My little detour - 《原來Mexico city咁多野玩架咩》

2022 年 4 月 25 日

25 Jul 2019, Thir (Day 56 陰->雨，Mexico City, México ) 日

夜車1130由Oaxaca出發，去到Mexico City係朝早的6:30。見天仲未光，係巴士站坐左陣先出去。

到左7點多的我就諗住出去搭地鐡，點知一嚟已經衰左，話說我買好飛（5peso)順勢就轉身入閘啦，而去到月台第一件事梗係問人去Hidaglo去咪呢個方向，點知一問真係錯，唔好問我入錯咩閘，我只係知我呢頭入嗰頭出返嚟啫。個人好灰咁跟左個職員指示行去另一邊，好似係line B, 咁當然我要再買過一張車票啦（5 peso), 今次醒呀，問左人呢邊啱唔啱先。但由於我影個幅地鐵路線圖本身已唔清楚，其實我都唔知自己搭左咩，呢到無報站，而如果你唔牛咁眼望住出面嘅站名，真係好難知幾時要落車。而我其實一直以為自己搭緊紅色線，但原來我係搭緊藍色綠色線，唔怪得我一頭霧水。

終於去到hostal, 由於要3點先有得check in, 所以我坐低睇定辦危地馬拉入境簽證要咩文件，另外仲麻煩個香港朋友仔幫我出張機票itin, 然後我就出左去搵食同行陣，仲問埋影印鋪幾點開門關門。我首先出去兜左陣，然後揀左間檔仔坐低食晏，我揀左tortas同咖啡， tortas涵有少少凍，但見有蕃茄牛油果嗰的我有即時加分（39 peso)。

食完行左去公園，但由於太想去洗手間，我決定返去一趟再出嚟。而又由於電話又開始無咩電，所以我又決定坐低差下電同p睇下呢幾日有咩做。好不容易終於work左個表出啦，咩原來mexico city咁多野玩架咩，睇嚟要留多3-4晚先搞得掂。

搞晒的野我又再出返去，襯今日有時間，我決定行少少唔使錢的museum先。我先去Palace of Iturbide，但點解無開門，唔緊要，行遠少少去左另一個Museo de Estanquillo, 都係的畫作咁，但勝在免入場費。

由於時間尚早，我決定兜返去Palace of Iturbide望多次，但途中經過麥當勞突然好想食，於是我叫左個平平的芝士漢堡餐同埋朱力新地（59 peso, 新地佔20 peso), 原來呢到新地細杯的架，仲要朱古力醬好似硬崛崛咁，不過都有驚喜，呢的有墨西哥紅綠辣sauce, 芥茉醬、茄汁、青瓜，辣椒比你任加，飲品仲可以無限添飲，好似食buffet咁開心！