My little detour - 《心情回來了》

2022 年 2 月 6 日

9 Jun 2019, Sun (Day 11 晴（熱）， Havana, Cuba)

我諗個人真係攰得濟，加埋諸事不爽，所以琴日我竟然係等沖涼期間係rooftop不自覺咁恰著左，仲要瞓左個幾鐘😱。不過rooftop涼浸浸，其實係好舒服的。琴日沖完涼快快上床瞓覺，雖然又係4點幾醒左，但明顯今日個人醒返d, 個人又無咁失落！

反正起左身無野做，我決定去買上網卡。我跟maps me行，今次終於無水我了，不過呢...我其實睇唔出佢係etesca, 但我見有人玩緊tablet, 我就問佢係咪買到上網卡，當然係雞同鴨講啦，我唔理，最多都係浪費少少時間。咁我就跟住個男人坐係到喇，之後有人嚟，佢真係講左utimo(係咁上下），頭先個男人指住我，嘩，我終於第一次體驗古巴排隊文化了，好開心呀～

然後大家坐得好散亂，每個人嚟到都問邊個係最後一個，仲問埋佢前面係邊個添！差不多等左一個鐘，間鋪終於喺8:30am 開門，原來呢到興未到你係無得入鋪頭架，我排第二，都閃左入去，但有個媽媽突然抱住個細路入埋去，仲問左野先，不過係secure放佢入去，我諗...總有佢嘅理由嘅！好嘢，我終於買左3張各1 cuc (total 3cuc)的卡了（買卡都要出示passport的）。

完成任務好開心，繼而打道回府。有個男人同我講野，我懷疑係話比我知邊到買wifi card 。之後行過公園，等我順手試下張卡先，第一件事梗係挖個密碼啦，而我發現無試用咩幣值的cuc都挖得好唔理想，唯獨港紙1毫幫到手🤣。send左幾個whatsapp報平安後，由於頂唔順公園個太陽，我都係返hostel先。但我謹記要log out先可以停用，但....點樣official log out呢，其實我唔知，我唯有熄左個wifi希望得。

返到hostel, 等我試下佢個1 cuc早餐先，係咪我諗多左，無我諗咁大份量（雖然都有蛋有水果同有包，仲有杯冰凍果汁同細black coffee），但我不得不讚，杯果汁超好味！

食早餐時，有個加拿大籍的韓國女仔Ki 已食完早餐，本來我以為佢係香港人，所以問佢邊到嚟，之後就傾起偈嚟！原來佢已經係古巴將近2星期，仲講話佢初初嚟到時都係好depress ga, 嘩，同我琴日咁似嘅！之後我忍唔住問， Viazul站（比遊客搭去其他城巿嘅旅遊巴）係咪好遠，原來唔算喎，行半個鐘應該到！太好了！後來有個Sweden的女仔都坐底食早餐，佢地傾起偈嚟，原來阿Ki諗住去Fustalandia，咦！咪係我想去但覺得太遠所以放棄的地方？於是我好唔知醜咁問Ki我可唔可以join, 因為就算坐的士都多個人share 嘛！阿Ki好好呀，佢話無問題，仲問起hostel伯伯有無collectivo (share taxi), 伯伯就教左佢去邊到搭，好彩咋，好彩Ki識西班牙文，我跟著佢今次真係發達。我地出發前，我同hostel伯伯買支水先（1cuc), 而 Ki話唔知嗰到的野食貴唔貴，所以買定個包， 3cup咋，真心太平了！

之後我地等一架27號的metro taxi （係平時經過的十字路口再向海邊行一個街口），其實古巴人都好好，會話你知邊到搭，邊的可以議價，好可惜我一的都聽唔明。靠阿Ki係咁問先知正確等車位置，原來以為5cup一位，原來斷行程計，我地由頭搭到尾總共三段，即15 cup, 我比20cup佢找返0.25cuc比我...er數學呢家野真係好難計，即係係咪好似收平左wakakkakak!

Thanks god, we made it! 仲要係正村口落，其實成條村都有mosaic decoration, 但原來有間係museum咁架！咦，唔使錢喎，呢到好正呀，好似樂園咁呀，好colourful好開心呀！我多謝Ki帶我嚟呢到呀！仲要好好彩我地影影下佢關門，好彩入得合時咋，仲影左有我的古巴相添（雖然唔係印象中的古巴）！

玩完一輪我去返搭車，連個車站都靚過人，最好彩係去到即刻有車添！

行返去期間，阿ki仲教左我pan即係包，視乎佢夾咩而價錢有變。仲話分國營同私營餐廳係靠佢個價錢嚟分！返到去，我地睇埋後面街好擁擠的塗鴉，但太逼我地轉眼出返嚟，返hostel airdrop完的相同食埋個包後， Ki就就再去頭先的地方聽音樂，而我就去左買Viazul車飛。

真係比我搵到呀！個職員以為我已經網上訂飛，但其實我講左好耐佢先知我想即場買，又係需要排隊，好彩唔多人唧！我寫低左日期同班次， yeah, 順利買到，盛惠18cuc。

既然得閒，我又search下郵局先，行到去，係真有郵局，但似乎我根本逃不過送車尾的命運！佢又關左門。我唯有跟maps me再行另一間，又被fake喇。既然係咁，流左咁多汗，我決定打道回府。咦，比我途經酒店，何不舒舒服服咁坐低wifi！但我唔識login，我上次係咪真係有得official log out架，點整架😭，我唔係用左5分鐘就浪費左55分鐘呀？？？算，但坐酒店我到流一公升汗，我決定買罐古巴可樂獎勵自己，我見話20cup, 咁我準備左20cup找數，但點解佢找返0.3cuc比我嘅，條數又係點計呢？人生真係充滿疑問！

返到hostel見到阿Ki, 我話我想問佢stupid question, 睇佢係點logout wifi, 佢話佢都係飛行mode, 然後turnoff wifi咋喎，咁點解呢😱，為左尋找呢個答案，我係hostel hea左陣後，又去返同一個公園，佢網絡唔穩定，不過都上到一陣，好彩，原來張卡無報銷到！之後我又貫轍周圍行嘅習慣，行過見檔仔有蕉賣買，問佢幾錢，佢話4cup, 但比20cup佢又唔肯找錢喎，咁算啦，放棄！跟手諗住去返買古巴可樂的地方睇下的水會唔會平d, 點知經過一個住宅，我見佢擺左的芒果係門口（雖然係關左鐵閘），我就問佢芒果幾錢， 5cup呀，天呀，好平呀！忍唔住買左一個，又香又甜又大又多汁呀！之後輪輪盡䀆咁食完個芒果，就行入去鋪頭睇的水點賣，我諗多左， 1.xx cuc。