機動戰士的歷史------第一部 UC0079及以前

機動戰士的歷史------第一部 

UC0079及以前

民族覺醒，戰爭伊始

《從Side 3獨立宣言到一年戰爭》

前傳

UC 0001年，位於大氣層以外嘅地球聯邦首相官邸，一場隆重嘅儀式正準備進行。當時，來自地球圈內部同各殖民衛星嘅記者都聚首一堂，見證宇宙世紀憲章嘅簽署儀式。但係喺首相演講期間，發生咗一場突如奇來嘅大爆炸，所有在場人士，包括首相，都無一倖免。而呢場爆炸發生後，地球聯邦政府定性呢次案件係由一班反地球聯邦分子策劃出嚟嘅。最後，呢件事雖然都係不了了之，但之後卻埋下咗超過半世紀後一場無了期戰爭嘅種子之餘，亦都成為咗成個高達故事嘅開始。

第一章

一年戰爭的前夜 （UC 0058-0078年）

（謎之音：名句呢？）（無呀！燒你雞翼！）

自從UC 0001年首相官邸爆炸案之後，位於地球圈內嘅聯邦政府開始大規模鎮壓所有針對聯邦政府嘅示威行動。但係，呢一連串以聯邦政府高層為中心嘅鎮壓行動，，令到宇宙居民嘅不滿情緒同反聯邦嘅意志進一步加劇。結果，至UC0050年總人口高達90億嘅宇宙居民，佢哋嘅種種不滿，終於透過一份獨立宣言，正式爆發。

UC 0058年，紅色彗星嘅老頭子：自護·茲姆·戴昆（下稱戴昆），正式宣佈殖民衛星3號（Side 3）獨立，而係佢份宣言上明確地指出地球圈（注意：係地球圈整體）總人口高達110億以上，當中超過90億已經成為咗宇宙居民。就因為呢個比例，地球本體一早可以升格成為全地球圈內所有居民嘅聖地，亦都係聖地主義運用嘅最高境界（注：聖地主義本身係指由1948年開始嘅猶太復國運動或者猶太復國主義，當中牽涉到《聖經》、超過2000年嘅猶太人流亡史、近代歐洲列強係中東地區嘅殖民史及冷戰期間嘅美蘇角力及國際博奕，背後成因太複雜，作者就不作太多解說。只可以咁樣講，當年高達嘅作者有意係一年戰爭前嘅殖民衛星獨立嘅運動浪潮中，特意地指出自護由共和國改為公國(Principality of Zeon)呢一個舉動，都係同《聖經》嘅典故有關，將自護軍比喻為當年嘅猶太人，係宇宙中作為被選中的民族，而聯邦政府就變成邪惡的大地、墮落的巴比倫等等）。但好景不長，聯邦政府當中嘅嘅得利益者開始聯手。因為喺佢地眼中，宇宙居民就雷同19世紀歐洲列強到全球建立殖民地嘅居民一樣，應該要好好服侍宗主國及其人民（謎之音：即係地球聯邦政府嗰班不知所謂嘅生命體）。故此，Side 3 嘅獨立宣言正好俾咗聯邦政府一個藉口去擴充軍力（UC 0059年正式成立地球聯邦宇宙軍「E.F.S.F」**，但係嗰陣聯邦宇宙軍嘅主力都係一堆超大型戰艦同埋宇宙用戰鬥機。因為嗰陣米諾夫斯基博士仲係喺自護嗰邊做緊研究，仲要做埋自護軍MS嘅祖師爺。後來因為某啲大人的理由，佢選擇咗著草，去咗聯邦嗰邊，並間接促成咗「V作戰」嘅誕生，令聯邦開始走上一條亂玩MS嘅不歸路），但偏偏諷刺嘅係，戴昆佢老人家偏偏唔挑起任何戰爭，反而係不停利用唔同嘅談判手段向聯邦政府交涉自治權。

但係，作為一個宗主國心態嘅聯邦政府，又點會只係通過「外交」談判手段去將自治權雙手奉上呢？一年後，UC 0059年，聯邦政府正式宣佈對Side3實施經濟制裁，希望可以利用呢個外交制裁手段，喺無需動用武力嘅情況之下，令Side3可以係自行讓步嘅情況下取消獨立宣言，回歸聯邦政府管制下嘅有限度自治政府（注：所謂經濟制裁主要係分三種方法：限制貿易、限制航運通訊及限制資本。三種從外交手法嘅角度出發都係非常有效，但前提係雙方國家或地域之間需要存在一個密切嘅經濟交流及活動。而自第一次世界大戰後，國際性通商網路嘅建立開始，上述三個方法逐步變成一種外交手段，而非真實制裁）。但係，聯邦政府完全遺忘咗一件事（可能），當年建立宇宙殖民衛星嘅主要原因係地球內部人口過多，導致地球資源嚴重不足，同時亦帶嚟嚴重嘅空氣污染。所以早喺公元 2045年，地球聯邦開始喺大氣層外建立第一個殖民衛星：Side 1。自此之後，Side 2至Side 7開始陸續建立並落成啟用。而所有嘅殖民衛星都有自給自足嘅能力，基本上可以喺無需太過依賴地球嘅情況下，盡可能安置更多嘅人口。再加上Side 3嘅位於月球嘅背面嘅陰影區，位置上比較獨特，所以長久以嚟同地球嘅經濟交流都唔算太多。再者，一旦推行經濟制裁，損失嘅往往都係雙方，加上當時聯邦政府內部唔同嘅勢力牽制，引致當中各方持份者（包括為數不少嘅大型企業或者財閥）都受到唔同程度嘅損失／影響。最終要去到UC 0060年，聯邦政府經過一年嘅協調及調整，先可以勉強將所有制裁措施全面實行。但正正就係呢個事件，開始反映出聯邦政府對於唔同勢力嘅控制力開始下降。至於Side 3方面，當然唔會傻下傻下咁等你嚟制裁我啦。早喺聯邦政府宣佈制裁後，Side 3開始改為向其他殖民衛星購買各類資產同物資，同時間亦向各小行星帶發展以尋求更多資源。再者，係Side 3獨立宣言發表嘅同時，自護國防隊成立，一場另類嘅軍事競賽已經暗中開始咗。但好笑嘅係，雙方一直平安無事，直到UC 0068年，暗殺事件再現，本來已經緊張嘅局面，進一步趨向激烈化。

時間嚟到UC 0068年，一場因為暗殺而發生嘅權力鬥爭遊戲正式開始，亦成為宇宙世紀歷史進程上另一個轉折點。講起呢場暗殺，其實根源都係源自一場政治權力鬥爭，兩派分別係：以戴昆為首嘅穩健派同埋以佢副手湯金·索多·薩比（下稱湯金或者公王）及其家族為首嘅武力派一直都喺度爭奪權力。不過，因為係Side3內部戴昆嘅聲望比較高（注︰喺Side3獨立宣言正式公佈前後，自護共和國內部其實一直都有兩派人係度做緊野，一派以戴昆為首，以佢聖人嘅形象用嚟宣傳同埋進行所有喺檯面上嘅政治操作；而湯金就主力做檯底下所有唔見得光嘅野。）可惜好景不常，自UC 0062年起自護國防隊正式升格為國防軍，為湯金提供咗一個好好嘅機會。亦因為隨著軍力嘅提升，獨立支持者當中嘅強硬派開始抬頭，而令強硬派嘅地位不斷提升嘅，居然就係戴昆自己。作為政治現實主義者嘅戴昆，知道要同聯邦政府談判就一定要有足夠嘅軍力作為籌碼。與此同時，佢以國防軍嘅擴張作為內政手段，視之為自護團結嘅象徵，點知咁樣反而做就咗湯金以及強硬派嘅崛起。

UC 0067年，地球聯邦政府廢除咗由戴昆提出並正在審議嘅《宇宙殖民地自治權》法案，間接引致戴昆被殺，亦令整件事正式踏上一條不歸路。呢一次嘅廢除，令民意徹底轉向，改為支持以湯金為首嘅強硬派，戴昆嘅政治生命因而劃上句號。UC 0068年，自護·茲姆·戴昆被殺，佢嘅副手湯金·索多·薩比正式坐上王位；而今次嘅暗殺，佢由始至終都被認定為謀殺戴昆嘅幕後黑手（戴昆死後，佢嘅一對仔女亦隨即失蹤。無錯，佢地就係後來嘅馬茜《本名︰阿爾黛西亞·索姆·戴昆》同埋馬沙·亞斯洛布《本名︰卡斯巴爾·雷姆·戴昆》。佢地老豆死咗之後，為咗避開被刺殺嘅危險，於是就買咗一個歐洲舊貴族嘅姓避難：瑪斯）。而戴昆死後所引發嘅政治動盪持續咗一年左右，至UC 0069年8月15日，湯金·索多·薩比正式宣佈自護由共和國改制成公國，確立薩比家嘅世襲制度，自封為自護公國公王並發表《自護公國獨立宣言》（謎之音︰你唔係宣咗一次㗎啦咩？又宣多次係咩玩法？你只不過係改咗個國家名咁大把啫！）（喂！改咗名就係新嘅國家，外交呢家野你識條鐵咩！）宣言過後，隨即大規模增強軍力及流放一直以戴昆為首嘅穩健派。而呢一次大規模改變，開始令自護走上咗一條不歸路。與此同時，兩名一代傳奇嘅機師，亦都慢慢開始崛起，成為宇宙世紀史上最好嘅基友。（喂！唔係啲咩能成為密友大概總帶著愛嗰啲野呀！）

經歷完政變嘅新生自護公國，喺戰爭嘅陰霾之下終於迎來UC 0070年。係呢個雙方都劍拔弩張嘅情況下，雙方都避無可避地開始咗人類史上第一次太空軍備競賽。當聯邦仲好自戀咁不停擴大發展太空艦隊嘅時侯，自護國防軍喺米諾夫斯基博士嘅加持下，喺UC 0070年秘密發展出應用米諾夫斯基物理學嘅小型核融合爐一號機（即係後來0073年誕生嘅MS-01）。而同一時間，自護亦都開始派出自己嘅木星船隊，向木星出發收集資源【注︰木星船隊最早由地球聯邦於公元2026年成立，主要目的係收集氦氣三、其他氣體及資源，但後來由於種種古怪原因及大人嘅理由（據說係船隊由木星返航之後，只係剩返好多死屍同埋癡咗線嘅人），聯邦政府宣佈停止成個船隊營運。木星船隊喺停運一段時間之後，於UC 0010年由木星船隊升格為船團並正式開展木星開發事業】。但可惜事與願違，第一批出發嘅永遠都係白老鼠。UC 0074年，當自護嘅船隊返航之時，當年聯邦政府見到嘅恐怖場面再次出現（無錯，又係一堆死屍同埋一堆癡咗線嘅船員）；而係同年4月，由基絲莉亞·薩比統領下嘅教導機動大隊，成立咗人類史上第一支機動戰士部隊（當時全部MS均為MS-05A，總數27架）。

UC 0075年，馬沙·亞斯洛布正式入讀自護公國軍校，並於兩年後畢業及正式服役，一代名機師（神人）（謎之音︰係呢個時候，阿寶佢仲喺Side 7度唔知做緊乜）正式誕生。同年7月，自護正式將MS投入服役。當時機種為MS-05渣古I系列，但主要目的係用於鎮壓小規模動亂上而非戰鬥用途；而喺同年8月，作為渣古I嘅後繼機，MS-06A渣古II試作型首次展示。而渣古II嘅出現，終於令聯邦認識到MS嘅重要性（注︰UC 0072年，自護軍MS嘅祖師爺，米諾夫斯基博士同埋佢班手下全部走佬去咗聯邦軍，並試圖解釋MS係未來戰爭嘅重要性，但聯邦軍全部人都一直認為MS戰鬥係一件無乜可能嘅事。直到某啲大人嘅原因，聯邦軍經一個唔知咩嘅途徑收到部唔係爛得太緊要嘅渣古I，之後就開始研究同埋走上一條玩MS嘅不歸路。UC 0077年，聯邦軍第一部MS RX-75終於試作完成。無錯，呢部就係鼎鼎大名嘅太空坦克啦！）；去到UC 0077年，自護公國國防軍官學校一眾學員為咗爭取獨立，向地球聯邦軍治安部隊展開咗武裝起義，成為咗地球聯邦宇宙殖民史上第一次正式嘅反聯邦武裝起義（當然啦，呢件咁好玩嘅事馬沙當然有份啦。注︰其實由UC 0068年一直到UC 0078年呢10年期間係發生咗好多事，多數全部都喺Bandai作為填補0079年之前個一段空窗期所寫嘅《機動戰士高達 THE ORIGIN（機動戦士ガンダムTHE ORIGIN）》中全部記載，包括戴昆之死、佢兩兄妹嘅逃難記，同埋阿寶馬沙呢對好基友嘅崛起之路。不過值得注意嘅係，當中有唔少內容係同原本Bandai正史有出入，例如係THE ORIGIN中，自護喺UC 0078年改制為公國，但係正史中，早喺UC 0069年佢地就已經做咗呢件事；而米諾夫斯基博士同埋佢班手下係THE ORIGIN中亦都係喺UC 0078年先走佬到聯邦軍並帶領整個RX-78計劃，但係正史中，佢地一早喺UC 0072年就走咗佬，而RX-78計劃應該係指UC 0079年4月正式推出嘅「V作戰」中嘅MS開發計劃。所以，如果讀者們係兩邊同時睇嘅話，都好肯定會睇到一頭都係黑人問號。但請緊記，THE ORIGIN呢部野畢竟係用嚟填補返UC 0068至UC 0078年中間嘅空白，所以同正史有出入係好正常）。

UC 0078年，自護軍嘅戰爭機器已經全面運轉，大量唔同類型嘅MS已經開始量產，各式各樣嘅宇宙巡洋艦亦都開始開發同生產；同時間，自護公國發布《國家總動員令》，正式進入戰時狀態；另一方面，聯邦軍亦都開始增強各宇宙殖民地駐留部隊（注︰當時聯邦仲未有MS同埋裝甲嘅混編部隊，當時嘅主力係步兵同埋坦克），準備隨時應對來自自護嘅戰爭威脅，不過呢一切，似乎都有啲後知後覺了……

UC 0079年1月3日，自護公國發表開戰宣言，人類歷史上第一次太空重兵對決終於開打！

第一章 完

**注意︰E.F.S.F就係指地球聯邦軍指揮體制下，另一支以宇宙為中心戰場嘅軍隊。初期主要由各式各樣戰艦同埋宇宙戰機所組成，最初俾人打到叫救命。後來有咗「V作戰」計劃嘅加持下，成功開始走上戰力無限大同埋亂玩MS嘅不歸路……