來寫信給高牆內的朋友吧|給一個1/2同鄉的信
黎生,
你最近好嗎?以前你屋企報紙會登家人探望你或透露你在獄中狀況的新聞,現在已經很少能在媒體上看到你了,不知你現在狀況如何,我亦唔知祝你咩好,唯有祝你身體健康吧!
過往因為工作關係,我接觸過好多千奇百怪的中港台客戶,其中順德客戶算係最好服侍。順德人做生意都透出一種聰明同冰雪般的通透,說話不用講太多,已經明白大家想點。我媽媽鄉下係順德,因為我大約都有一半順德基因,都唔算蠢,所以同聰明人一齊,講野都慳口水。係呀,你同我算係半個同鄉,所以我對你有特別的同鄉之情。
你屋企報紙以前每星期都有你專欄,我其實唔鍾意睇,你文筆實在唔係我個杯茶。我寧願睇陶傑爆英式幽默,睇畢明講飲食講電影,睇馮睎乾玩文字遊戲,我都唔想讀你嘅專欄,但當冇機會再讀之時,我又有一絲絲後悔,身為一個日日計到盡嘅師奶,課咗金居然冇連汁都撈埋,實在係蝕底。
今日我想同你分享一單今年年頭發生嘅趣事。話說我老公發現台灣課金計落平過香港,就轉成響台灣課金,反正可以睇嘅野一樣。今年年頭老公一口氣課金一年,你台灣公司話有禮物送,結果物流公司分兩日送嚟兩盒一模一樣嘅易潔鑊。個陣時關於你公司走向嘅流言滿天飛,我同老公講「黎生就嚟執笠啦,隻鑊俾返人,咪鬼貪心」。老公致電後,工作人員發現真係錯手寄多咗,第二日就派人上門收走盒野。幾個月之後你真係執咗笠,好快台灣公司將課金都退還俾我地,但禮物就冇收返,於是我地賺咗你一隻鑊。
係咪好好笑呢,講真,隻鑊又幾好用,我成日拿嚟煮餸,我幫隻鑊起名叫黎生的鑊。然而,你背上的鑊沉重過我屋企隻鑊幾百萬倍都唔止……啊,唔講啦,再講又會變得好沉重好抑鬱,anyway,天氣轉凍,保重身體啊!
你的1/2同鄉上
![](https://assets.matters.news/embed/142cb009-101c-46a5-9066-5ede9ec753c7.jpeg)
(台灣的朋友,這封信用粵語比較能表達我的心情,有需要翻譯的地方請告訴我)
喜欢我的作品吗?别忘了给予支持与赞赏,让我知道在创作的路上有你陪伴,一起延续这份热忱!
![](https://imagedelivery.net/kDRCweMmqLnTPNlbum-pYA/prod/avatar/19d97cb9-a87d-4f98-817e-78fe49177765.png/public)
![](https://imagedelivery.net/kDRCweMmqLnTPNlbum-pYA/prod/avatar/19d97cb9-a87d-4f98-817e-78fe49177765.png/public)