My little detour - 《等一個夜晚的車》

2022 年 2 月 18 日

17 Jun 2019, mon (Day 19 晴->雨 after 8pm（熱) Camaguey, Cuba)

如果前兩日叫無咩嘢做，今日肯定可以叫完全無嘢做🤣

其實我8點幾已起床，但由於今日搭好夜車（其實叫18號凌晨先啱），所以我叫自己瞓多陣，咁最後11點幾一路睇電視一路執嘢，諗住差唔多1點check out。點知未夠一點host上嚟拍門，原來佢話琴日見到我返嚟之後都無落過嚟，睇下我有無嘢。我話無事，順手check out, 仲再三confirm佢backpack是否可以放住係到先。一切settle down 後我就1點出左去了。

果然過左weekend, 條街好似熱鬧返少少，唔再係一個死城，我仲係之前死寂寂的街見到好多檔仔賣野（主要都係唔知新定舊嘅衫同玩具，仲有香港唔平一個的pinata)。

行行下見到pizza店好想食，於是以15cup買左個腸仔pizza食，熱辣辣出爐係正嘅！再行兩個街口有人賣Juice, 我最鍾意， jugo de mango唔該（3 cup)。

由於今日主要係hea時間，我又揀左係商場cafe坐，買左杯比平時檔仔賣嗰的無咁好飲的咖啡，我都唔知幾錢，總知10cup找返0.15cuc。

咁又比我磨左大半個鐘，本身想去埋食雪糕添，但得返tiramisu, 菠蘿味同士多啤梨味，試過唔試了。於是又再encore檔仔買mango juice (3 cup) 同 coffee (1 cup) , 係飲完芒果汁即刻飲啡喎，

我都覺自己痴線。跟手好似迷失古巴咁行極都搵唔返個centro。無嘢嘅，反正唔趕時間咪兜下。仲比我撞到生果車仔，問佢的蕉點賣，佢話2.5 cup一隻，咁我梗係要一隻啦，但佢嫌我，最後佢比多隻我， 5cup3隻，但其實我真係只想要一隻，因為我驚咁食法搭夜車會肚痛呀大佬。

又繼續無聊行，咁行法我已隊左兩隻蕉，最後都忍唔住再買枝水（0.7cuc)（其實諗住唔買架，驚飲唔晒又唔想攞多樣野，但大熱天時真係無水唔掂。再躊躇今晚點填飽個肚，又比我見到麵包鋪，咁我入去買兩個bun, 佢見我買咁少話唔收我錢，但我堅持，最後佢收左我1cup (原價應該0.05cup一個）🤣🤣，然後繼續遊蕩到7點。

咁遊蕩到7點幾返去，其實我今晚架車係凌晨0235，所以我諗住借個廁所就坐外面發呆，等到11點行去車站。點知開口借廁所時， host mama送左個紀念品比我，叫我要記住Camaguey, 真係有的感動。

佢仲諗住比條毛巾我抺身添，不過唔好搞住人，我都係洗個面去個廁所就出返去好d。坐到咁上下想借下廁所，點知個廳係開左燈開左門但無人喎，我唯巾繼續等，等到11:00pm諗住睇多次有無人（因為有電視聲架），原來host媽媽係飯廳嗰邊睇緊電腦。我同佢講我走喇，唔該晒佢，仲順手借左個廁所。出到嚟佢送我走...原來其實佢等緊我走然後鎖門呀陰公！其實我有問佢要唔要鎖門嘅，但佢話無問題無問題，真係衷心多謝佢呢！