My little detour - 《傳說最古老的America Town - Cholula》

2022 年 5 月 21 日

7Aug 2019, Wed (Day 69 晴->雨, Puebla-> Cholula -> Puebla, Mexico)

唔知點解最近都好期待早餐，可能平時見人地話早餐is great所以好期待，但so far除左Oaxaca 嗰間係好滿意之外，其他都正常或略為敷衍（熱香餅ok但份量細）。而又唔知從咩時間開始，我早餐好似食極唔飽咁，所以每晚都會諗第二日早餐有咩食。

今日無疑係失望嘅，我仲以為遲左未搞掂，原來已放晒出嚟。係麵包同埋石榴同仙人掌果自助餐。個齋包係ok嘅，係法法地包的朋友，好彩水果我都鍾意，但由於唔夠飽，我食左兩份包， 2個仙人掌果同三粒番石榴。不過有咖啡補數，因為見住佢煮而又聞到好香，呢到加返少少分。

由於今日想去的美洲最古老小鎮離Puebla只係十幾公里，所以慢慢地執野慢慢地出門口。我無跟hostal staff的指示搭巴士轉directo, 因為睇maps me其實唔遠，半個鐘內可到，咁為省卻搭local bus遇到的難題，我梗係行過去啦，而其實亦都真係好順利。去到咁啱有個人大叫Cholula, 原來佢估到我去Cholula, 所以叫咁大聲提我，佢只不過係巴士站對面擺緊檔咋😱! 單程車費7.5 peso, 搭成個鐘真係堅抵。眼見架車離個centro越來越遠，但我仍堅持總站落車，因為回程時就算搵唔到其他上車點，我都總可以知道邊到搭返去，而雖然落車地點同centro確實有點距離，不過對我嚟講仍然係walking distance🤣

係行去centro期間見到間辦館feel但大少少規模超巿，的野都ok平，行完出嚟有個墨西哥uncle撩我講野，佢英文好流利喎，主要係睇下我對墨西哥印象如何。之後行過mercado,行左轉仲買左雙蕉添（3 peso)。唔使太耐就行到去centro, 見到好大座連埋的教堂 Convento Franciscano de Gabriel Arcangel 同Capilla real。

不過對教堂唔大興趣嘅我，望左兩眼就走。然後朝遠眺那高山上的教堂Nuestra Senora de los Remedios進發。

其實同嗰幾座教堂都好近，只係要少少時間行上山。可惜今日多雲，我無法睇到教堂身後的火山，太可惜了。不過無法啦，天氣總是不似預期。而山下正正是一座金字塔的底部，不過我無去，反而去左睇巿集。

呢個巿集主題係natural, 有好多手工梘、咖啡麵包賣。而我就試左杯咖啡（15 peso)，飲得出好多香料味。跟住我仲食左杯雪糕，係熱情果味，好味喎，仲有籽以示新鮮添 (10 peso) ！

由於仲未食晏，本來target食 tortas, 但後來因為想去廁所，所以去左一間檔仔食左個set, 其實我都唔係好知有咩食，只知個set 50 peso。最後上左一碟意粉、一杯果味水同埋一碟有豬肉的綠色湯同tortilla。因為中間佢地曾經問過我要chop定rib, 我以為的野未上晒，但諗深一層， 50 peso何來咁多野，亦係呢個時候佢問我有無漏單，我就知道...雖然我仲餓過之前，但跟餐嘅已經到晒，佢地仲好好refill本果味水比我添。