如何享受同人？
同人，日文：どうじん。根據維基百科解釋，同人原指有著相同習慣、興趣、志向等的人們，即「同好」。又指同在一處做事的人，即「同事」、「同仁」。簡單來講，就係跟志同道合的朋友聚埋一齊，同一群有相同嗜好的人，組成「同人社團」，交流創作靈感、分享資訊，或製作同人誌、同人遊戲等商品販售。再簡單來講，就可以睇自己鍾意嘅漫畫或者唔同嘅作品上面用自己嘅風格，創作自己想要嘅劇情，即係進行二次創作。成功嘅同人組織當然有唔少，不過講到大部份人認識嘅我相信只有近年新冒起的飛天奶茶，同紅遍台灣同香城嘅老牌同人組織風林山火。當然啦，除了二次創作，只要係一班志同道合嘅朋友走埋一齊，其實亦都算係同人組織，最好嘅例子當然係係Steam 上面擁有最奇怪tag的＂黑魂風格的生化危機7？真·教育類第一人稱RPG無誤。＂NEKOPARA的遊戲開發商 NEKO WORKS；另一個例子就係自2010年開始活躍，善用使用VOCALOID創造，風魔現今社會大部份年輕人，在年輕人的圈子中街知巷聞嘅著名音樂創作組織一HoneyWorks。
其實講起同人，我相信大部份人第一時間絕對唔係諗到以上任何一個同人組織，而係會諗到同人創作衍生出嘅唔同R-18類型作品，由漫畫到小說，甚至乎AV題材，都可以見到同人嘅蹤影。當然我唔係話對呢方面反感，而係如果缺少了這一部份，我相信同人文化絕對無依家咁盛大。市場上目前大部份有名嘅作品，基本上都唔難搵到創作成R-18本子嘅題材，甚至乎唔少大熱嘅作品更加會被創作成為AV作品。毋庸置疑，R-18題材類型嘅作品，絕對係令到大家接觸唔同人嘅第一關，相比起其他純粹為了有愛的角色創作的同人本（沒有R-18成份），R-18的各方面創作令到更多人知道和了解唔同嘅作品。最著名嘅例子當然係艦隊收藏系列島風的本子。係幾年前，係Twitter上面曾經見過一個笑話，就係有人參加完CM準備返屋企之際，發現不見了剛剛購買的島風嘅本子，然後走去車站詢問處尋找失物，然後車站職員竟然問他是什麼類型的作品，因為一共收到了27本男性向的內容和17本女性向內容的島風R-18本子，然後問他那一本才是他遺失的。由此可見其實大部份人對本身那一套作品認識未必係有咁深入，但係往往就係透過R-18唔同嘅作品令到更多人嘗試了解或者觀看整套作品，從而令到自己可以更加投入。
雖然R-18的產品可以令到唔同嘅人更容易主動理解唔同作品，從而提升觀眾層面和人數。但是，有少部份作品因為唔同嘅原因會完全禁止R-18題材類型嘅創作，例如現時仍然穩舉日本App Store 頭五名的馬良，正正就係因為大部份現實賽馬的馬主／擁有人唔想見到任何相關R-18類型嘅作品出現，所以官方營運商（CY game）完全禁止相關類型的R-18創作，而且如果真的看到，表示會保留法律追究權利。可以見到雖然官方都明白呢個係提升人氣最快最簡單嘅方法，而且彷彿唔使再自己額外花大量金錢宣傳，但係往往受制於作品背景同唔同機構嘅君子協定，導致到受到少部份嘅限制。
上面有講過R-18嘅同人本子，其實相比起R-18，普通日常向嘅本子其實先至係成個市場嘅主流。首先我相信大家要搞清楚一件事，就係現時在唔同網站或者電視上面睇到嘅作品，例如大熱嘅 SPY x FAMILY、ヒロインたるもの！～嫌われヒロインと内緒のお仕事～、古見さんは、コミュ症です。等等，都係屬於商業向嘅作品，而係佢地上面再進行額外嘅創作或者唔通腦補內容嘅作品，先至算係同人創作。最主要嘅當然大家都係見到以唔同本子嘅形式出現，比較少見到其他類型嘅同人創作作品，例如吊飾、立牌、公仔等等。主要會有咁嘅情況係因為相比起本子，其他類型更加容易觸及版權問題，所以大部份人都避免衍生法律問題而創作本子。大家係市場上見到嘅本子，主要都係漫畫嘅形式出現，但亦都有個別作品會純文字創作，但係大部份都主要係在日本推出，所以對大部份非日本人來講，閱讀雖然可能會有問題，但大部份都係為咗對自己角色有愛而購買作品。相信睇到呢度，你心中一定有一個疑問，就係其實賺唔賺到錢？好老實講，賺到錢嘅只係極少數，大部份都係蝕錢收場。雖然絕對係一個吃力不討好嘅工作，但係大部份人會創作都係因為對角色有愛，簡單黎來講就係用愛發電。
除了常見嘅動畫漫畫作品同人本子外，其實仲有好多唔同類型嘅作品都會列入同人創作之中。例如以香港電車為主題嘅角館秋月老師、以女僕Cafe為主題嘅謝先生女僕研究、黑色風趣幽默嘅香城定居攻略等等，呢一類雖然同ACG完全扯唔上關係作品，其實都屬於同人創作類型。因為雖然牽涉唔同嘅領域，但透過創作同出版，令到可以同道中人分享的一個途徑，這就是同人。
相比起R-18唔同類型題材的作品，Cosplay可以算是同人文化中大家最容易接觸得到嘅範疇。近幾年因為唔同宣傳，加上VTuber嘅高速崛起，Cosplay普羅大眾已經開始逐漸接受。但係喺咁多種同人文化入邊，Cosplay絕對算係一個非常有愛嘅行為。當然，金錢絕對係其中一個考慮因素，因為同普通衣服唔同，大部份都係需要訂造，價錢都唔平，而且唔可以使用洗衣機清洗，往往只可以手洗，甚至乎只可以乾洗，令到唔少想踏入Cosplay嘅人但係見到需要花費大量金錢當刻已經卻步。而且即使解決了金錢問題，仍然需要耗上大量心機同時間。就算係日本著名Cosplay衣服製作商之一購買 Cosplay衣服，即使已經有很高的還原度，但往往因為有唔少細節需要跟穿着人士的身材修改或者添加，需要用上唔少時間進行合適嘅修改，所以絕對係一個耗時又消耗心機嘅工序。但係當完成果一刻，每一個人士都會對能夠還原自己喜歡的角色，內心總是特別激動。正正除了因為能夠表達自己有幾喜歡這一個角色之外，更加可以得到別人嘅認同。當然，近年來有唔少年紀比較細、經濟負擔能力比較低嘅人，純粹在淘O上購買衣服，然後不作任何修改便直接進行Cosplay，令到唔少人貽笑大方。因為還原度除了好低之外，而且手工亦都十分惡劣，基本上一睇就睇得出分別，所以咁樣就可以知道一個人對Cosplay究竟係有愛定係無愛。
不過近年來其實成過Cosplay界都不斷改變。作為一個過氣嘅cosplayer 攝影，面對近幾年嘅Cosplayer，真係得啖笑。先唔好再糾結近年因為網購大行其道、急速發展都知道好多人純粹只係買件衫返嚟沒有進行修改便 Cosplay，而係對人接物果種態度真係唔同晒。以前我雖然唔係一個有名氣的Cosplayer攝影師，但係因為主要我是和一些有名嘅朋友一齊，所以都算認識了唔少人。除了唔同公園同海邊之外，有時可能會預約唔同主題嘅房間攝影。換算在以前，Cosplayer不但會請支付所有租借費用，而且亦都會邀請同行者一起吃飯以作感謝；雖然時移世易，相隔多年後，預約主題房間攝影價錢亦都相差無幾，大約也是$500 2至3小時左右，但是現在的Cosplayer不單止會要求攝影師也要一起支付部份租借場地的費用，而且有個別更會要求提供飲品或小食等，而且更加要做埋保母嘅角色，例如幫手照顧和協助運送行李等等，雖然我唔係要話而家新一代嘅Cosplayer咁樣做有錯，但係相比起以前，現在的感覺更加像是一名工具人，所以我現時雖然偶爾仍會接一些工作，但主要是十分相熟和以前曾經合作過的cCosplayer 才會進行拍攝，因為對於新一代的Cosplayer 我真的不能接受。
當然除了本子之外，同人遊戲、同人音樂等等都係一個對同人文化嘅表現，不過相比起本子，呢兩樣就比較少出現，除了因為要求比起本子更加高之外，成本同時間亦都係比較多。如果曾經有睇過不起眼女主角培育法，當中成個故事就是說同人遊戲嘅創作，可以見到相比起本子，遊戲嘅創作絕對係一項浩瀚嘅工程。雖然近幾年創作遊戲嘅門檻已經大幅降低，但係仍然需要有一定嘅技術先至可以完成整個遊戲，所以至今為止，同人遊戲亦都算係比較少產品嘅一環。當然啦，由同人創作變成成功商業向嘅作品，當中嘅佼佼者一定係Nekopara。至於同人音樂，其實自從初音未來整套軟件VOCALOID推出之後，我哋可以見到同人音樂好似雨後春筍咁出現。成功嘅例子都有好多，但係大部份仍然以初音未來作為主要嘅歌手。
創作完唔同嘅同人內容之後，其實都要搵一個地方進行銷售或者公開。雖然有唔少人都會選擇喺網上面公開或者販賣自己創作嘅作品，但相比起其他任何一個行業，例如網購超市雜貨和購買電子產品等等，同人作品始終比較喜歡線下實體活動，又稱同人活動。香港、台灣日本都有唔同嘅同人活動，日本當然係著名嘅聖戰：Comic Market；台灣嘅開拓動漫祭Fancy Frontier 、Comic World Taiwan；香港嘅Rainbow Gala等等，都係著名嘅同人活動，甚至乎可以話係同人誌販賣活動。雖然近年斷斷續續各地均受到疫情嘅影響，同人活動或多或少亦都受到一定程度上嘅打擊，但係當每一次重新舉辦嘅時候，均會吸引大量人士參加，可見市場上是多麼渴望同人活動的舉辦。不過相比起台灣或者日本，香港的同樣活動已經到達夕陽的邊緣。明天後天於九龍灣國際展貿中心舉辦的Rainbow Gala，如無意外今年將會舉辦多一次之後便會正式宣布停辦，但是停辦原因並不是因為收入不平衡，而是因為場地進行重建，香港缺乏中型展貿場地，導致到難以再尋覓地方舉行。曾經同舉辦Rainbow Gala相關人士交流，他們都表示唔希望將一項有名有氣嘅歷史活動停辦，但基於其他場地嘅限制，例如灣仔會展雖然租一個展貿聽價錢不是太貴，但是因為沒有提供枱櫈，需要另外再找地方購入和儲存，行政上是極度不便、至於麥花臣球場，就因為太細難以舉辦、機場博覽館雖然是一個適合的場地，但是因為實在太偏僻，已經可以預計會專程前往的人流不如九展，所以如果再找不到適合的中型展覽場地，我都可以保證，香港的同人活動將會步入終結。
其實我相信，ACG文化係日常生活都唔難接觸到，例如唔同嘅商業向作品、VTuber等等，實體嘅例子例如有台灣嘅高捷少女、香港唔同豉油品牌推出嘅嘅豉油娘等等。大家其實日常生活入邊都會或多或少接觸到呢一類嘅文化。但係除了商業向嘅作品之外，同人文化亦都係撐起呢一整個ACG當中不可缺少嘅一環，甚至乎有好多都係透過同一文化衍生成為商業香作品嘅例子。但係要霎時之間，要令到更多人接觸同人呢一種文化，絕對係天方夜譚，因為有好多人連咩叫同人本子都唔知道嘅時候，咁又如何推廣出去？係佢地嘅眼中，只係知道官方嘅漫畫、動畫或者音樂、周邊產品等等，對於再為同一個角色進行額外嘅設定或者腦補呢一種行為絕對是聞所未聞。當然，在每個人嘅眼中，同人絕對係一個為愛發電嘅行為，因為大家都知道唔可能透過同人黎都賺錢，但係偏偏大家係整個過程入邊可以搵到知己，呢個先至係最重要嘅目的。甚至乎如果你有機會訪問唔同嘅同人作家，我相信有唔少人都會答你，我會進行同人創作，只係因為純粹對呢一個角色有愛，所以就進行創作。就係咁簡單嘅道理，但呢一個正正就係支撐着唔同人創作嘅目的。今日就講住咁多先，下星期六見。