復活節在印尼

記得第一次在印尼參加聖誕子夜彌撒，神父喺彌撒之後多謝歌詠團、多謝工作人員唔出奇...... 但係雅加達，神父第一樣野，係多謝軍隊。

走出教堂，就見到一架軍車（真係車頂有機關槍嗰隻），同埋荷槍實彈嘅軍人駐守喺轉角處。之後我先知道，原來每當基督徒大時大節，政府都要派出軍隊去保護聖堂範圍。

今年復活節前，印尼發生了兩宗恐怖襲擊。其中一宗更是衝着一間聖堂來。今日經過Jakarta Cathedral，即管去睇吓今年仲會唔會有彌撒。點知行到附近，已經見到圖中軍隊嘅陣容。

彌撒確是有的，不過我哋呢啲外國人都係唔俾入。因為武漢肺炎，現時雅加達天主教堂嘅做法係只招待屬該教區、並已預先登記的本地教友，不再open to all。

教堂職員同我哋解釋完情況之後話 “But I can help you to take a photo outside the church” 好啦，都叫做到此一遊。

之後同老公討論，我老公話，只係一個宗教活動都要出動軍隊，有啲可悲；但我又覺得，作為只係佔一個國家2.9%人口嘅天主教徒（穆斯林人口87.2%），個國家都願意咁樣去保護，如果我係印尼天主教徒，應該會幾動容。終於明白，點解當年個神父會多謝軍隊。 另一樣我記得神父講嘅係，喺印尼，能夠公開同人講Merry Christmas都只係近幾年嘅事。原來有穆斯林組織認為Merry Christmas冒犯左佢哋嘅信仰。

例如喺上年10月，日惹的Sonobudoyo Museum喺入口處用霓虹燈整咗個Merry Christmas招牌，就被附近村民抗議。最後館長決定要將霓虹招牌拆下，仲寫信比村民組織道歉。 但亦有較liberal嘅穆斯林認為館長咁做，開咗個好壞嘅先例，認為應該要採取religion tolerance。

自從人類有左宗教呢一樣嘢，宗教之間就冇停止過吵吵嚷嚷。不過有得吵，總好過D極權國家連吵都無得吵嘅。

與其自殺式摧毀教堂咁大無畏，不如將精力轉移去對付那個在不遠的國度，興建強迫穆斯林吃豬肉嘅集中營嘅國家啦。