台灣宅宅環島之旅：逆時針篇 Day 0 準備

一講起台灣旅行，相信好多人都熟悉過我，甚至乎大部份讀者都係來自台灣，咁其實我可能繼續講落去都無乜意思，多謝大家，大家可以撳返上一頁離開。下次再見～

當然大家識我咁耐，就知道我唔係一個咁膚淺嘅人，香港人去台灣旅行，好多人除了去台北之外，其他地方大家其實都有去過；但如果將所有地方集合成一次環島遊，我想信真係唔多人可以達到這個成就，希望可以透過呢個系列，可以令大家了解到台灣環島遊絕對唔係一件咁容易嘅事，仲要係一班二十出頭嘅宅宅。

首先你可能會問，點解會選擇環島遊？時間又趕，能夠去到嘅地方又唔多，仲要好辛苦，有甚麼好玩？點解唔分開，每次去一個地方慢慢玩？其實對我地來講，可能因為我自己喜歡揸車，所以覺得去台灣自駕遊其實都幾過癮（未去之前當然係咁諗）。 至於點解我地會選擇揸車而唔係選擇搭公共交通工具，首先，如果你一班人一齊去旅行有架車時間安排會方便好多，唔使每到一個地方都要就住時間，玩得唔過癮（平時生活已經趕時間，難得去旅行就不如放鬆下；第二就係見到邊度景色優美，我可以擺低架車就去影相，唔似搭巴士或者搭台鐵高鐵咁樣無得停低睇，只可以走馬看花）另一樣野我地覺得最重要嘅就係可以親身體驗令人聞風喪膽的蘇花公路，而且果陣蘇花改只是開放了一少部份，而南迴改仍然未開通。租車方面，我地五個人但係想坐得舒服少少，所以揀了格上租車嘅韓國現代 Starex 2.5，即係香港Hyundai H-1。

準備嘅時候其實真係無乜認知，所以今次第一次去真係有少少隨便安排時間，以為自駕遊開快少少便可以追到時間；結果去到就知道大錯特錯，理論與實踐永遠都係背道而馳。

先講下尋找住宿的地方，我地預計大約西部三日東部兩日，而我地原則就係盡量不會揸車入台北市區，因為台北交通實在太恐怖。 第一日，因為預計去到桃園機場已經係夜晚，所以攞完車之後就會在機場附近搵地方過夜。瞓醒第二日就去台中食個午餐跟住就去台南住；再之後就經過高雄落屏東玩，在墾丁住多一日之後就去花蓮住，再之後落去宜蘭浸過溫泉過一晚，之後返桃園機場還車，跟住再回去台北玩多兩日。原本成個計劃係好美好，不過紙上談兵同實際運行上來真係兩回事。亦都可能會有人問，咁我係住酒店定住民宿？我嘅答案係兩樣都有，無他嘅，有大部分地方酒店平過民宿，所以兩樣都有。民宿可以體驗當地人情；酒店有質素保證，唔怕會遇到伏，所以你叫我點樣取捨Www

食個方面就去到當地再睇下有咩食啦，反正食物都是大同小異，而且因為之前試過幾次係台北想去某餐廳，但去到先知無開，所以我地都已經唔再有任何期望，正所謂：沒有期望就沒有失望。

換台幤方面，我地決定去到台灣在用銀聯卡在櫃員機撳錢，因為匯率比較高。

電話卡，我們決定到達桃園機場後再購買。以前我試過係香港買，去到台灣後完全不能使用，浪費了我＄100事少，浪費我時間才是最大問題；在台灣在購入，可以肯定買完馬上用到，一定唔怕會浪費金錢，同埋我自己會自備Wi-Fi蛋，放張Sim卡插入去就用得，方便快捷。

下一次，旅程正式開始，不過唔知幾時先得閒寫Www