關於我住在85大樓(旁邊)14天的八月下半
進到新房間第一件事，打開所有抽屜放煙霧彈。豈料打開第一個，竟然是一串未用過的小丸子⋯⋯痴線點解會係櫻桃小丸子？蠟筆小新我都明少少，咇個小新出嚟，起馬夠阻嚇力，咇個小丸子好似無乜殺傷力。any肥我掂都無掂，成個櫃桶拎去垃圾桶倒咗。
唔怪得房東話上手住客係一位「上大夜班很不喜歡陽光的女生」，她把所有窗戶、透光的地方，全部用黑色垃圾袋封死……
忙亂將近兩星期，星期六朝早終於舒舒服服坐係圖書館，睇下動畫，寫下無聊稿。側邊好多人拎住本厚厚既書自修溫習，睇到佢地有啲汗顏。啊，我今日應該係有job係身至啱數，結果係到睇巴巴托斯，《鐵血的孤兒》呀，十年前，唸起都PTSD。
恐慌性搬屋
第一次咁急搬屋。收到消息之後，8/10–11號南下，搵咗朋友好爺幫手睇樓。鬼崇房東實在太多，睇完之後，我覺得呢個房東幾好，簽咗三個月。住住先啦。好爺就話︰
「正常囉，講唔上好。」
唔係PK就得。最近急然唸起係香港租屋咁多年，每次退租都會攙心被地產或房東扣押金，實際上咁多年嚟都無比人扣過既，係唯一一次搬走既時候，因為唔夠半個月，但比業主屈咗全個月租金。都仲有一次租屋，一位香港人既業主好囂張咁話：
我唔租比香港人，剩係租比大陸人--當年正正係2014。
今次搵屋，發現呢種恐懼係源自於讀書時係台灣既經歷。搵好爺好大程度係因為佢曾經比人陰過，陰到變成專家。
這些年我們遇過的壞房東
想當年好爺係北部讀書，與同學合租。間屋漏水，有嘢爛咗，搵唔到房東幫手處理，明明房東就住樓下。而就係呢個暑假，一位屏東大學生就俾房東以各種各樣藉口扣清潔費，話佢住得污穢，清潔費4000。大學生話佢出錢搵清潔姐姐大掃除啦，1600蚊一次。房東唔OK，要扣曬兩個月押金。
香港有無呢啲情況呢？有一次我朋友係龍躍頭搬咗間村屋，搬入去唔夠一星期，客房盞燈壞咗，請房東修。房東唔理，朋友又好嘢喎，一年烏燈黑火。直到約就嚟完，房東話︰「呢盞燈你要賠喎，LED 1700蚊左右啦。」朋友呆咗呆，想話搵親戚嚟維修，只係500蚊左右。然而，失敗咗，房東唔OK。點解唔OK就唔清楚了，最後唔知點處理。
種種麻煩令我今次退租精神緊張，我明明一個月前就通知包租代管既地產，依然係不明不白。所以退租日，搵咗位台中朋友幫手傍住︰「別緊張，他們公事公辦。」sor……我好緊張，因為當日落高雄即日就要比押金，佢扣住，我會死。
結果算係OK，雖然細節有出入，但可以忽略。朝早八點回頭車公司搬走傢俬，簡單清潔完(好采平時有清)，食個早餐，十二點check out，搭高鐵兩點落到高雄，簽約，入房，又清潔，四點搬屋公司到，搬好之後，去IKEA、嘉樂福補充日用品……
住咗入新房間唔夠一個星期，努力打小強，暴雨漏水，同自己講，三個月，好采短租三個月啫。三個月之後，會搵到一間好既房，住返兩年。呢兩年繼續搵錢，兩年之後再算。
在台中未完成的事？
到高雄，又有重拾步行既興趣。掉轉頭講，最初去台中頭半年都OK，半年後發現無車，無交通工具，係無動力出門。台中東區由火車站一路去到台中醫院，算是我比較有興趣的地段，然而，好多店家愛開不開的，儘管古樸，我也不敢貿貿然闖進去……不，主因是有一宗案子沒有通過，我也懶得去了。而且這種訪問來到最後，可能都沒甚麼特殊，依然要回去找文獻，以群像方式入手。
另一個未完成的題目是學校。台灣的學校每一間外觀均不同，差異很大。香港的學校每十年一個段落，同一年落成的，樣子都差不多。偶然接到兩單job，影過兩間。這邊也複雜，要達成某些條件才好，只有建築物很無聊，最好能夠在上體育課時用移軸鏡來拍。同學在球場上跑步，建築物做背景。記得日本有位攝影師專門影小學生，小學生笑得好開心，好有趣。台灣同香港一樣，日本人、鬼佬提案影就得囉，東方人話要影？你搏咩？
不過，不勉強。我對拍照和寫作的態度差不多，有緣就做，無緣拉倒。
還有一個比較遺憾是抽不到時間去網友開的便當店。算是一位在FB交流了頗長時間的網友，本來預計離開前去一趟，臨時又給另一位朋友拉去吃印度菜，不用錢，就去了。
這次從台中到高雄實在是少有好好道別才離開，以往常常是到了新地方超過一年才敢跟其他人講。尤其是人愈來愈大之後，怕一個不小心做錯了甚麼要打回頭，隆重告別變了笑話，就不講了。
14天高雄
趁住圖書館未開門，同客戶拉鋸之前，出門食個早餐，影下相。行幾步就開始飄雨，唯有去就近建築物避一避。之後用咗半日覆客、報價、慣常每星期一次FB PO，去西子灣幫個客戶影相。之後散步去鹽埕站，飲咗杯双妃奶茶，勁平，45蚊。係台中求其一杯奶茶都要60蚊起跳，便當要110至120，高雄居然89蚊都仲可以食到一個有主菜既排骨飯。
經歷咗一年係台中工作折磨之後，好希望暫時係高雄能夠穩定地賺返錢。我無乜要求，只要公司唔炒我，我就可以繼續磨。依家居然又重現2014年，當時又係「走投無路」去咗間台資書店工作，開頭節奏好快，跟唔到，成日比同事小，成日都好驚比人炒，炒咗即刻無錢開飯。每日1030–2400磨足三、四個月，總算上軌道，平日工作應付到仲幫手捉偷書賊、捉自慰既犯人(到依家都唔明點解個條友要去住部ipad打飛機，CCTV影曬……)。
個年，鐵血的孤兒首播，街頭上好多命運仿似鐵華團既年輕人，向極權宣示決心。個時，我覺得香港好咗好多，好過我成長既年代，人人都自私自利，唔肯去謀取公義，總之自己有紅利落袋，理得佢乜黨乜黨。
10年後今日，我暫時喺另一個地方，同樣係圖書館睇《鐵血》，以前睇字幕組依家睇gundam info。以前知道捱一個月有一個月糧，依家連聽日會發生咩事都唔知。暫時唔唸住，愈唸只會愈不安，解決咗眼前問題再講──繼續返同小強死過。
每周一則城巿故事。突破點對點生活模式。
邁開腳步，劃出舒適的平面。喜歡原地遊的內容，請接續以下方關注更多動向：【 Facebook｜Instagram｜Patreon｜Gunroad｜Pinkoi｜500PX】