功利的巴治奧 梁頌恆

梁頌恆因宣誓案被控非法集結罪成，即時入獄一個月。想起三年多前那次專訪，訪後稿件被大幅刪改，體無完膚。在他被一沉百踩時，在背後插多兩刀做了幫兇，既憤怒又內疚。現重貼當時的原稿，做個記錄。

雖然無辦法知道英文老師有否教他「China」的正確讀音，但華仁仔梁頌恆當年應該冇認真上中史堂：「測驗嗰時，其中一題問中國第一個皇帝係邊個，我諗唔起秦始皇，就求其寫『巴治奧』。阿sir嬲到話如果中史書搵到呢三隻字就成本食咗佢。」今日亂讀誓詞，或者原因一早深種。

意大利足球名宿巴治奧是梁頌恆的偶像：「九四年世界盃，一大朝早，我老竇就喺度尖叫，我一擘大眼就見到巴治奧入波，十六強對尼日利亞，八十九分鐘。係我第一次睇波。」講到巴治奧，人人都會記得九四年決賽時那球「炒到飛起」的十二碼：「世人著眼點放咗喺嗰幕。但其實呢個人後面係有好多故事。」我們都暫時放低「人鬼爭論」，睇睇梁仲恆點變成今日的「巴治奧」。

比起其隊友游蕙禎，其實梁頌恆的過去相對公開，他的履歷Google一下就很易找到：城大工商管理系畢業，之後在幾間公司從事網上營銷或者推廣的工作，總括而言是一個典型從商的人，絕對不會走到前線嗌口號、搞政治：「其實我都好功利㗎。喺商人同政治人之間，我毫無疑問比較適合做商人。」

梁頌恆的從商本領早在城大做學生會會長時已經表現出來：「我嗰年學生會搞咗個好成功嘅Notebook Program，少有咁賺好多錢。我哋搞聖誕舞會，又籌到錢俾返城大起新大樓。」梁頌恆話，做會長並非想要「張CV靚啲」，只是不滿前任的表現：「搞得學生會成績自然唔好。」

不過拎Third Hon的Baggio都識得在履歷上盡show「上莊」經歷，請過梁家傑做High Table Guest、同過當年的城大校董孫大倫共事都可以寫一餐：「係好功利嘅考慮。作為一個business人，識得咪寫落去囉。如果個HR真係打去俾孫大倫就大獲。」記者真的打過俾孫生，對方只笑稱「唔記得」。

在香港做學生會，政治難以避免。但當時梁頌恆政治意識唔高，又或者只是想識多個人，屢次與時任中聯辦青年部部長張學理接觸，令「青年新政染紅」論不徑而走：「當時係冇咩意識要防佢，冇咁敵我分明，未有嗰種敵對意識。」他指，平時所謂的「接觸」，都只是「夾一夾畢業禮seating plan」之類。而被認為是「染紅鐵證」的北京交流團，在他心目中反而增加對強國的負面印象：「有日我哋要趕火車定唔知飛機，但就遲到。佢哋夠膽死打兩個電話，就封咗成條公路，用兩部警車護航我哋去。我心諗，痴線，呢個咩鬼地方？」

但當年個個長輩都話上面機遇處處，梁頌恆都沒有放過機會，一畢業就先後到兩間有中資背景的公司工作：中郵電貿（電子商貿公司）和拉手網（網上團購）。雖然主要在香港返工，但經常回內地工幹：「嗰時未有嫌惡嘅情緒。」但隨著中港矛盾日深，梁頌恆亦慢慢唔想再北上，仲連回鄉證過咗期都冇再續：「但唔係好大義凜然咁：因為中共好討厭，所以唔想上去。而只係好功利咁諗：係生活層面，上面連食水都有問題，洗面都會發覺塊面黑色，覺得生命係受到威脅。」

曾為學聯當然常委的梁頌恆，多年的六四、七一，反國民教育和香港電視發牌集會都有到現場「打卡」，並非徹徹底底的「港豬」。但到後來「棄商從政」，甚至有「香港民族自決」的概念，其實係用商人思維考慮：「一國一制冇人想，一國兩制我唔覺得work，咁我剩番啲咩選擇？對於我嚟講，係用好功利嘅想法去睇，ABC，叉左A、叉左B，梗係揀C」

梁頌恆有親身參與雨傘運動：「佔領區就係一個實在嘅戰場。但傘後，大家無力感好重，因為無戰場。」後來一班未絕望的高登仔在討論區上研究「十八區區議會計劃」，召集一班後生仔反攻區選，梁頌恆都有參與討論：「當時我想喺南區參選。但入面有唔少政黨嘅足跡，我覺得唔應該係咁，應該係一班獨立素人去做。」後來他決定由自己的朋友圈開始召集有志之士：「當時係諗住，搵四百三十一個人，每區都隊一個人入去，做變相公投。」

「肯幫手嘅人好多，但要佢出樣，擺低張身份證落手做就唔係人人得。」最後只剩低包括他和游蕙禎在內的九人名單出選。

父親在梁頌恆小學時就過身，身為長子的他，能孤注一擲從政，除了靠一個小康之家外（母親在港島有兩個物業），還靠撐自己的媽媽和顧家的細佬：「媽媽係比較放手，又一直都投票俾所謂民主派……我好明顯係一個會去衝、去撞嘅人，而我細佬係相對穩陣嘅人，都係從商，但性格好唔同，令佢工作相當穩定，我都少啲擔心。」

但梁頌恆都並非完全唔理頭家：「我搞青政之後，特登買咗個意外保險。萬一我被人暗殺，應該賠到三百萬左右啦。」

「暗殺都包？」記者好奇問。「佢不會走出嚟認呢個係政治事件掛。咁狗？」

原刊於2016年11月17日《壹週刊》