒表示呢個時候只應該有夠供樓嘅人工先make sense 喎。

喂，皇上你話交晒啲嘢畀個賢弟，就真係無睇條數㗎啦？皇上你又唔係未衰過，啱啱先亡完國咋喎。好，我唔再進諫，唔想重演喺西班牙果次咁畀人當眾屌我負能量烏鴉嘴屌足半個時辰。

我係好愁，皇上知我好愁，我知皇上知我好愁，皇上知我知皇上知我好愁。但未輪到顧我呢筆。明㗎我，慣。

二皇爺瀨到咁杰你都話至少都要有錢供樓。千枝針插在心咁 feel 呀我。係因為我冇瀨過嘢又冇呼天搶地所以唔使出糧過我？我一個大洋都冇，光酥餅食光晒，米缸都無米好耐啦，你叫我食雪糕？！皇上你堅離地吖定係堅老啦？

開口埋口日撚日同冚世界講我都係皇族，人人以為我得咗道。咦，又唔錯得晒喎，我就快升天。

大家都係揾餐晏仔，隻寄居蟹攀枝，你就等我自行躝屍？林奠做得啱，原來真係要打橫嚟行先得。