Uber 沒完沒了的爭論?

Uber，相信大家都聽過佢個名。當然除咗係因為佢啱啱係香港結束咗外賣速遞服務之外，亦都係因為由成立到而家咁多年以來，無論係邊一個國家同地區，Uber應否合法化呢一個問題咁多年以來都浮浮沉沉咁出現。雖然而家好似好多地方都彷彿好似搵到解決方法，但係解決方法又好似重新回到問題起點咁樣無限輪迴，咁不如就睇吓所謂嘅解決問題方法同埋實際嘅情況。

首先講咗香港嘅情況。如果大家依稀記得，Uber 當初政府係邀請Uber係香港發展，之後順便公布要發展智慧城市同推廣5G應用。但係好笑嘅係引入無幾耐，就因為好多的士嘅投訴，因為Uber嚴重影響佢地生意，而且某程度上將『白牌車』合法化，所以他們多次要求政府部門解決和取締所有問題。結果政府就用『沒有第三者行車保險』為理由，多次進行執法行動，並拘捕很多駕駛Uber的司機。首先我要說明，我個人對於香港嘅的士司機超級討厭，加上我以前也是兼職駕駛巴士，所以對他們的行為有一些了解。兜路、揀客、拒載呢啲情況經常出現，明明知道自己有咁嘅問題，但因為唔夠人哋競爭所以就用盡一切方法解決影響佢哋生意嘅人，但係就無諗過點樣解決自己本身嘅問題，呢個無論幾時睇到真係一個笑話。

另一方面，政府口口聲聲話要破舊立新，每年財政預算案唔知撥款幾多億去發展創新科技事業，雖然有錢總好過無錢，但係一個電子道路收費計劃嘅雛形，由我中學讀書到而家，都已經超過十年，但係都仲仍然停留係規劃階段。即使近年來政府終於推出優質的士計劃，但係由研究到推出都研究咗最少十五年嘅時間，明明只係需要增加考牌制度同增加司機培訓就可以即刻成事，都可以用咗超過十五年時間研究，咁樣更加可以諗到，如果要發展Uber 呢一類網上預約汽車平台或者只係研究如何可以合法上路，我相信都要花上很多很多年嘅時間，所以Uber都仲係用一個含糊不清嘅方法喺香港生存。

本應就相安無事，但係直至2018年發生了一單車禍，導致有人死亡，整個問題再一次浮上水面。其實一直大家都見到呢個問題，只係一直無發生問題所以就無人主動理會。雖然果次意外之後政府再一次用『駕駛汽車以作出租或取酬載客用途』理由控告28名司機，但係之後到而家，即使而家係疫情期間，都無再特別聽到票控呢一類司機嘅消息。雖然現實係佢地仍然係唔合法咁樣載客，但係基於各種原因，例如安全性（可以即時在網上或App追蹤）、明確嘅收費（所有費用於預訂嘅時候已經列明）、同埋更加有禮貌（最少我到而家搭咁多次Uber啲司機同我都有講有笑），我相信其實的士各方面都唔會比Uber優勝，雖然係比的士貴，而且繁忙時間更加有額外嘅附加費，但係俗語都有話：與其係香港養車，咁不如我一日日搭的士返工可能仲有賺，咁所以我始終覺得，Uber優勝嘅地方絕對係校服贏盡口碑。

踏入2021年，Uber亦都宣佈正式收購HK Taxi，雖然我唔知道咁樣係好事定壞事，但係如果我就咁睇，對Uber嘅發展絕對係一件好事。首先，Uber未收購HK Taxi之前，本身提供的士數目極之少，基本上係預約唔到，好多時都會電腦自動改為Uber X（即係比較平民化嘅選擇，主要係中小型嘅私家車）雖然可以用一個比較平嘅價錢去享受到比較好嘅服務，但係始終影響到佢哋嘅收入，所以都係有少少唔好意思。（以前曾經同司機傾過，如果無的士嘅時候電腦自動轉咗做Uber X，佢地收到嘅收入就只有的士列出黎個個收費，唔會增加去到Uber X嘅收費）咁所以，而家多咗咁多車加入嘅時候，對乘客來講絕對係方便咗，因為等候嘅時間唔使咁長，同埋更加快可以搵到係附近嘅司機。其實係舊年12月頭左右，我亦都有試過係葵涌搭Uber Taxi去美孚，因為果陣時有折扣，所以計埋都係$10左右。相比起以前，我係App落單之後大約十秒就有成功預約，大約三分鐘之後便上車，所以絕對係比以前方便咗。

好啦咁講完香港，不如就講吓台灣Uber嘅情況。雖然最近幾年因為疫情未能夠出國，但係好彩以前搭Uber嘅時候都有同司機傾偈，甚至乎有留低電話交流，所以都可以繼續同大家講吓而家遇到嘅問題。咁當然啦，我知道呢度都有好多台灣人，所以純粹只係有一個遊客嘅角度出發，如果有啲咩不足或者想補充嘅，歡迎係下面留言。

咁首先就要講吓點解我係台灣選擇搭Uber。正如我係上面咁講，我以前係兼職巴士司機，但係有陣時日都會幫朋友出去外地公幹，主要目的地係日本，台灣只係一個轉機嘅地方。我人生第一次去台灣係2018年，去到疫情前我只有去過五次台灣，但因為每次都係公幹加旅行，所以每一次逗留都超過三個星期，所以某程度上我都算搭盡台灣唔同嘅交通工具。

首先就講吓台北先，雖然台北捷運真係好方便遊客，而且服務範圍廣，規模大，由台北去到新北。但係我相信好多住台北嘅朋友都知道，大部份人都會選擇自己揸電單車返工放工，因為雖然係好方便，但係自己駕車會更加方便，而且行人路動線嘅設計完全不利於行人（例如行人路之間凹凸不平，而且有高低差），所以自己揸電單車絕對比搭捷運方便。加上大部份遊客主要嘅活動地方都係台北車站到西門町附近一帶，所以大部份旅遊書籍都係推介選擇最貼地嘅方式，就係台北捷運。

但係假如你需要去一個遠離市中心嘅地方，例如松山機場以北或者淡水一帶，如果從台北車站出發，乘搭捷運時間最少也要半小時以上；即使選擇巴士，時間亦都相若，而且仲要面臨塞車問題，咁所以如果作為一個旅客，公共運輸交通工具就係最佳嘅選擇，因為幾咁無都可以唔使研究，淨係跟住張地圖就可以去到目的地，只係需要花上更多嘅時間。雖然你可以講，點解唔自己租車？我其實以前都有咁樣打算，甚至乎我可以同你講，我已經係台灣自駕環島遊兩次，但係到咗而家我都仲係唔敢揸車入台北入邊，因為交通情況實在太恐怖。

2018年4月有一日係西門町同朋友食完飯之後，就準備去內湖參加一個朋友舉辦嘅音樂活動，我本來都諗住搭捷運，但係我同朋友手上拎住兩支腳架，同埋大量嘅攝影器材，為咗唔影響別人，所以就諗住求其係街邊截的士。但係點知一上車個司機同我地講價，要收我地$600台幣，但係我曾經上網睇過，由台北車站包車去桃園機場都只係$1000台幣左右，所以我決定我地落車。雖然我唔知道實際價錢係唔係咁貴，但係唔敢咪錶收費呢樣野我實在接受唔到，咁所以諗其他方法。呢個時候我突然諗到搭Uber，所以就打開App，睇吓有無比較平嘅方法解決。結果好彩發現只係需要$400台幣左右就可以去到內湖。一上車嘅時候，司機即刻發現我地唔係台灣人，所以都好熱心同我哋傾偈。然後我同佢講頭先遇到果個情況，之後佢好坦白咁講，佢以前都係的士司機，呢啲情況屢見不鮮，而且唔理係咩人，都會發生呢個情況，所以拒絕呢種行為係正確。

完場之後因為同行朋友需要趕去TICC觀看演唱會，想當然我們再一次選擇了Uber，不過因為我需要去找台北朋友，所以先把所有器材拿回酒店。係搭車嘅過程，亦都遇到好友善嘅司機，咁所以我亦都有機會繼續了解台灣Uber嘅情況。雖然係交談嘅過程知道，Uber收取嘅手續費絕對比自己搭的士高，甚至乎可以係極高黎到形容，而且係要用自己嘅私家車，相對上投資係比較大。但係同的士唔同嘅係，Uber基本上可以不停接單，保證長時間有收入，相比起的士要等客，唔知等幾耐，收入絕對係有保障。而且係用車行嘅形式運作（當然都係那些年嘅時候），司機嘅質素、乘客嘅安全、法例上支援等等，絕對有更加大嘅保障，所以好多的士司機都轉咗去揸Uber。係呀，唔記得咗講，呢個司機以前都係的士司機黎。

之後2018年聖誕節，同幾個朋友係台灣環島自駕遊。係台中嘅時候，因為我哋係選擇住遠離台中市區嘅民宿，而且無提供車位，所以只可以選擇停係街邊嘅停車格，而且費事夜晚返黎嘅時候要再花時間搵位，所以選擇搭搭車返去台中市區搵嘢食。雖然嗰陣時我記得台中有首十公里免費搭巴士呢個優惠，但係如果我地搭巴士返去台中市區最少要轉三四次車，咁所以當然係選擇搭Uber。今次係台中亦都係遇到一個以前嘅的士司機，所以亦都可以繼續知道更多Uber嘅事情。係呢次嘅交流我先至知道，Uber完全禁止司機係車廂入邊飲食、吸煙同埋食檳榔；相比起的士可以係車廂入邊做呢啲野，甚至乎載客嘅時候都可以咁做，Uber絕對係提升司機嘅服務質素、車廂整潔程度同埋乘客嘅體驗方面落咗好多功夫。

雖然近幾年真係因為疫情關係完全無辦法去旅行，但係好彩我都仲同佢地有聯絡（唔好問我點解會有聯絡方法，因為嗰陣時好傾就交換咗，就係咁簡單）所以都可以知道自從2019年至今改變對於司機嘅影響。其實當初Uber更改成以的士方式營運嘅時候，因為大部份嘅年輕司機都沒有持有的士駕駛執照，所以當初一下子係無咗好多車，雖然佢地有的士執照可以即刻繼續開工，但係係果段期間做到有氣無埞唞。好彩之後更多嘅司機順利回到路上，令到服務可以回復正常。即使而家某程度上算係用的士嘅方式運作，但係始終受到Uber嘅嚴密監管，所以繼續係比的士優勝，所以即使而家疫情期間，佢哋嘅生意都無受到太大嘅影響，因為始終Uber唔係太多遊客第一時間會考慮嘅交通工具。

雖然台灣彷彿就為Uber尋找到另外一條出路，可以合法上路，但其實會唔會只係埋藏咗一個計時炸彈？因為長遠計，仲有始終有一日係會影響到傳統的士嘅營運。雖然憑着更平、更好嘅服務質素，但係始終覆蓋範圍有限，有部份地方或者偏遠地方未能受惠Uber服務，而且傳統的士優勝嘅地方就係可以隨時隨地攔截，唔使預先上網預約，對大部份人來講可能係更加方便，所以其實就係中間要有取捨。如果目前黎講，想方便嘅，就一定係傳統的士；如果想享受比較高級嘅服務，就可以考慮Uber。但係如果一直唔畫清楚Uber同傳統的士嘅界線，變得更加模糊不清嘅時候，我相信到時Uber一定會掀起另一場風波。

反觀香港，政府彷彿打完齋唔要和尚。Uber明明就係一個好好嘅例子，但係政府又要走去告佢話犯法，咁你引佢入黎又有咩用？我唔敢講如果用台灣果套方法會唔會成功，但係連大陸呢樣野都比香港成熟幾十萬倍嘅時候，政府就黎一個反其道而行，退出優質的士計劃，咁其實根本上係無解決個核心問題，只係比乘客多一個選擇，但係兜路、揀客同拒載呢啲問題完全無解決過，與其搞咁多嘢，不如將Uber合法化好似仲實際，更加有質素保證。

最後就可以講吓一樣都係同Uber相關嘅業務，就係Uber Eats。不過呢樣嘢真係可以好快講完，撤出香港嘅原因絕對係因為競爭力不足，相比起 Foodpanda 同 Deliveroo 呢啲鋪天蓋地嘅宣傳，Uber Eats嘅宣傳絕對係少之又少。而且相比起另外兩間外送平台，Uber Eats就算結業前，都未能夠提供覆蓋全港嘅外送服務，絕對係一大敗筆。加上同Uber一樣，對於外送人員嘅人工收取極高嘅手續費（如果我無記錯好似係15%），更甚者係中午嘅時候雖然可以係中環、旺角呢啲商業區接到好多單；但係一到夜晚，就算去到邊度都好，都剩係得1～2張單，同晏晝食飯時間做唔停係真係好大分別，所以其實咁樣已經知道夜晚係比較少人選擇叫Uber Eats，所以佢停止服務果刻其實我完全唔覺得意外，甚至乎係覺得俾人挨打咗咁耐先至執笠真係好犀利。係呀，你又無估錯，我以前都有做過Uber Eats速遞員，只係因為完全收入同支出唔成正比所以做咗一個星期就放棄。

衷心多謝你係咁幸福嘅又睇完一篇廢文，希望將來大家可以去旅行嘅時候，不妨考慮一下搭Uber同當地人交流，或者會有另一番體會。走之前希望大家可以慷慨解囊係下面拍五吓手，作為繼續支持我創作嘅原動力，お願いします。