MPF攞定唔攞？做志工、搵勞動部，6月下半的緊湊生活

6月下半總算過去了。寫這篇文章時是我還在努力地掙扎求存，有些不能言明的事情一拖再拖，令我很大壓力。今天最後期限，就是生死之間了。寫文章最主要的目的是整理情緒，負能量會有點重，而這種負能量過後，希望是光芒的開始。

正文開始前講兩件微不足道的事情。住家附近ubike停泊點，新增咗一倍。極好，我好依賴ubike，之前經常無位泊、無車。依家方便好多。最近的港式燒臘店，4:00後95折，本來佢加咗價，依家晚餐又平返，超正。

志工

過了一個挺不錯的6月上半，下半就全力搵錢。幸運地接到一單job，急單。趕咗兩晚通宵，接連去NGO做志工。我有唸過唔去，好采有去，又有新機會出現。係絕望中有一絲溫暖。

去年考完導遊領隊試，等實習的期間，去了附近一間NGO做志工。NGO規模不大，區議員中心那種規模，但出奇地每位志工都是七、八年的資歷。我斷斷續續，有時一個月去一次，有時兩三個月去一次。今年過年後到端午期間都沒去，他們也沒找我，一度以為被列為不受歡迎人物(我太多意見了)。上周末有大型講座，我順道去拍拍照、吐些苦水及詢問勞資糾紛的事情。

是的，六月下半遭遇到一起勞資糾紛。詳情暫不敢說，等我脫離目前狀況。發生當下馬上打勞動部，對方像錄音機一樣講完把法規掉出去，不行就來追討，追討期五年。因為NGO有義務律師，我稍為問了一下，律師說，法規是這樣沒錯，不過公務員嘛，多一事不如小一事。我想了想，反正問到了下一步該怎麼做。

NGO主要關懷新住民議題，我是認同他們理念才去做志工執頭執尾。當然我也有收獲，累積一些作品，最緊要是他們幫我處理了我最弱的人脈和人際關係。在這個場所，認識到好多不同界別的人，了解到好多不同人的生存狀況，以及能夠吐點苦水。

吐苦水對我來講是很重要的事情，作用跟寫文章一樣。並不是說講完現實會改變，而是讓自己未來一個月，甚或是最簡單的明天能活多一小時的止痛藥。好多時人在外地，別人不會明白你的經歷，願意傾聽是台灣人的優點，換轉香港人？你廢你認咗佢啦。

我算很幸運了，至少還有人聽我訴苦。我知道很多人是鬱鬱埋埋，搞到精神疾病，一發不可收拾，甚至失去工作能力。

扯遠了。舊年冬天，全副身家一度只得返2000TWD。係靠住每個星期去一次NGO做志工順便食免費飯，節省餐費，頂到公司高層過數為止。早幾日過去，佢哋見到我瘦咗，專登叫外賣，俾我打包晚餐返屋企。其實只係天氣太熱，無乜胃口。

希望快啲有進展

膠着狀況持續半年了，心情愈來愈焦急。入職後大約一個月就知道這邊的行事風格，因此在過年後，一直找新工作，無論正職和兼職都沒找到。接案方面則是幸運地又接到一單，卻又落入接案日常的糾紛──一個電話打嚟話我好多嘢無改，中止合作，十分鐘之後又打嚟要求我改到完美為止。這個狀況未改變之前，我恐怕還是會一直講一直講。

出門前就預計會遇上這種情況，只不過殺到埋身，個種感覺依然好難受。唯有希望可以快啲解決問題，跳出現在的膠着狀態。過去工作，我時常處於憤怒和無奈的情緒中，覺得點解大家唔做好啲件事？隻船穿咗，大家係睇住佢一齊沉，唔會去補返個洞。唔知年紀大咗定點，依家係無憤怒同無奈，只有一種情緒︰委屈。

工作和經濟狀況未能改善之餘，身體有啲少問題。上個月睇完牙醫，牙醫建議要做個小手術，維持牙齒健康。其實前兩年係香港就應該處理，但遇到疫情，唔敢睇牙醫再加上佢未痛，咪由得佢先。預料唔到佢會係我經濟情況最惡劣既時候發作，我只能祈禱，比多幾個月我，唔好咁快痛。

依家既生活壓力比起香港時大好多，但反而覺得，好像生存落去都唔係咩壞事。係香港每分每秒都希望自己消失。我有位台灣朋友係香港工作，佢反而係台灣抑鬱到爆，去咗香港反而無事。世事真係好神奇。

六月算係幾好，開支平衡。工作雖然唔順利，錢又追得好辛苦，但至少接到job。我算係生平第一次排版排到凌晨一兩點，對上一次咁搏，經已係差不多10年前係書店工作，每半年一次全店盤點，唸起都覺得正。書店12:30關門，全人類通宵盤點到5:00。中途休息一個鐘，公司請食M記。

M記查實係10點幾已經買好咗，擺咗四個幾鐘。個包薯條既口感，根本係咬緊浸咗水既棉胎。第一次盤點，大家上下一心既感覺好好，好齊心。之後公司高層換咗人，就再無咁既畫面出現，人人都做到小老母。

要唔要攞MPF？

最近統計過，人生80%煩惱來自工作。而人類工作是因為要錢。為了錢，或說為了生存和生活，係可以無底線……而我底線一路很高。

上星期讀到一篇移民的人把MPF全數取出的文章，與金融業的朋友聊了一下。她建議我把MPF拿出來去做定期，可能獲利更多。但我唔敢，我驚一拎出嚟我會解決眼前痛苦，例如去睇醫生。而且，我做咗十年嘢，MPF都無十萬，其實唔做得啲乜。

另一方面都會唸，如果拎咗先，放係銀行，一旦有急用就可以動用。如果真係傷病，要入廠先至申請，可能嚟唔切。亦都有唸過一個可能，如果我要買樓，可能用嚟比首期。買樓只會自住，最多租間房比朋友或者Airbnb。始終錢既嘢，我唔熟，未決定到，拖多陣先。

攞MPF係咪就等於徹底離開香港呢？我未知。舊同事有提過，既然經濟壓力大，不如留意吓香港既工作。我預設過，需要有一份25K HKD左右既工，一間5K-6K樓下租金既屋等緊我，先有可能返去。份工仲要起馬有3年貨仔，我能力上做到又唔會比人逼走，先至能實現。呢個機率細到無倫，不如都係死死地繼續幫台灣人打工，等到有能力時先自立門戶啦。反正依家，講真呀，點會咁好采。而且好可能返去工作兩三年，好唔開心，又咪要搵第二個地方。

強調一點，我不反對回流，回流並不可恥。有些人在香港如魚得水，去了其他國家頭頭碰著黑。心之安處是吾家，大家找到自己安居樂業的地方就好，沒有說一定要做哪裡的人，一定要做甚麼才行。有時候違背昔日的自己，也未必絕對是錯誤。道德同價值觀能堅持下去的是偉人，堅持不下去，也不能說卑鄙。呢個世界，唔係咁多個哈維爾。

步走彰化again

6月最後一日，下午得閒，天氣又幾好，搭火車去彰化散步。幾鐘意彰化巿，可能係同我住開既錦田、台南比較相似，每條街道都好多小店，好多特色嘢，唔買，行下都舒服。街道上無乜人，車都唔算好多，無台中個種沉悶同焗促。

台中既城巿氛圍有啲難以定位。的確有好多富特色既建築物、巿集園區，但無一個整體感，串連唔到。彰化巿區由火車站去到八卦山，就有一種棕色的融和感，不同人在城巿裡，按着自己喜歡的方式生活。我喜歡這種城巿氛圍。

計落都差不多三、四個月無落去行下。前陣子一路都想去散步，計一計來回要30TWD，可能過去又會想食個豆花，下個午茶。六月尾比個客連續發咗幾日難渣，悶悶地，去啦，行返個幾鐘再返去煮飯。

出火車站，漫無目的，九曲十三彎。嚟過好幾次，唔洗睇地圖，大約知道方向就OK。走走拍拍，今次發現原來彰化巿好多糕餅鋪，賣啲點心呀，雞蛋糕。之前都無留意。可能之前多數係平日，有些店鋪無開門。

彰化縣圖書館是今天的折返點，天氣太熱，降一降溫。建築物外形似理工學院，裡面空間感一般，陳列較為密集，感覺係想增加圖書曝光、增加與讀者接觸機會。我就無睇書了，飲啖水，慢慢踱步返火車站回程。

回程路上係到唸，呢個6月，又要睇病，又遇到勞資糾紛，又遇到客人發難渣。我心唸，真係好采一把年紀先至返嚟，識得點樣處理，相對冷靜面對問題。比着兩三年前，遇到同樣既事，我應該唔理三七廿一，辭職，走囉，走咗先算。因為唔係自己問題，嬲囉，嬲到訓唔着。唔開心，你比錢我我都唔要呀，搵過第二份囉。

坐係彰化車站月台，午後陽光曬乾背上汗水。提着LCD壞掉而不敢花錢修理的照相機，縱使日子多麼艱難，都是必須面對現實。我身處的現實並不幽默，可能會每況愈下，但起馬現在心境平靜。嚎啕大哭、後悔做錯決定的年紀，不知不覺隨着山線的莒光號南下了。

叮噹︰寫完文章後兩日，6月危機解除。輪到7月。

每周一則城巿故事。突破點對點生活模式。
邁開腳步，劃出舒適的平面。喜歡原地遊的內容，請接續以下方關注更多動向：【 Facebook｜Instagram｜Patreon｜Gunroad｜Pinkoi｜500PX】