Apple Watch 與我

相信大家一直都有睇開我嘅文章，都知道我對於電子產品只有一個宗旨：用最少嘅價錢，購買可以用到最耐時間嘅產品。雖然而家嘅電子產品壽命相對以前更加短暫，但係相對上功能已經比當年優勝，所以取長補短亦都算係一個合理範圍。月頭生日嘅時候，兩個朋友夾份送了一隻Apple Watch給我當生日禮物。經過我大半個月嘅使用之後，究竟有甚麼睇法？不如等我同大家分享Apple Watch如何再一次融入我的生活。

係，你無睇錯，係再一次，唔係第一次。其實我自己同Apple Watch都算係有一種不解之緣，我第一隻Apple Watch其實正正就係Apple Watch Series 1，果陣時仲要係有朋友買了半年之後話唔鍾意，之後用$500轉讓給我，雖然一年後我唔小心跌爛了，但是卻令我對智能手錶留下深刻印象，不過是不好印象方面。首先以當年 Series 1來說，當然與目前出最新的Series 7採用嘅螢幕或者硬件技術，絕對係不能相比。但係以當年來講，Series 1對蘋果或者對用家來講絕對係一個試驗品，因為雖然開始令到市場上對智能手錶有更多人留意，但始終係第一代，大部份功能都在研發階段，Series 1當時來講都算係一個試水溫嘅產品，所以基本上無乜太多特色功能。即使我當年是使用iPhone 6，兩者基本上是性能不相伯仲，但是以當年嘅角度，Series 1絕對係一筆多餘無謂嘅開支，因為唔似今日有咁多美輪美奐嘅健康功能，換來嘅只有最普通嘅計步數、睇時間、睇通知功能嘅手錶，我記得當初連回覆訊息呢個功能都未有，所以真係係一隻好雞肋嘅手錶。果陣時我諗除非係對Apple Watch有好充足嘅信仰，如果唔係我相信正常人都唔會買。好彩果陣時我係買二手，感覺上係買了一隻Apple原廠推出嘅電子錶，只是額外附上一些可以和電話聯動的功能的手錶。雖然一年之後唔小心跌爛了螢幕，但老實講真係唔係好心痛，因為雖然$500都唔係一個少嘅數目，但相比果陣時我係用緊一隻$1500左右嘅機械錶，絕對可以話係純粹為了信仰而購買。而且老實講，雖然Apple Watch Series 1都算係一個革命性嘅新產品，但係Series 1實際嘅功能真係少之又少，所以我記得當年市場佔有率都唔係好高。當然，跌爛螢幕之後都曾經有走過Apple問維修價錢，但是維修價錢最少要$1500，所以便果斷放棄修理，繼續使用一直使用的機械錶，繼續佩戴。

時間快轉去到2019年，一次機緣巧合嘅情況之下，係YouTube 睇到台灣最可愛嘅YouTuber Linzin阿哲 介紹智能手錶，再一次令到我想嘗試智能手錶。雖然佢介紹就唔係Apple Watch，而係TicWatch Pro 1。雖然對一個iPhone用家黎講，購買Android 手錶絕對可以先廢武功三成，而且大部份功能都會受到限制。但相比起其他Android 手錶，TicWatch Pro 是採用原生Google OS，相比其他手錶，如果要root或者係iPhone 上安裝 Wear OS by Google 絕對係一個比較方便嘅優勢，而且最吸引的地方是，如果調校成慳電模式，最長可以使用三十天，對於我呢個成日忘記叉電嘅人，絕對係一大福音。加上果陣時Amazon Japan 做緊會員優惠日（Amazon Prime Day），扣除折扣之後我無錯只係需要$540左右便可以購買了，所以我便預訂，再一次嘗試智能手錶。應該點講，可能因為由細到大都係用圓形嘅錶，所以其實呢隻錶開箱嘅時候我都幾鍾意，圓形嘅外觀加上側邊兩個錶冠，同傳統手錶無異。但係一開機嘅時候就發現一個好嚴重嘅問題，就係好lag。而且第一次配對嘅時候，因為第一次咁樣跨平台使用，所以同iPhone第一次配對都差唔多用了接近30分鐘才完成首次配對和設定。雖然之後都每日都使用，但因為始終唔係採用Apple系統，所以基本上每一日都要重新連線，而且好容易斷線。另一個問題就係，雖然佢係建基於Wear OS by Google框架上，但仍然內置一大堆非Google 官方的程式，所以買了一個月之後便馬上root了（反正我都係水貨，點樣都唔會有保養）。不單止剷除了內建的程式，而且更釋放了部份RAM，運行速度更加快。雖然我好鍾意TicWatch Pro外型，但始終我用嘅係iPhone唔係Android電話，所以只可以睇時間、睇訊息，唔可以回覆訊息和接聽電話。而且NFC功能雖然有內置，但是要到2019年下半年才正式開放，而且更加不能將八達通放進手錶內，所以自從我購入後對生活的改善基本上是沒有，純粹只係當作有心跳監察功能的手錶。

如是者，去到2022年三月中旬。當時香城嘅疫情亦都到達高峰，原本每年我生日嘅時候朋友都會同我去食一餐好自助晚餐以作慶祝，但今年礙於疫情關係，為避免減少接觸，所以朋友決定將食飯嘅錢改為購買禮物給我。但老實講，我其實想了好耐都諗唔到要乜，最後睇到自己嘅TicWatch Pro 1雖然能夠繼續運作，但畢竟已經是2018年的產物，所以都覺得係時候升級。但老實講，自從我近幾年開始Apple全家桶之後，淨係得返手錶沒有使用 Apple 產品，所以其實一直都心郁郁想買返隻Apple Watch補完。但係無獨有偶，其實咁多年以來Apple Watch嘅功能對我都唔係咁心動，所以就無補完呢個坑。最後會決定正式購入，最主要原因都是因為血氧功能，因為大量研究都有指出，大部份受到感染的人是血氧功能都會有所下降，雖然或多或少都有誤差，但知道總比唔知道好，咁所以就決定再一次投入Apple Watch嘅懷抱。其實我購入嘅就唔係普通Apple Watch最平嘅鋁合金版本，而係比Apple Watch Hermes 低一個層次嘅Apple Watch Edition版本。當然啦，大家要搞清楚樣一件事先，就是無論是買最便宜的鋁合金版本還是最昂貴的鈦金屬版本，所有功能也是一樣，只是外殼的材質不同。

其實我當初都有諗過買 Garmin，但始終 Garmin 偏向運動取向，對於一個平時甚少做運動嘅肥宅來說，絕對係多餘，而且是採用Android架構，經過之前三年嘅體驗之後，我忽然之間有種想重投 Apple 懷抱嘅感覺。為什麼不選擇最便宜的Apple Watch SE？雖然Apple Watch SE係各方面都係最平，而且都有一般嘅功能，日常使用絕對足夠，但係Apple Watch SE已經係接近兩年前嘅產物，以Apple iPhone SE嘅作風，應該今年九月的秋季發佈會便會有新產品上市，正如我一直都講，科技產品盡可能買最新的，除了有最新的功能外，而且產品周期亦都會比較長，產品支援期限亦都會比較好，所以就決定Apple Watch Series 7 而唔係Apple Watch SE。另一個我諗好多人都會問嘅係點解會選擇鈦金屬版本而唔係最平嘅鋁合金版本？當然，鋁合金版本色彩鮮艷，對日常生活配搭亦都更加容易。但係我第一隻Apple Watch Series 1 正正就係用鋁金屬版本，只是用了短短三個月之後已經有好明顯嘅刮傷，絕對係留下唔好嘅印象。所以就直接跳過鋁金屬版本。至於不鏽鋼版本，雖然不鏽鋼外殼令到只有45mm 的螢幕看起來更大，但是重量卻是十分驚人。雖然只是與鋁合金版本相差幾克，但是那種重量是絕對能夠感受得到，如果長期佩戴絕對是會對手腕造成一個負擔，所以瞻前顧後，直接選購鈦金屬版本。鈦金屬版本相比鋁合金，外框的髮絲紋和不鏽鋼外殼一樣，顯得額外高貴大方。而且重量比不鏽鋼輕，就算同最便宜的鋁合金版本相比，我感覺上其實都係一樣。另一方面，正如我上一篇文章咁講，不銹鋼和鈦金屬的螢幕才有提供藍寶石玻璃，對於我成日唔會使用保護殻嘅人來講絕對係比較安全。雖然鈦金屬版本比不鏽鋼版本還貴，但本身已經包括額外一年的保養（合共2年的保養）、鈦金屬專有的顏色錶面和額外附送一條鈦金屬版本限定的矽膠錶帶，所以絕對係值得。相比起鋁合金，鈦金屬只有黑色和銀色兩款選擇，我當初原本是打算購買黑色版本，但是在門市試戴之後，我覺得黑色真係唔靚，而且我由細到大，都總係覺得手錶要銀色先至係最靚，而且同行朋友也說了一句真言：如果購買黑色鈦合金版本，為什麼不選購鋁合金版本？因為如果是黑鈦（黑色鈦金屬版本），如果唔近睇，肯定好多人以為係鋁黑。（鋁合金午夜暗色版本）所以最後就揀了銀色嘅Apple Watch Series 7鈦合金版本，銀色嘅外殼加上髮絲紋，絕對係一個好高級嘅表現，不過當然係個人觀感。（所以如果真係有心想購入Apple Watch，真心建議親自去門市試戴，選擇最合自己的外框材料）

我覺得同當年相比，Apple Watch嘅進步大家有目共睹，由最初只係好雞肋嘅功能，到而家接近領先行業嘅健康監測功能，絕對係非常有感嘅升級。相對上，雖然唔可以話無缺點，例如電池太細，續航力不足支撐一日，曲面螢幕難以貼保護貼等等，雖然或多或少令到我使用上有些不滿，但畢竟主打嘅係健康功能，有部份取捨我都覺得可以接受。對於我自己來講，用了大半個月，最有用嘅應該係心跳偵測和血氧偵測功能。雖然我本身家族沒有心臟病歷史，但自己始終一直都有肥胖問題困擾，所以一直都有定期自我監察。雖然Apple 都有列明所有健康數據只可以做一個參考，但係相比起我每日量度血壓，可以長期監察心跳我覺得更加重要。雖然到而家心跳比幾年前健康，但係始終經歷了大病之後，我相比以前更加注重自己嘅健康，所以絕對可以能夠幫我定期監察。另一個我最鍾意嘅功能就係血氧偵察，雖然都只係一個參考嘅數據，但係令到我更加留意我自己嘅呼吸，雖然我無呼吸困難症，因為我長期鼻塞，一轉天氣同開冷氣就基本上一定鼻塞，所以總之可以比我自己知道自己嘅呼吸情況。雖然另一方面，Apple Watch Series 7主打嘅睡眠偵測功能雖然係一個好犀利嘅功能，但因為我係打側瞓嘅人，而且瞓覺嘅時候經常會轉身，所以到了目前為止我都唔敢帶着錶瞓覺，而且我都唔鍾意瞓覺嘅時候雙手有東西妨礙，所以應該與這個功能無緣。不過可幸嘅係，上星期五因為打第三針疫苗，打完之後回家午睡，因為知道自己只是睡眠短暫時間，所以便嘗試在睡覺時佩戴。雖然睡醒過後查看睡眠偵測功能，絕對比日常佩戴可以知道更多嘅數據，但係始終唔習慣瞓覺時手腕有東西妨礙，所以應該只此一次，下不為例。

另外一個好多人垢病嘅地方就係即使螢幕變大，電池相對上有變大，但是續航力不足以一天使用。但我使用了大半月，每天日常使用，回到家仍然有60～70%的電量，我相信這個是每個人使用的習慣不同，但是和幾個也是佩戴Apple Watch的朋友討論，發現是有很多微小的慳電習慣大家也不知道，所以才導致好多人嘅續航力不足。所以螢幕變大，電池仍然可以使用接近兩日（以我使用習慣來講），絕對係非常唔錯嘅表現。

雖然我購買的是鈦金屬版本，但相比起鋁合金或者不鏽鋼版本，防刮花表現卻是最差的一款（鈦金屬版本的硬度比鋁合金版本的硬度更軟），所以雖然有三年AppleCare的保護（當然我都自己另外買了AppleCare，不過價錢是正常版本Apple Watch的兩倍），但畢竟如果只是小小的人為刮傷，整隻手錶更換絕對是浪費的行為，所以我都係決定安裝保護殼。當然啦，經過了我千挑細選之後，繼續是選購O牛盾（其實是因為和早前訂的iPhone殼一同購買有八折優惠），不過可幸嘅係我平時也是很小心佩戴，所以幸好一直保護殼也未有需要發揮功用的時候，不過正如我上一篇咁講，O牛盾的手機殼本身已經很難安裝，換上比手機細小的Apple Watch，安裝時候我用了好大力才成功安裝，所以安裝嘅時候其實我都好驚自己刮花或者唔小心失手跌落地下，好彩當然係乜事都無發生。

記得之前我講過，購買Apple Watch Edition版本，除了一條自選錶帶外，包裝更會附送一條限定顏色的錶帶。但面對香城炎熱的夏天，贈送嘅矽膠錶帶絕對是一種負擔。我當初亦都有想過多付額外$799換成米蘭式錶帶，但始終實在太貴，所以就沿用自己係HKTV MALL購買的米蘭式錶帶。但因為接駁位不同，所以我需要額外尋找Apple Watch錶帶接駁器。當初以為好簡單可以搵到，結果我尋找了一個禮拜先至成功在港產皮革中發現我需要的東西。雖然可以在淘寶或者蝦皮上面購買再轉運，但是加上運費，絕對比我在香城購買昂貴，所以便自行購買改裝。安裝過程十分簡單，雖然相比原廠米蘭式錶帶，絕對有一定程度嘅分別，但係既然可以繼續利用一直用開嘅錶帶，何樂而不為，而且可以節省好多好多錢。

唔知大家有無發現，我帶錶雖然都係左手，但係將個錶冠左右倒轉。呢個絕對唔係因為想有型而作出調整，而係有實際嘅方便。相信有帶過手錶嘅人都會知道，錶冠正常都係錶嘅右邊，咁點解我要專登掉轉將錶冠擺係左邊？其實呢個算係我個人嘅使用習慣。相比起其他手錶，Apple Watch嘅錶冠顯得比較細，但手腕擺動時，經常會唔小心壓到錶冠而呼叫Siri，相反倒轉帶就唔會有呢個問題，而且測量心跳右手擺位會較為方便。除此之外，因為喇叭於手掌，聽電話時亦都可以比較大聲。不過當然全部都係我個人喜歡嘅習慣，純粹只係分享我唔同嘅帶錶方法。

我其實經歷了大半個月，雖然Apple Watch Series 7在我心目中仍然唔稱得上係一隻好完美嘅手錶，但係以今時今日嘅功能，加上對上一隻使用Apple Watch已經係Series 1，咁多年嘅進步其實係即時感受到，如果你唔係咁注重健康監察功能，當然5代、6代或者SE已經足夠，不過既然Apple Watch主打嘅係健康功能，咁點解唔比多少少享受全新監察健康嘅功能？今日就講到呢度先，下星期六再見。