回到平成時代的戀愛ー堀與宮村

《堀與宮村》係一套校園戀愛喜劇，最初只係四格漫畫。2007-2008年期間連載，2011年推出重製版；2012、2014、2015年推出OVA；2021年推出動畫版和電視真人版。相比起其他校園戀愛作品，《堀與宮村》多年來嘅人氣其實都大熱不減，而且更加係近年來少見嘅成功跨媒體作品。

首先講咗漫畫先，截至目前為止，大家仍然可以係HERO先生網站上面睇到2007至2008年期間連載嘅《堀與宮村》版本，應該算係最初嘅版本。而呢個版本2008年亦都開始推出單行本，但係礙於年代久遠同埋當時推出單項本數量不多，所以即使到了今天，這個最初版本的單行本仇家已經比當年貴上很多倍，而且可以算是有錢也很難買到心頭號（最巔峰時期好似一本最少是$10000円）。不過，如果以現今嘅話畫風，我相信大部份人（包括我自己）都難以接受，因為有少少似火柴人。

2011年開始推出重製版嘅《堀與宮村》，由萩原ダイスケ先生作畫。呢一個版本呢就開始接近大家近年睇到嘅漫畫風格，絕對係比較可愛同萌。即使到咗今日，仍然有好多人推介會呢一個版本嘅《堀與宮村》，因為目前市場上各種通販都仍然可以比較容易找到。

OVA我就係因為無睇就所以唔講；電視版就因為睇咗一集之後不是太能夠接受真人版，所以就放棄（雖然未到達原作粉碎機地步，但係風格仍然有待改善）而作為2021年1月新番嘅《堀與宮村》，亦都算係今年以來其中一套比較成功嘅校園戀愛動畫。首先講講製作公司先，製作《堀與宮村》動畫版嘅CloverWorks 係 Aniplex嘅子公司，背後嘅金主當然就係日本嘅Sony。所以相比其他製作公司，資金方面絕對不是問題，而且有Sony爸爸嘅支持，聲優方面絕對可以比較豪華。而曾經製作過嘅動畫包括有：《不起眼女主角育成法劇場版（冴えない彼女の育てかたFine）》、今季大熱嘅《戀上換裝娃娃（その着せ替え人形は恋をする）》同《明日將的水手服（明日ちゃんのセーラー服）》，同埋今日要介紹嘅《堀與宮村（堀さんと宮村くん）》。

要咁着大約講下故事大綱先，故事講述一個有女生：堀京子，係班上面除咗係一個美人之外，更加係一個成績優異嘅人，但係因為父母長期外出工作，所以每天放學後也要趕回家進行家務和接弟弟放學。而故事男主角：宮村伊澄，因為一次堀京子弟弟堀倉太意外而送他回家，發現堀京子另外不為人知的一面，然後兩個日久生情，成為情侶。動畫版到此為止，而原作漫畫中結局表示他們已經結婚並擁有一子。

大約故事就係咁上下，因為戀愛故事都真係無乜特別好講。咁點樣之前我上面會話係平成時代嘅戀愛呢？因為動畫版入邊整個時間彷彿仲未到達令和時代，讓大家繼續留係平成時代，好好回想過去。當中最容易分辨到就係即使係一套係2021年1月播放嘅動畫，但係當中主角所用嘅手提電話仍然係摺疊式手機，並非目前主流嘅智能手機；而且當中更不停穿插以前用電話下載音樂和用藍牙分享歌曲給同學等等現在已經唔會發生嘅事情，同其他作品有好大分別。就算係一直我都好鍾意嘅《果然我的青春戀愛喜劇搞錯了》，即使動畫版已經超過五年才製作最終章，但係當中嘅科技、唔同嘅店舖或者衣服等等亦都跟隨年代推進，手提電話亦都由摺疊式手機提升到iPhone。相比之下，《堀與宮村》保留了許多呢一類嘅細節，對好多人來講未必會細心留意，但係整體感覺有一種懷舊嘅味道，實在係難得一見。相比起千篇一律嘅劇情，呢一啲細微嘅地方往往真令我喜歡。

雖然校園戀愛喜劇每一套都彷彿都係公式化一樣，但係如果要講呢一套特色，其實又真係有好多與別不同嘅地方。除咗常見嘅情敵之外，更加可以見到比較罕有會放入主線嘅校園欺凌情況。伊澄由小到大都一直俾人認為係怪物，所以每逢分組活動都會剩低佢一個，而且即使係做寵物委員都好，同委員嘅人都會將所有嘅責任推卸俾佢，直到遇上京子和她的朋友才有所改善，更加係第一次有人分組活動才主動願意和他組成一組。點解我自己對於呢一部份咁深印象，或者點解會鍾意呢一套作品？係因為我其實都係被欺凌的一人，引起我嘅共鳴。老實講，我中學六年，都係俾人欺凌，所以我其實都身同感受。雖然以前班上面都有一兩個好朋友，但係有陣時為咗佢哋唔想俾人排斥，所以我都唔介意做醜人。不過好彩之後讀基礎文憑同高級文憑嘅時候認識咗一大班好朋友，而且因為中學時候我同學咁樣對我，所以我亦都認識咗好多外面嘅朋友。（當然全部都係好人啦）容許我又離題少少，其實校園欺凌呢個問題周圍都有出現，但係往往老師採取嘅態度就係唔會干涉學生，但係大部份嘅教育唔係應該以身作則，指導學生正確和錯誤的事情？明明校園欺凌係唔好同唔應該發生嘅事，但係點解身為老師可以視而不見？《堀與宮村》動畫入邊有一幕我係好心印象，就係分組活動嘅時候，老師竟然可以反問宮村為甚麼只有你一個人沒有人願意和你一組？雖然只係數十秒的畫面，但係果一下我真係覺得好有同感。就算你要我一個完成全部人的作業，然後他們拿取光環我也是沒有問題，但是為什麼偏偏唔可以讓我自己一個人一組？雖然只係動畫，但係真係令我好有同感。Sorry 又講遠咗，不過純粹真係想比大家知道校園欺凌呢樣野真係唔好受。

雖然《堀與宮村》只係一套動畫，但係當中嘅情節其實亦都好寫實。例如：兩個人放學後一起回家溫書、以為男朋友出軌等等。係而家呢一個速食文化盛行嘅社會，前者我都相信都仲會發生，但係後者我覺得已經唔會出現，因為如果係咁已經直接話分手。高中時期往往就係一個成長階段，係現今資訊爆炸性嘅年代，人嘅感情變得好脆弱，甚至乎婚姻往往只會視為為一張紙上為了扣稅嘅文件。而係動畫入邊，果一種清澀嘅戀愛，其實已經不存在。中間有一集講到，宮村因為家人去世而到北海道出席喪禮，但因為手機無電而未能失去聯絡。另一方面，京子因為聯絡唔到宮村發呆，例如在自動販賣機買飲品會不自覺買多一份，放學會等宮村一起回家等等。當宮村返到去自己屋企電話重新幫我上電源之後，即刻跑出去搵京子，而京子亦都啱啱走出電梯。呢一種咁純真嘅戀愛，唔好話動畫，就算日常生活依家都好難會見到。雖然依家網絡嘅方便絕對係拉近左人與人之間溝通嘅距離，呢種咁嘅失誤亦都唔會發生，但係往往就係因為太方便，彷彿生活之間就缺乏咗好多人情味。就算比着係我，如果真係聯絡唔到對方，我都會好心急，但係試問現今嘅年輕人，又會有幾多個會有咁嘅情況出現？呢一種咁清純嘅戀愛我相信只可以通過動畫回味。

相比起上個月介紹嘅《月色真美》，今次講嘅《堀與宮村》雖然都係校園戀愛故事，但係兩者都算係完全截然不同。《堀與宮村》講述嘅係高中生活，除咗要面對升學考試、出路等等壓力之外，係成長嘅過程中仲要面對同適應同輩嘅影響，愛情嘅觀感相對上比較成熟，思考嘅方面亦都比較大。例如有一小段係講倉太唔小心見到京子同宮村正在發生超友誼關係，之後係畫畫功課中畫咗佢地三個，然後喊住咁同宮村講唔想搶走佢姐姐，然後宮村好溫柔咁話只係借（雖然我相信等佢大個啲都會明白）雖然咁細微嘅細節，無睇到完作漫畫嘅人都未必會留意或者知道發生咩事，但係宮村呢一種咁細膩嘅思考方式，令到讀者明白到佢係一個好體貼、有深思熟慮嘅人。相比起《月色真美》，講述似係初中發生嘅事，比較細路仔脾氣嘅愛情，但係兩者都各有各嘅精彩。

今次嘅介紹大約就係咁啦，始終校園戀愛喜劇每個人嘅睇法或者領悟都有所唔同，反正依家日日係屋企唔知做咩好，不如又再花多少少時間，睇返一套簡簡單單嘅愛情動畫。另外， 呢套亦都係少數Netflix 有得睇嘅作品。咁就星期六再見，88。