《約定的夢幻島》:中佬都有覺醒時
![](https://assets.matters.news/embed/9f38cfcb-c4ab-4e9b-b67b-80cf0943ebfb.png)
唔好睇啲封面期期係可愛小朋友,其實入面係一個邪惡過特衰政府嘅絕望世界。
今次要講嘅故事係:
一條廢中佬冇晒朋友、冇晒未來,唔信生命滿希望。見到有班細路正能量積極面對人生,一輪羡慕妒忌恨嘅心理扭曲之後,決定推班細路落火坑,送佢哋一程比惡鬼食。
條中佬咁狼死嘅?係呀,中佬係狼死啲㗎喇。
香港人應該明。
以正視聽:《約定的夢幻島》嘅主角係班細路。 (喺《少年JUMP》連載㗎,主角點可能係中佬?)
![](https://assets.matters.news/embed/8cd44c3f-4d64-44d8-a1f9-7eda832a519f.jpeg)
開始講故仔~
試想像,全世界嘅人類都係喺孤兒院大,咁大家就不分人種,全部都係兄弟姐妹咁溫馨,而且孤兒院仲有「媽媽」照顧,幾好呀。
但係中佬就唔同,佢孤獨一個人喺遠離孤兒院嘅安全屋生活。冇朋友、冇同伴,想搵個人吹吓水或者鬧吓交都冇。仲要夜晚一瞇埋眼想瞓之際,就只會諗起人生失敗、悲慘、痛苦嘅負面嘢。而離開安全屋,就要面對數之不盡嘅食人惡鬼。
生活係一個冇未來嘅循環:起身→食→出街俾惡鬼追→番安全屋→食→瞓→瞓唔着…(繼續LOOP)
![](https://assets.matters.news/embed/9f3d6ca9-5860-464f-a2cf-0069ea2b4ce9.jpeg)
![](https://assets.matters.news/embed/840f427f-3f90-46b2-bcd1-7d5fd828d934.jpeg)
![](https://assets.matters.news/embed/06665585-2c20-45c6-b9d1-a32260c609da.jpeg)
咁就過咗十幾年,安全屋有另一班逃亡嘅細路嚟到,真係買大送細,最大得11歲,最細得6歲。個個都好似未戒奶咁,對眼仲要閃閃吓,又攬頭攬頸大家HOME SWEET HOME。明明逃走到安全屋,都已經知道孤兒院外面嘅世界有幾咁變態,呢班細路都好似冇受污染,仲係好天真好傻好可愛。
中佬由少年長大成中佬,變成一個性格扭曲、孤僻、有咩就開槍嘅燥底麻甩佬(比着你係佢,得一個人都可能會係咁)。
![](https://assets.matters.news/embed/297fda42-e63d-48f9-850f-5ee5c9ed9e63.jpeg)
用中佬嘅角度睇,成個世界已經絕望,生存只係吊命,幾時死都冇所謂。
偏偏比佢遇倒一班對未來充滿希望嘅細路,自然覺得篤眼篤鼻,班細路做咩都好似諷刺緊自己有幾咁廢。
魚蛋論之下,自己冇人冇物,都要班細路感受咩都冇晒嘅滋味,唔好咁天真成日圍爐取暖。
佢計劃令呢班細路見識吓世界嘅殘酷,於是同意細路嘅建議,帶住其中年幾最大嘅兩個出去求救,但係真正嘅用意,係希望危險嘅路上,最少令是旦一個細路可以快啲死。
點知呢兩個細路又唔係流嘅,聰明、身手好、有體力,跟得上中佬嘅速度,又避開啲危險嘅敵人,想佢哋死都冇咁易(基本上主角組都係天才兒童)。
其中一個細路仲堅到同中佬講數,佢睇穿咗中佬咁多年嚟一個人孤獨生存有幾咁渴望有同伴,就係因為各種自責加自卑,而拒絕接受自己都可以有權擁有一切。
雖然個細路講中晒,但係中佬當然冇咁容易被打動,講兩講就俾你說服咩?
![](https://assets.matters.news/embed/a6772d70-ad3b-4100-a9f2-15b150fc71a5.jpeg)
佢哋闖入咗一個惡鬼嘅打獵場,入面仲有好多生還嘅人類,都只不過係惡鬼嘅玩具。呢個時候,狼死嘅中佬仍然冇忘記佢嘅目標係整死兩個細路。
係咁,中佬幾時先至覺醒?先至明白唔應該借惡鬼嘅手,去傷害自己人?
就係面對太過強大嘅敵人,所有人類被屠殺在即,睇穿佢嘅細路好簡單咁分析咗現實嘅情況之後,中佬終於覺醒,如果人類唔團結,就只會攬炒。
![](https://assets.matters.news/embed/289ede12-9b8e-47fb-9678-2b82d2ba3522.jpeg)
連11歲嘅細路都可以奮不顧身挑戰惡鬼,一個大男人做咩搞埋啲內鬥之類嘅陰濕嘢?
當中佬爆SEED加入反擊之後,佢發現打獵場入面掙扎求存嘅人類當中,有佢十幾年前以為俾自己害死嘅孤兒院兄弟,而且有兄弟就算斷咗隻手都要生存落去,希望有朝一日可以搵番自己。
原來世界真係仲有希望,原來世界真係有奇蹟。
中佬再度覺醒,同兄弟一齊打惡鬼,保護班細路。
覺醒幾時都唔會太遲,唔好以為年紀大、性格衰,而覺得冇可能番轉頭。
你或者會話:「漫畫嚟啫!現實啲廢老係廢㗎!」
冇錯,現實比創作荒誕。
盡力而為啦。各自努力。
Be Water My Friend。
<話晒都係漫畫介紹,以下係出版資料>
![](https://assets.matters.news/embed/1a3a13ac-f4af-4a65-b1e3-42a3a3591e57.jpeg)
書名:約定的夢幻島/約束のネバーランド
作者:白井カイウ、出水ぽすか
出版:集英社/東立
作品TAG:#黑暗系 #逃走系 #末日世界 #解謎
>[正經介紹]當年我喺《澳門日報》嘅新書推介(留底)
睇書依正路:
《約定的夢幻島》係我會追嘅極少數《少年JUMP》作品。(我都唔睇JUMP嘅)
設定、規模、題材都好唔《少年JUMP》。黑暗系嘅作品喺JUMP唔算多(例如《SHADOW LADY》、《魔人偵探腦嚙涅羅》、《死亡筆記》、《LEVEL-E》,可能十隻手指數得晒?),而且好大膽咁用女仔做主角(再之前用女仔做主角嘅JUMP系作品,可能係《IQ博士》同《CAT'S EYE》嗰個年代),喺JUMP系作品嚟講算係好破格。呢套真係出一期買一期,仲要等唔切有書到香港,KINDLE即DOWN即睇。
牌面上黑暗系、女仔做主角、兒童被殺等等內容,係好唔似JUMP嘅風格,但係睇睇吓又會發現入面有JUMP系作品嘅「熱血+努力+友情」方程式(就連主角係三人組呢一點都係)。
咁當然所謂嘅方程式唔係絕對通行,《約定的夢幻島》好睇嘅地方,我自己覺得,首先係解謎嘅方式特別出色。本身成個世界觀已經係一個謎,睇住班細路好似過關咁衝破一個關口,又會解開一啲世界嘅謎。而家見到啲伏線左穿右插咁,我期待完全解謎之後仲會唔會有啲咩驚喜。
好睇嘅另一個地方,係兩個作者都玩得夠盡,每一個設定或者情況都放大到極致。極致嘅絕望、極致嘅恐懼,會更加令人想為逃離夢幻之地嘅壯舉打氣(同樣嘅結構發生喺《進擊的巨人》)。
![](https://assets.matters.news/embed/4a0f61b8-4927-4262-90d7-e3dc182e3c2b.jpeg)
![](https://assets.matters.news/embed/f3f234ce-ecd0-488f-ba5b-2d55dae07f7d.jpeg)
《少年JUMP》一向係新手場,難得兩個作者都唔似新手,構思同畫功都好有水準,甚至比而家紅到銷量超越《ONE PIECE》嘅《鬼滅之刃》成熟太多。我希望可以睇更多呢兩位作者將來嘅作品。
我會覺得《約定的夢幻島》完美表現「PETER PAN情意結」。PETER PAN喺夢幻島唔會長大,而漫畫入面嘅細路喺未長大之前已經死亡,主角組要打破既定命運,就要掙扎長大成人,去重新創造屬於佢哋自己嘅夢幻島。條路點行、人生要點過,唔應該被編排,而係要自己決定。
作品名都改得好好,「夢幻島」嘅童話世界,源自千年嘅「約定」。當童話破滅,約定又被人打破,世界就出現裂縫。白老鼠喺第一百次實驗都會識得搵生路啦,人類嘅嘢,未到50年就走晒樣,仲話千年。
![](https://assets.matters.news/embed/2c1d1c9b-9768-45c5-a717-e4d7acdee758.jpeg)
![](https://assets.matters.news/embed/dc49f6fa-3a3d-43ea-ba91-ce7c931aa75f.jpeg)
雖然中佬都有覺醒時,不過作者ss冇繼續用呢個難得覺醒嘅角色,反而係喺另一個層面滿足咗中佬多年嚟嘅願望(嗰PART我睇到要冚書等一等),未免太令人心痛。
可能呢套始終都係講少年成長嘅故事,作者希望由主角組改變世界,亦都象徵世界未來亦都係屬於年輕一代。
我想睇中佬班兄弟喺打獵場掙扎咗十幾年嘅故事,難為佢哋用有限嘅資源,都可以死守咁耐,仲發明咗對付敵人嘅武器。可惜作者ss只係匆匆帶過,冇深入去寫,有啲意猶未盡。
如果第二時有啲番外篇、小說之類補完咁就好喇。
多謝你又睇到呢度,有興趣嘅話快啲搵原著漫畫嚟睇,再睇埋動畫!
![](https://assets.matters.news/embed/f0bbf816-28bf-4516-8b70-778026e38e15.png)
搬運自個人MEDIUM PAGE,有興趣睇伊死講漫畫,可以過嚟望吓。
喜欢我的作品吗?别忘了给予支持与赞赏,让我知道在创作的路上有你陪伴,一起延续这份热忱!