拾荒書介 : 朝鮮戰爭及最寒冷的冬天

冇興趣睇拍馬屁電影【長津湖】，但激起我對韓戰嘅興趣。坦白說，之前對韓戰嘅認識最多來自哈金小說【War Trash】，講人民自願軍參戰又成為戰俘嘅經歷，著眼點係共產黨對人性嘅操弄。剛巧書友漂書有兩本關於韓戰嘅書 : 記者 David Halberstam 【最寒冷的冬天】和歷史學家Bruce Cumings 【朝鮮戰爭】，後者係不滿前者嘅某些觀點而書寫。

Halberstam 係訪問多位韓戰參加者寫成書，由小故事組成大故事，並冇歪曲歷史，Cumings 唔滿意係冇講到美國係1945 漢城（首爾）建立軍政府嘅深遠影響，與及美軍對北韓嘅地毯式轟炸。Halberstam 其實還原了當時戰爭同美國政府內政及外交嘅互動，而Cumings 則從較宏觀角度去批判美國介入他國內戰。

原本韓國係二戰中邊緣地，早是日本殖民地而且有不少韓國人參加日軍。二戰結束美國粗疏地以北緯38度作界線，北方交由蘇聯接受日本投降，南方則由美國接受。然後雙方又各自推出傀儡政權，蘇聯選咗協助中共在東北打遊擊抗日嘅金日成而美國選咗滯美多年嘅李承晚。其實韓國人民有第三選擇，蘇聯暗殺咗反殖又反共嘅「朝鮮甘地」曹晚植等金日成上位，而美國係李承晚操弄下將反殖等同反共而加以鎮壓，尤其大規模殘殺全羅南道（光州市所在）嘅反殖也不親共嘅抗爭者。

中國嘅介入與其話係擔心美軍越境進攻，其實係毛澤東高明嘅戰略，確立新中國嘅崛起同佢個人黨內無上嘅權威。不過毛係用幾十萬人嘅生命換取，而且係毫不在意。

韓戰係深遠影響全球發展，而香港係受惠者。