My little detour - 《突然回來的影相mood》

甘米

2022 年 2 月 23 日

26 Jun 2019, wed (Day 28 晴 Havana, Cuba)

琴晚的同房比較夜返，所以都係瞓下醒下。八點幾起左身，見都last day, 好雄心壯志咁諗住影多少少菲林相，所以將相機掛係身上。

首先去公園將張wifi card用到生命最後一刻

然後就去返國營雪糕對面的熱狗店食hotdog加汽水（20 cup, 本來唔要汽水的，但見佢凍凍地，好啦，要埋啦！），享用完畢再到同一條街遠遠地嗰到的郵局寄埋的postcard。大任完成，返去homestay去埋個廁所就試行條新路去新城嗰邊。

咦，我覺得係快的喎，唔知係咪心理作用呢！今日再行嗰條購物街、國會、兵器廣場嗰的，發現上一次嚟真係無行晒。不過真係唔好問我行左去邊，我都唔知邊到打邊到。不過我行到咁上下坐左係好似兵器廣場，有個古巴人撩我講野，佢講完佢識嘅英文，我地對話都完左。

但另一個古巴人因為被問及旅客英文係咩而同我攀談起嚟！咦，佢都係有故事的人喎。原來佢早年同個挪威女子結左婚仲移居當地，可惜最後離婚收場返嚟古巴。所以佢英文都唔錯，仲識挪威文添，聽佢口吻都應該幾鍾意嗰邊。之後本來諗住去theatre睇下有無得睇ballet, 但佢話今日無show, 可惜。

之後經過間超巿仔，買左舊番梘for洗面（0.55cuc)都ok la! 而琴日先講起想試啤梨汁但無見過，今日係嗰頭就比我撞到，咁梗係飲啦，但其實唔太似啤梨味。跟住去埋隔離鋪買菠蘿pizza （比左3cuc佢找一左1 cuc 3 cup比我），我望下點解有哲古華拉，佢話咪2cuc, 我話嗰個係3 cup。我本身已無同佢計較分明找少左嘅5 cup，佢竟然仲要用個3 cup嚟冒充1 cuc，幾衰，但其實我都想要嗰3 cup嘅🤣🤣）。因為太熱，又飲了無數嘢，橙汁汽水、提子汁同埋coffee, 仲要衰到返到homestay要左枝果汁添 (15cup)， wakkakak！

我仲問左女host P16號去機場嘅巴士邊到搭，佢叫我係San Lazaro搵，見到有人等嗰到就係。嘩，好難拿捏個位置喎！最後我選擇親身觀察多35分鐘， 2條行車線都唔見P16喎！咁無啦，我都係去搭P12算了，起碼我見過個真身丫嘛！

明明琴日個人介紹話我樓下嗰間食平飯，點解我今日入到嚟會覺得唔平嘅？我點嗰個唔知雞咩鬼要4cuc架喎，我明明記得有個西文係數字四咁講，點解上枱原來係大雞肶跟薯粒呢？如果雞肶嚟講，我又唔覺得值比呢個錢，咁早知我去食湯飯啦真係。丫，我終於發現，其實係咪古巴人偏愛咸味呢，都幾重手喎！到埋單時，原來我食嘅嘢係3.5 cuc，咁... 究竟我又點左咩呢？

食完我又行去melacon睇日落，係靚嘅！仲撞到個越南人，其實大家對個正面都有笑一笑，但佢行過後再擰轉問我邊到人，我話香港，佢話佢好欣賞香港人近排的protest, 叫香港人加油！佢原來已經遊歷左2年幾，最初以電單車出發去左歐洲，之後美國南美都有涉足，而佢就以寫blog賣相為生，好勁呀！最衰當時諗唔起，點解唔問佢攞個blog嘅網址感受下呢！返到樓下我走左入麵包鋪買左個包，價值6cup, 無晒cup, 佢教我比左0.3 cuc。快快脆脆沖埋涼換埋衫就要瞓了。