音响老人院#2

廿幾年前係一個仲未人人有網上既年代 就算有都係用電話線+Modem download一張相要5分鐘 想聽歌都係用CD 以前住屯門 坐巴士來回九龍郁d都成粒中 就算用Discman 一隻碟都唔會首首歌都岩聽 除左trf果隻dance to positive

聽CD成日都要換碟好麻煩 呢樣自從開始成日聽歌 已經好困擾me 終於係1996年嘅某一日 有解決方法啦

我記得嗰陣時係一出就買 價錢唔係好記得 有個好模糊嘅記憶好似係1700蚊 當時喺公司差唔多人人都買一部 Kenwood Pioneer 都有

部機一到手 第一時間就用條光纖線接去部Discman 將CD嘅歌錄落去MD碟度 我記得部MD機好叻 佢detect到開始播歌 就會自己開始錄音 而且去到第二首歌嘅時候佢仲識得將佢分track 好快就製作咗一隻成隻都係自己想聽嘅歌嘅MD 用MD機聽返啲聲真係同CD一樣咁靚 最重要嘅係 當時我覺得咁樣已經係全數碼錄音 嗰陣時覺得自己好勁

嗰陣時錄曬全屋所有CD入面想聽嘅歌 同埋周圍問人借CD黎錄歌 開心到不得了 每一程巴士都係咁聽

因為呢個MD機佢有一個線控 我仲特登買咗一個短線版本嘅SONY E888耳機 呢個組合喺嗰陣時簡直係top one of my playlist 屙屎都拎埋佢去 聽歌多個聽人講嘢

當然啦 宜家知道其實MD本質上係唔會好聲過CD 因為CD係無損格式(LPCM lossless) 而MD應用嘅壓縮技術叫做ATRAC3 係SONY嘅proprietary 個原理同MP3一樣都係壓縮格式(lossy) 嗰Bitrate差好遠 大家亦由CD之後 MD開始 用壓縮格式聽歌過左廿幾年 多數人都係到近年先因為高清串流服務先可以再聽返無損格式

個順序係: CD > MD > MP3機 > 手機MP3 > DAP(非主流) > 手機(高清串流)

我記憶中 呢部MD機 耳機輸出好大推力 亦係好聽既 好過部Discman好多 (me唔記得果陣Discman係用邊部 只記得有3秒避震 有光纖輸出 大概係SONY啩)